Eshuura ya Kana
Ou Baanabi Boona Baagambireho
1. Ebirikumanywa aha kubaho kwa Yesu atakaizire omu nsi nibyoreka ki aha mukago gwe na Yehova?
“AHAKUBA Ishe akunda Omwana, kandi amworeka ebi akora byona.” (Yohaana 5:20) Omwana ogu ka yaabaire aine omukago gw’amaani n’Ishe, Yehova! Omukago ogwo gukatandika obu Omwana yaahangwa, emyaka mingi munonga atakaizire omu nsi. Akaba ari Omwana omwe nyamunegyere ou Yehova we wenka yaayehangiire. Ruhanga akahanga buri kintu ekiri omu nsi n’omu iguru arikurabira omu Mwana ogwo omukundwa. (Abakolosai 1:15, 16) Kandi akakora nka Kigambo nari Omugambirizi wa Ruhanga Ou yaabaire arabamu kumanyisa abandi ebi Akunda. Ogu Mwana ou Ruhanga yaabaire naakunda niwe yaizire kuba Yesu Kristo.—Enfumu 8:22-30; Yohaana 1:14, 18; 12:49, 50.
2. Obunabi bwa Baibuli nibugamba ahari Yesu kwingana ki?
2 Omwana wa Ruhanga omujigaijo atakazairwe nk’omuntu omu nsi, obunabi bwingi oburikumukwataho bukaba bwahandiikirwe. Entumwa Petero akahamiza Koruneelio ati: “Ogwo niwe baanabi boona baahamize [baagambireho].” (Ebyakozirwe 10:43) Omurimogwa Yesugukagambwaho munonga omu Baibuli na maraika yaahika n’aha kugambira entumwa Yohaana ati: “Ahakuba okuhamya amazima ga Yesu nigwo mwoyo gw’obunabi.” (Okushuuruurwa 19:10) Obunabi obu bukooreka gye ngu Yesu niwe Mesia.Bukooreka bingiebiyaabairenaijakukora omu kuhikiiriza ebigyendererwa bya Ruhanga. Ebi byona buzima tushemereire kubitaho omutima omu bunaku obu.
Eki Obunabi Bwayorekire
3. (a) Omu bunabi oburikushangwa omu kitabo kya Okutandika 3:15, n’oha orikugambwaho nka, enjoka, ‘omukazi,’ ‘oruzaaro orw’enjoka’? (b) Ahabw’enki ‘okuteerwa kw’enjoka omu mutwe’ ni kukuru munonga aha baheereza ba Yehova?
3 Obunabi bw’okubanza ahari obwo bukagambirwa omuri Edeni bwanyima y’okubaho kw’obugomi. Yehova akagambira enjoka ati: “Ndyata obuzigu ahagati yaawe n’ogu mukazi, n’ahagati y’oruzaaro rwawe n’orwe; orwe ruryakuteera omutwe, naiwe oryaruteera ekitsintsiino.” (Okutandika 3:15) Obunabi obu bukaba nibukwata ahari Sitaane, orikugambwaho nk’enjoka. ‘Omukazi’ n’ekibiina kya Yehova eky’omu iguru ekyesigwa ekiri nk’omukazi omwesigwa Ahariwe. ‘Oruzaaro orw’enjoka’ ni baamaraika hamwe n’abantu abarikworeka emiteekateekyere ya Sitaane, abarikuhakanisa Yehova n’abantu Be. ‘Okuteerwa kw’enjoka omu mutwe’ nikumanyisa okucwekyerezibwa kwa Sitaane aha muheru, owaanyanyaatsire Yehova kandi akareetera abantu enaku n’okunyangarara kwingi. Kwonka shi n’oha orikukirayo obukuru omu “ruzaaro” oru, owaabaire naaza kuteera enjoka omutwe? Okumara emyaka mingi, ekyo kikaguma kiri “enaama.”—Abarooma 16:20, 25, 26.
