Eshuura y’Ikumi na Ishatu
Omutwe Muhango gw’Abantu omu Maisho g’Ekitebe kya Yehova eky’Obukama
1. (a) N’enki ekiine kubanza kuhika aha baheereza ba Ruhanga abaabaire bariho Obukristaayo butakabaireho hamwe n’abantu 144,000 batakatungire kiconco kyabo? (b) Ni matsiko ki agu “omutwe muhango gw’abantu” abariho omu bunaku obu baine?
ABAHEEREZA ba Ruhanga abeesigwa kutandikira ahari Abeeli kuhika ahari Yohaana Omubatizi, bakaba nibeebembeza okukora ebi Ruhanga akunda. Kandi boona bakafa baine amatsiko g’okuzookyera amagara omu nsi ya Ruhanga ensya. Abantu 144,000, abaritegyeka na Kristo omu Bukama bwa Ruhanga obw’omu iguru nabo baine kubanza baafa okubaasa kutunga ekiconco kyabo. Kwonka Okushuuruurwa 7:9 nirworeka ngu omu biro ebi eby’emperu, hakaabaire hariho “omutwe muhango gw’abantu” okuruga omu mahanga goona abatarikwija kufa, kureka abaine amatsiko g’okutuura omu nsi ebiro byona. Ori omwe aharibo?
Okwetegyereza Omutwe Muhango gw’Abantu
2. Omutwe muhango gw’abantu abarikugambwaho omu Okushuuruurwa 7:9 bakaija kwetegyerezibwa gye bata?
2 Omu mwaka gwa 1923, abaheereza ba Yehova bakeetegyereza ngu “entaama” ez’omu nfumu ya Yesu ey’omuri Matayo 25:31-46 hamwe ‘n’entaama ezindi’ ezi yaagambireho omuri Yohaana 10:16 n’abantu abaine omugisha gw’okutuura omu nsi ebiro byona. Omuri 1931, abo abarikugambwaho omuri Ezekieli 9:1-11 nk’abarikuteebwaho akamanyiso aha buso, baketegyerezibwa ngu n’abo abaine amatsiko g’okutuura omu nsi. Reero omuri 1935, kiketegyerezibwa ngu omutwe muhango gw’abantu nibamwe aha ntaama ezindi abu Yesu yaagambireho. Obwa hati, omubaro gwabo niguhika omu bukaikuru.
3. Ahabw’enki ebigambo, ‘beemereire omu maisho g’ekitebe ky’obukama’ bitarikukwata aha b’okuza omu iguru?
3 Omu Okushuuruurwa 7:9, omutwe muhango gw’abantu tibarikureebwa bari omu iguru. ‘Okwemerera kwabo omu maisho g’ekitebe ky’obukama’ ekya Ruhanga tikurikubetengyesa kuba omu iguru. Kureka nibareebwa Ruhanga kwonka. (Zaaburi 11:4) Ekirikuhamya ngu omutwe muhango gw’abantu, “ogu omuntu atarikubaasa kubara” ti b’okuza omu iguru n’okugyeragyeranisa omubaro gwabo ogutarikumanywa n’oguri omu Okushuuruurwa 7:4-8 n’omu Okushuuruurwa 14:1-4. Omu byahandiikirwe ebi, omubaro gw’ab’okuza omu iguru nigworekwa guri 144,000.
4. (a) Omutwe muhango gw’abantu baryakira ‘okubonabona’ kwa muringo ki? (b) Nk’oku kirikworekwa omu Okushuuruurwa 7:11, 12, ni baahi abarikureeba omutwe muhango gw’abantu kandi bakaramya nabo?
4 Okushuuruurwa 7:14 nihagira hati aha mutwe muhango gw’abantu: “Aba nibo baarugire omu kubonabona kwingi.” Nibaraba omu kubonabona okutakabahoga. (Matayo 24:21) Ku bariba nibasiima Ruhanga na Kristo ahabw’okubakiza, ebihangirwe eby’omu iguru byona biryagambira hamwe nabo biti: “Amiina! Ruhanga waitu aheebwe omugisha n’ekitiinisa n’obwengye n’okusiimwa n’okuhimbisibwa n’obushoboorozi n’amaani ebiro n’ebiro, Amiina.”—Okushuuruurwa 7:11, 12.