4. Orunyiriri oru Yesu yaarugiremu nirutuhwera ruta kumanya ngu niwe Ruzaaro orwaraganisiibwe?
4 Bwanyima y’emyaka 2,000 abantu baherize kuhangwa, Yehova akongyera kushoboorora aha Ruzaaro oru. Akooreka ngu rukaba niruza kureebekyera omu runyiriri rwa Abrahamu. (Okutandika 22:15-18) Kwonka orunyiriri omu Oruzaaro rwabaire niruza kuruga, rukaba niruza kutooranwa Ruhanga. N’obu Abrahamu araabe yaabaire naakunda omutabani Ishimaeli ou yaazaire ahari Hagari, Yehova akamugira ati: “Endagaano yangye ndyagihamya ahari Isaaka, ou Saara arikuzaarira.” (Okutandika 17:18-21) Endagaano egyo terakozirwe na Esau omujigaijo gwa Isaaka, kureka ekakorwa na Yakobo owakomookirweho enganda 12 za Israeli. (Okutandika 28:10-14) Bwanyima kikorekwa ngu Oruzaaro orwo rukaba niruza kuzaarwa omu ruganda rwa Yuda, omu runyiriri rwa Daudi.—Okutandika 49:10; 1 Obusingye 17:3, 4, 11-14.
5. Obu Yesu yaatandika obuheereza bwe omu nsi, n’enki ekyahamize ngu niwe yaabaire ari Mesia?
5 Ni bintu ki ebindi ebyabaire nibiza kumanyisa Oruzaaro orwo? Hakirikuburayo emyaka erengire 700, Baibuli ekagamba ahari Betelehemu nk’omwanya ogu Oruzaaro orwo rwabaire niruza kuzaarirwamu. Kandi Baibuli ekongyera yaayoreka ngu ‘obukomooko bw’Oruzaaro orwo n’obwa iranaira,’ okwiha obu yaahangwa omu iguru. (Miika 5:2) N’obunaku bwenyine obu yaabaire naaza kureebekyeramu omu nsi nka Mesia bukagambwaho kare kurabira omuri nabi Danieli. (Danieli 9:24-26) Obu Yesu yaashukwaho omwoyo orikwera atyo akahinduka Ou Yehova ashukireho amajuta, iraka rya Ruhanga ryenyine rikeema omu iguru ryahamya ku Yesu ari Omwana We. (Matayo 3:16, 17) Rutyo Oruzaaro rwamanywa! N’ahabw’ekyo, Filipo akaba naabaasa kugamba ataine kubangaanisa ati: “Tureebire ou Musa yaahandiikireho omu Biragiro, kandi akahandiikwaho na baanabi, Yesu.”—Yohaana 1:45.
6. (a) Okurugiirira ahari Luka 24:27, abeegi ba Yesu bakaija kwetegyereza ki? (b) N’oha orikukirayo obukuru omu ‘ruzaaro rw’omukazi,’ kandi okuteera enjoka omutwe nikimanyisa ki?
6 Bwanyima, abeegi ba Yesu bakaija kukyetegyereza ngu Ebyahandiikirwe bikaba biijwiremu obunabi oburikumukwataho. (Luka 24:27) Kikongyera kwetegyerezibwa gye ngu Yesu niwe orikukirayo obukuru omu ‘ruzaaro rw’omukazi,’ owaabaire naija kuteera enjoka omutwe, akacwekyereza Sitaane. Kurabira omuri Yesu, byona ebi Ruhanga yaaraganiise abantu, ebi tutegyereize n’ekihika, biryahikiirira.—2 Abakorinso 1:20.
7. Oyihireho okumanya Ogwo orikugambwaho omu bunabi, n’enki ekindi eki tushemereire kwetegyereza?
7 Okumanya eki, kushemereire kutureetera kukora ki? Baibuli neegamba aha mukonwa Omunyesiopia owaabaire ashomire bumwe aha bunabi oburikukwata aha kwija kw’Omucunguzi kandi Mesia. Ahabw’obutabukyenga, akabuuza Filipo omubuurizi ati: “Nabi ogwo akagamba ahari oha?” Haza omukonwa ogwo taragarukiire aho ku yaagarukirwemu. Bwanyima y’okuhurikiza gye okushoboorora kwa Filipo, omushaija ogwo aketegyereza ngu okubaasa kworeka okusiima kwe ahabw’obunabi obwo obwahikiriire, akaba ashemereire kugira eki yaakora. Aketegyereza ngu akaba naayetenga kubatizibwa. (Ebyakozirwe 8:32-38; Isaaya 53:3-9) Naitwe nitutwaza tutyo?
8. (a) Okuteeraho kwa Abrahamu kuhayo Isaaka kukaba nikworeka ki? (b) Ahabw’enki Yehova yaagambiire Abrahamu ngu amahanga goona ag’omu nsi gakaba nigaija kuheebwa omugisha omuri orwo Ruzaaro, kandi eki nikitukwataho kita omu bunaku obu?
8 Teekateeka ahari Abrahamu obu yaateeraho kuhayo Isaaka nk’ekitambo, omwana we omwe nyamunegyere ou yaabaire azaire ahari Saara. (Okutandika 22:1-18) Ekyo kikaba nikyoreka eki Yehova yaabaire naija kukora—okuhayo Omwana we omwe nyamunegyere: “Ahakuba oku nikwo Ruhanga yaakunzire atyo ensi, akahayo Omwana we omwe nyamunegyere, ngu omuntu weena orikumwikiriza arekye kuhwerekyerera, kureka atungye amagara agatahwaho.” (Yohaana 3:16) Eki nikituha obwesigye ngu nk’oku Yehova yaahaireyo Omwana we nyamunegyere kuhikiiriza ekigyendererwa Kye, Naija kandi ‘kutuha n’ebintu ebindi byona.’ (Abarooma 8:32) Itwe, eki nikitwetengyesa kukora ki? Nk’oku kihandiikirwe omu kitabo kya Okutandika 22:18, Yehova akagambira Abrahamu ngu amahanga goona ag’omu nsi gakaba nigaija kuheebwa omugisha omuri orwo Ruzaaro, ‘ahabw’okugira ngu Abrahamu akoorobera eiraka rya Ruhanga.’ Naitwe tushemereire kworobera Yehova n’Omwana we: “Orikwikiriza Omwana aine amagara agatahwaho; kwonka otarikworobera Mwana, taribona magara; kureka ekiniga kya Ruhanga kiguma ahariwe.”—Yohaana 3:36.
9. Ku turaabe twine okusiima ahabw’omugisha gw’okutunga amagara agatahwaho, agarikubaasika ahabw’ekitambo kya Yesu, nituza kukora ki?
9 Ku turaabe twine okusiima ahabw’omugisha gw’okutunga amagara agatahwaho, agarikubaasika ahabw’ekitambo kya Yesu, nituza kugira ekyetengo ky’okukora byona ebi Yehova arikutugambira kurabira omuri Yesu. Ebi Yehova arikutugambira biine akakwate na rukundo ei tumwiniire n’ei twiniire bataahi baitu. (Matayo 22:37-39) Yesu akooreka ngu rukundo ei twiniire Yehova eshemereire kutuhiga kwegyesa abandi ‘kworobera byona ebi yaaturagiire.’ (Matayo 28:19, 20) Nk’abaheereza ba Yehova, nitwenda kworekana rukundo egyo butoosha ‘turikuteeranira hamwe’ n’ab’eishe-emwe bataahi baitu. (Abaheburaayo 10:25; Abagalatia 6:10) Ekindi, omu kworobera Ruhanga n’Omwana we, titushemereire kuteekateeka ngu nibatutwara nk’abantu abatarikushobya. Abaheburaayo 4:15 nirugira ngu Yesu Omunyamurwa waitu Omukuru, naabaasa “kusaasira hamwe naitwe omu bweremwa bwaitu.” Ka nikituhuumuriza namunonga twayetuurira Ruhanga omu kushaba turikurabira omuri Kristo ngu atuhwere omu bweremwa bwaitu!—Matayo 6:12.