Okworeka ngu Bahikire Kukira
5. Tukaamanya tuta ekirikwetengwa okubaasa kuba omwe aha b’omutwe muhango gw’abantu?
5 Okurindwa kw’omutwe muhango gw’abantu omu kubonabona kwingi nikubaho okuhikaana n’emitindo ya Yehova ehikire. Emitwarize y’abo abarikuza kuhonaho neeshobororwaho gye omu Baibuli. N’ahabw’ekyo, abakunda okuhikiirira hati baine omugisha gw’okworeka ngu bahikire kukira. N’enki eki bashemereire kukora?
6. Ahabw’enki omutwe muhango gw’abantu barikubaasa kushushanisibwa n’entaama?
6 Entaama n’encureezi kandi nizoorobera abariisa. N’ahabw’ekyo, obu Yesu yaagira ngu akaba aine entaama ezindi abatari bamwe aha b’okuza omu iguru, akaba atarikumanyisa abantu abaakwenzire kutuura omu nsi ebiro byona kwonka, kureka abaakukuratiire n’enyegyesa ze. Akagira ati: “Entaama zangye zihurira eiraka ryangye, naanye nzimanya, nazo zinkuratira.” (Yohaana 10:16, 27) Aba n’abantu buzima abarikworobera ebi Yesu arikugamba, bakahinduka abeegi be.
7. Ni mitwarize ki ei abakuratsi ba Yesu barikwetenga kugira?
7 Ni mitwarize ki endiijo ei buri mukuratsi wa Yesu yaabaire naija kwetenga kugira? Ekigambo kya Ruhanga nikigarukamu kiti: “Mujuure omuntu waanyu owa ira, . . . mujware omuntu ondiijo omusya, owaahangirwe omu nshusha ya Ruhanga omu kuhikiirira n’okwera okw’amazima.” (Abaefeso 4:22-24) Nibagira emitwarize erikwongyera kureeta obumwe omu baheereza ba Ruhanga, niyo egi: “okukunda, okushemererwa, obusingye, okugumisiriza, embabazi, oburungi, obwesigwa, obucureezi, n’okwerinda.”—Abagalatia 5:22, 23.
8. N’enki ekiraahike aha mutwe muhango gw’abantu omu kuhwera entsigarira?
8 Omutwe muhango gw’abantu nibahwera abakye abaine amatsiko g’okuza omu iguru, abarikwebembera omu murimo gw’okubuurira. (Matayo 24:14; 25:40) Ab’entaama ezindi nibahwera n’obu baraabe nibamanya ngu nibaija kuhiiganisibwa ahabw’okugira ngu aha kutandika kw’ebiro ebi eby’emperu, Kristo Yesu na baamaraika be bakabinga Sitaane na baadaimoni be omu iguru. Eki kikamanyisa ngu ‘ensi ekaba neeza kureeba enaku ahabw’okuba omuregi yaabaizira n’ekiniga kingi, ahakuba naamanya ku aine omwanya mukye.’ (Okushuuruurwa 12:7-12) N’ahabw’ekyo, emperu ku erikugyenda neyirira haihi, na Sitaane aguma naayongyera kuhiiganisa abaheereza ba Ruhanga.
9. N’enki ekirikworeka ngu abaheereza ba Ruhanga babaasize kwongyera omu maisho omurimo gw’okubuurira, kandi n’enki ekibabaasiise?
9 N’obu baraabe nibahiiganisibwa munonga, omurimo gw’okubuurira guriyo nigweyongyera omu maisho. Aha muheru gw’Orugamba rw’Ensi Yoona orw’Okubanza, ababuurizi b’Obukama bakaba bari enkumi nkye. Kwonka hati nibahika omu bukaikuru ahakuba Yehova akaraganisa ati: “Tihariho ky’okurwanisa, eki baheesire kukurwanisa, ekirikubaasa.” (Isaaya 54:17) N’omwe aha b’omu ishengyero ry’Abayudaaya akaikiriza ngu omurimo gwa Ruhanga tigurikubaasa kwemerezibwa. Aha bikwatiraine n’abeegi ba Yesu, akagambira Abafarisaayo ab’omu kyasha ky’okubanza ati: “Mubarekye; ahakuba enaama egi nari omurimo ogu ku biraabe biri eby’abantu, biryahwerekyerera; kwonka ku biraabe biri ebya Ruhanga, timuribaasa kubihwerekyereza; mwerinde mutakaareebeka nimurwanisa Ruhanga.”—Ebyakozirwe 5:38, 39.
10. (a) “Akamanyiso” akarikuteebwa aha b’omu mutwe muhango gw’abantu nikamanyisa ki? (b) Abaheereza ba Ruhanga niboorobera bata ‘eiraka eririkuruga omu iguru’?
10 Omutwe muhango gw’abantu niboorekwa nk’abarikuteebwaho akamanyiso. (Ezekieli 9:4-6) “Akamanyiso” ako n’obuhame ngu beehaireyo ahari Yehova, babatiziibwe nk’abeegi ba Yesu, kandi ngu nibateeraho kugira emitwarize nk’eya Kristo. Niboorobera ‘eiraka eririkuruga omu iguru’ eririkugira riti aha bikwatiraine n’ediini z’ebishuba: “Mururugyemu, imwe bantu bangye ’mwe, mutakaakwatanisa narwo omu bibi byarwo, mukaheebwa ekifubiro ky’ebirikwija kurubonabonesa.”—Okushuuruurwa 18:1-5.
11. Ni mu muringo ki ogu ab’omu mutwe muhango gw’abantu barikworekamu ngu n’abaheereza ba Ruhanga?
11 Yesu kandi akagambira abakuratsi be ati: “Ku muriguma nimukundana, nibwo abantu boona baribamanya ku muri abeegi bangye.” (Yohaana 13:35) Obutashushana n’abakuratsi be, abari omu madiini g’ensi egi nibaitanira omu ngamba, emirundi mingi ahabw’okugira ngu ti b’eihanga rimwe! Ekigambo kya Ruhanga nikigira kiti: “Ekyo nikyo kimanyisa abaana ba Ruhanga n’abaana ba Sitaane; weena otakora by’okuhikiirira ti wa Ruhanga, n’obu yaakuba otakunda mwene ishe. . . . Tukundane, turekye kuba nka Kaini owaabaire ari ow’Omubi, akaita omurumuna.”—1 Yohaana 3:10-12.
12. Omu kubonabona kwingi, Yehova naaza kukorera ki ediini eziri ‘nk’emiti’ erikwana ebijuma bijunzire?
12 Yesu akagira ati: ‘Omuti gwona omurungi gwana ebyana birungi, kandi omuti omubi gwana ebyana bibi. Omuti murungi tigubaasa kwana byana bibi, kandi omuti mubi tigubaasa kwana byana birungi. Omuti gwona ogutaana byana birungi gutemwa, gunagwa omu muriro. N’ahabw’ekyo muryabamanyira aha byana byabo.’ (Matayo 7:17-20) Ebikorwa by’ediini z’ensi egi nibizooreka ‘nk’emiti’ ejunzire ei Yehova ari haihi kucwekyereza omu kubonabona kwingi.—Okushuuruurwa 17:16.
13. Omutwe muhango gw’abantu nibooreka bata ngu boona hamwe “bemereire omu maisho g’ekitebe” kya Yehova eky’Obukama?
13 Okushuuruurwa 7:9-15 nihagamba aha bintu ebiribaasisa omutwe muhango gw’abantu kukira. Nibagambwaho ‘nk’abeemereire omu maisho g’ekitebe kya Yehova eky’obukama,’ barikushagika obutegyeki bwe. ‘Boogize ebijwaro byabo omu shagama y’Omwana gw’entaama byayera,’ amakuru ngu nibaikiriza ekitambo kya Yesu ekiihaho ebibi. (Yohaana 1:29) Beehaireyo ahari Ruhanga kandi baakyoreka barikubatizibwa omu maizi. Okwozya ebijwaro bikeera nikyoreka ngu omu maisho ga Ruhanga, baine omutima ogutarikweshinja, kandi ‘nibamuheereza nyomushana na nyekiro.’ Hariho oku waakwongyera kuhikaanisa amagara gaawe n’ebyagambwaho?