Yoreka Okwikiriza Omuri Kristo
10. Ahabw’enki hatariho ondiijo ou twakuboneramu okujunwa okwihaho Yesu Kristo?
10 Ku yaaherize kworeka ab’omu icwero ry’emanja ery’Abayudaaya erikuru omuri Yerusaalemu ngu omuri Yesu obunabi bwa Baibuli bukahikiirizibwa, entumwa Petero yaahendera ati: “Tihariho ondiijo ou twakuboneramu okujunwa, ahakuba tihariho rindi iziina ahansi y’eiguru eryahairwe abantu, erishemereire kutujuna.” (Ebyakozirwe 4:12) Obu baijukuru ba Adamu boona bari abasiisi, tihaine ou amagara ge garikubaasa kukora nk’ekitambo ky’okucungura omuntu weena. Kwonka Yesu we akaba ahikiriire, n’ahabw’ekyo n’amagara ge gakaba nigabaasa kukora nk’ekitambo. (Zaaburi 49:6-9; Abaheburaayo 2:9) Akaha Ruhanga ekitambo ekyabaire nikingaingana n’amagara agu Adamu yaafeereirwe. (1 Timoseo 2:5, 6) Eki kikatuteeraho omuhanda gw’okutunga amagara agatahwaho omu nsi ya Ruhanga ensya.
11. Shoborora oku ekitambo kya Yesu kirikubaasa kutugasira kihango.
11 Ekitambo nikitubaasisa kutunga n’endiijo migisha omu bunaku obu. Nk’eky’okureeberaho, n’obu turaabe turi abasiisi, ekitambo kya Yesu nikitubaasisa kugira omutima ogutarikweshinja ahabw’okusaasirwa ebibi. Eki nikikirira kimwe eki Abaisraeli baabaasize kutunga omu kutamba ebitambo by’enyamaishwa nk’oku Ebiragiro bya Musa byabaire nibibetengyesa. (Ebyakozirwe 13:38, 39; Abaheburaayo 9:13, 14; 10:22) Kwonka okubaasa kutunga okusaasirwa okwo, twine kwetegyereza ngu buzima nitwetenga ekitambo kya Kristo: “Ku tugira ngu titwine kibi, tuba nitwebeiha, kandi tuba tutaine mazima. Ku twatura ebibi byaitu, niwe w’okwesigwa kandi ohikiriire kutusaasira ebibi n’okutwozyaho eby’okutahikiirira byona.”—1 Yohaana 1:8, 9.
12. Ahabw’enki okubatizibwa omu maizi nikikuru omuntu yaaba ari ow’okutunga omutima ogutarikweshinja omu maisho ga Ruhanga?
12 Abasiisi bakaayoreka bata okwikiriza omuri Kristo n’omu kitambo kye? Abantu omu kyasha ky’okubanza ku baabaire bahinduka abaikiriza, bakaba bakyoreka butunu. Bata? Bakaba babatizibwa. Ahabw’enki? Ahabw’okuba Yesu akaragiira ngu abeegi be boona babatizibwe. (Matayo 28:19, 20; Ebyakozirwe 8:12; 18:8) Omuntu tarikwija kweziringa kubatizibwa omutima gwe gwaba buzima nigusiima ekiconco eki Yehova yaatuhaireire omuri Yesu. Naija kukora empindahinduka zoona ezirikwetengyesa omu magara ge, ayeheyo ahari Ruhanga omu kushaba kandi eki akyoreke arikubatizibwa omu maizi. Omuntu ku arikworeka okwikiriza omu muringo ogwo, naaba naashaba Ruhanga ‘omutima ogutarikweshinja.’—1 Petero 3:21.
13. Twayetegyereza ngu tukozire ekibi, tushemereire kukora ki, kandi n’ahabw’enki?
13 Na bwanyima y’okubatizibwa, nitwija kushobya. Mbwenu tushemereire kukora ki twashobya? Entumwa Yohaana akagira ati: “Naabahandiikira ebigambo ebyo, ngu murekye kushiisha; kwonka omuntu weena ku araashiishe, twine Omutonganizi ahari Isheboona, niwe Yesu Kristo ohikiriire; kandi Ogwo niwe karabo ahabw’ebibi byaitu.” (1 Yohaana 2:1, 2) Eki shi nikimanyisa ngu buri kibi kyona eki turaakore, twashaba Ruhanga okusaasirwa, naatusaasira? Ngaaha. Okubaasa kusaasirwa, twine kweteisiza kimwe. Nitubaasa kwetenga n’obuhwezi kuruga aha bareeberezi b’ekibiina Ekikristaayo abaine obumanyirizi omu by’omwoyo. Twine kwikiriza kandi tuketegyereza obubi bw’ekikorwa kyaitu kandi buzima eki kikatushaasha kikatureetera kutaho agaitu goona obutagaruka kukikora. (Ebyakozirwe 3:19; Yakobo 5:13-16) Twakora tutyo, nitugira obwesigye ngu Yesu naaza kutuhwera kandi tugarukye tube abarikusiimwa Yehova.
14. (a) Shoborora omuringo ogu ekitambo kya Yesu kirikutugasiramu. (b) Nitwija kukora ki twaba buzima twine okwikiriza?
14 Ekitambo kya Yesu nikibaasisa “obusyo obukye” kutunga amagara agatahwaho omu iguru. Aba ni bamwe aha ruzaaro orurikugambwaho omu kitabo kya Okutandika 3:15. (Luka 12:32; Abagalatia 3:26-29) Nikibaasisa n’obuhumbi bw’abantu abandi kutunga amagara agatahwaho omu nsi. (Zaaburi 37:29; Okushuuruurwa 20:11, 12; 21:3, 4) Amagara agatahwaho ‘n’ekiconco kya Ruhanga omuri Kristo Yesu Mukama waitu.’ (Abarooma 6:23; Abaefeso 2:8-10) Ku turaabe twine okwikiriza omu kiconco ekyo kandi turikusiima n’omuringo ogu kyahairwemu, nitwija kukyoreka. Ku turikwetegyereza omuringo murungi ogu Yehova yaakoreisemu Yesu omu kuhikiiriza eby’Akunda, kandi tuketegyereza n’obukuru by’okugyendera omu bigyere bya Yesu, nitwija kutwara okubuurira nk’omurimo mukuru munonga omu magara gaitu. Okwikiriza kwaitu nikwija kureebekyera omu muringo gu turikubuuriramu abandi aha kiconco kya Ruhanga eki eky’obuguzi bwingi.—Ebyakozirwe 20:24.
15. Okwikiririza omuri Yesu Kristo nikureetaho kuta obumwe?
15 Okwikiriza oku ka nikureeta obumwe! Nikutuhwera kwirira haihi Yehova, Omwana we, n’ab’eishe-emwe omu kibiina Ekikristaayo. (1 Yohaana 3:23, 24) Eky’okugira ngu Yehova akaha Omwana we “eiziina eririkukira amaziina goona [okwihaho erya Ruhanga], ngu boona abari omu iguru n’omu nsi n’okuzimu batsimbire amaju eiziina rya Yesu, kandi [ngu] endimi zoona zaature ku Yesu Kristo ari Mukama, [kugira ngu] Ruhanga Tataitwe ahimbisibwe,” nikitureetera okushemererwa.—Abafilipi 2:9-11.
Eby’Okweijutsya
• Obu Mesia yaareebeka, ahabw’enki abaabaire buzima nibaikiririza omu Kigambo kya Ruhanga batarashangire bureemezi bwona omu kumumanya?
• Ni bintu ki ebimwe ebi tushemereire kukora okworeka okusiima kwaitu ahabw’ekitambo kya Yesu?
• Ni miringo ki ei ekitambo kya Yesu kitugasiiremu? Ekitambo nikituhwera kita ku turikushaba Yehova okutusaasira ebibi byaitu?
[Ekishushani ekiri aha rupapura 36]
Yesu akagambira abeegi be ngu bashemereire kwegyesa abandi kworobera ebiragiro bya Ruhanga