Emigisha ei Barikutunga Hati
14. Emwe aha migisha y’omutaano ei abaheereza ba Yehova barikutunga hati n’eha?
14 Noobaasa kuba waareebire emigisha ei abo abarikuheereza Yehova barikutunga. Nk’eky’okureeberaho, ku waayegire aha bigyendererwa bya Yehova, waayetegyereza ngu ebiro by’omu maisho nibiza kuba birungi. Mbwenu hati amagara gaawe gaine ekigyendererwa ekya buzima, eky’okuheereza Ruhanga ow’amazima oine amatsiko g’amagara agatahwaho omuri paradiso. Buzima, Omugabe Yesu Kristo ‘aryayebembera [omutwe muhango gw’abantu] abahitsye aha nshuro z’amaizi g’amagara.’—Okushuuruurwa 7:17.
15. Abajurizi ba Yehova nibagasirwa bata ku barikuhamira aha misingye ya Baibuli omu mitwarize n’aha bikwatiraine n’eby’obutegyeki?
15 Ekindi eki omutwe muhango gw’abantu baine ni rukundo n’obumwe ebirikushangwa omu baheereza ba Yehova boona omu nsi. Obu twena turikurya ebyokurya bimwe by’omwoyo, twena nitworobera ebiragiro n’emisingye emwe ey’omu Kigambo kya Ruhanga. Egyo niyo nshonga ahabw’enki eby’obutegyeki bitarikututaanisa. Ekindi, nituhamira aha micwe mirungi ei Ruhanga arikwenza abantu be. (1 Abakorinso 6:9-11) N’ahabw’ekyo, omu mwanya gw’okuhondana, kwebaganisamu, n’okugira emicwe mibi ekanyire omu nsi, abantu ba Yehova bari omu paradiso ey’omwoyo. Yetegyereze oku eki kirikugambwaho omuri Isaaya 65:13, 14.
16. N’obu omutwe muhango gw’abantu baraabe nibahikwaho oburemeezi, baine matsiko ki?
16 Abaheereza ba Yehova tibahikiriire. Nibahikwaho oburemeezi oburikuhika aha bandi bantu omu nsi egi nk’okunyangarara ahabw’engamba z’amahanga. Ekindi nibarwara, babonabona kandi bafa. Kwonka baine okwikiriza ngu omu nsi ensya, Ruhanga “aryaragaza amarira goona aha maisho gaabo; tiharibaho kufa bundi, n’obu kwakuba okucura nari okurira nari obusaasi, ahakuba ebya ira biryaba bihweireho.”—Okushuuruurwa 21:4.
17. Abarikuramya Ruhanga omwe ow’amazima baine matsiko ki aha biro by’omu maisho n’obu baakufa hati?
17 N’obu waakufa ahabwa bukuru, endwara, butandu, nari ahabw’okuhiiganisibwa, Yehova naija kukuzoora otuure omu Paradiso. (Ebyakozirwe 24:15) Obwo oryayeyongyera kurya eby’omwoyo omu Butegyeki bwa Kristo obw’Emyaka Rukumi. Rukundo yaawe ahari Ruhanga neeza kweyongyera nk’oku oraagyende nooreeba ebigyendererwa bye birikuhikiirira. Kandi ebi Ruhanga arikuha biryayongyera ahari rukundo ei omwiniire. (Isaaya 25:6-9) Ebiro by’abantu ba Ruhanga eby’omu maisho ka nibirungi!
Eby’Okweijutsya
• N’enki eki Baibuli erikukwatanisa n’omutwe muhango gw’abantu?
• Ku turaabe buzima nitwenda kuba bamwe aha mutwe muhango gw’abantu abarikusiimwa Ruhanga, n’enki eki twine kukora hati?
• Emigisha ei omutwe muhango gw’abantu barikutunga hati n’ei baraije kutunga omu nsi ya Ruhanga ensya, ni mikuru eta ahariiwe?
[Ekishushani ekiri aha rupapura 123]
Omutwe muhango gw’abantu nibaramya Ruhanga ow’amazima omu bumwe