Butoosha Nooba Nooyenda obe ow’Okubanza?

HAINE ou orikumanya orikuba naayenda kuba ow’okubanza butoosha?— Naabaasa kutsindika mugyenzi we kugira ngu abe niwe yaaba ow’okubanza omu runyiriri. Ekyo oraareebire nikibaho?— Omwegyesa Mukuru akareeba n’abakuzire barikwenda ngu batungye emyanya y’ekitiinisa nari ey’okubanza. Kandi tikiramushemeize. Ka tureebe ekyabaireho.

Baibuli neegira ngu Yesu akeetwa aha bugyenyi omu ka y’Omufarisaayo, owaabaire ari omwebembezi w’ediini mukuru. Yesu ku yaahikire aha bugyenyi, yaareeba abagyenyi abandi barikwija barikutoorana emyanya emirungi. N’ahabw’ekyo akatebeza abo abaabaire baizire aha bugyenyi ekitebyo. Nooyenda kumanya eki yaabatebiize?—

Yesu akagira ati: “Omuntu ku arikweta aha bugyenyi bw’okushwera, otarishutama omu mwanya gw’ekitiinisa.” Noomanya ahabw’enki Yesu yaagizire atyo?— Akagira ngu obundi omuntu ondiijo orikukukiza ekitiinisa naabaasa kuba ayetsirwe. Nk’oku orikureeba omu kishushani, mukama w’obugyenyi yaija ariyo naagira ati: ‘Heereza ogu omwanya, reero iwe oze kuriya enyima.’ Omugyenyi ogwo naabaasa kuhurira ata?— Naija kuhemuka ahabw’okuba abagyenyi abandi boona nibaija kumureeba arikuza omu mwanya ogutari gw’ekitiinisa.

Yesu akaba naayoreka ngu tikihikire okwenda omwanya gw’ekitiinisa. N’ahabw’ekyo akagira ati: ‘Ku oryetwa aha bugyenyi, ogyende oshutame omu mwanya gw’enyima y’endiijo yoona, okwetsire ku araije, naabaasa kukugira ati: Munywani wangye, irira omumaisho; obwo oryagira ekitiinisa omu maisho g’abagyenyi abandi obwo waaba oriyo nooza kushutama omu mwanya gw’ekitiinisa.’​—Luka 14:1, 7-11.

Waayetegyereza amakuru g’ebi Yesu yaatebize?— Ka nkuhe eky’okureeberaho kureeba yaaba waayetegyereza. Ka tugire ngu oriyo nooza kutemba baasi kwonka hariho abantu baingi abarikwenda kutemba. Noija kurahukiiriza kushutama reero orekye omuntu mukuru kuguma ayemereire?— Wakora ekyo noogira ngu nikiija kushemeza Yesu?—

Omuntu naabaasa kugira ngu Yesu tarikufayo ahari kyona eki turikukora. Kwonka shi ekyo nokiikiriza?— Obu Yesu yaabaire ari aha Bugyenyi buhango omu nju y’Omufarisaayo, akareeba abantu barikutoorana emyanya y’okushutamamu. Noogira ngu na hati tarikufayo aha bi turikukora?— Hati obu Yesu ari omu iguru, buzima naareeba gye ebi turikukora.

Omuntu yaateeraho kuba ow’okubanza, ekyo nikibaasa kurugamu oburemeezi. Obutoosha nihakira kubaho empaka, kandi abantu bagira ekiniga. Eki obumwe nikyo kirikubaho abaana ku barikuba nibaza omu baasi haine ei barikuza. Ahonaaho enyigi za baasi ku barikuziigura, abaana nibataahamu kutangatangana emyanya. Nibaba nibenda emyanya mirungi, eri haihi n’amadirisa. Niki ekirikubaasa kubaho?— Nibabaasa kutandika kugirirana ekiniga.

Okwenda kuba ow’okubanza nikibaasa kureetaho oburemeezi bwingi. Kandi kikareeta oburemeezi n’ahagati y’entumwa za Yesu. Nk’oku twegire omu Shuura 6 ey’ekitabo eki, hakabaho empaka ahagati yaabo barikuhakana ngu n’oha omukuru omuribo. Mbwenu shi Yesu akakora ki?— Buzima, akabahabura. Kwonka bwanyima bakaija baagaruka baateera empaka. Ka tureebe oku baatandikire.

Entumwa bari hamwe n’abandi, bakaba nibagyenda na Yesu omurundi gw’aha muheru barikuza omu rurembo Yerusaalemu. Yesu akaba yaaheza kubagambira aha by’Obukama bwe, reero Yakobo na Yohaana baatandika kuteekateeka aha ky’okutegyeka nawe nk’abagabe. Kandi bakakigambira na nyinabo Saalome. (Matayo 27:56; Mako 15:40) N’ahabw’ekyo ku baabaire bari omu muhanda nibaza Yerusaalemu, Saalome yaija ahari Yesu yaatsimba amaju yaagira eki yaamushaba.

Yesu yaamubuuza ati: “Nooyenda ki?” Yaagarukamu ngu akaayenzire Yesu aikirize abatabani bashutame nawe omu Bukama bwe, omwe aha rubaju rwa buryo n’ondiijo aha rwa bumosho. Entumwa ezindi ikumi ku baamanyire eki Yakobo na Yohaana baagambiire nyinabo kushaba Yesu, nooteekateeka ngu bakahurira bata?—

Buzima, bakagirira Yakobo na Yohaana ekiniga. N’ahabw’ekyo Yesu akaha entumwa ze zoona obuhabuzi burungi. Yesu akabagira ngu abeebembezi b’amahanga nibakunda munonga kuba bakuru n’okuheebwa ebitiinisa. Nibenda kugira emyanya y’ahaiguru kugira ngu buri omwe aboorobere. Kwonka Yesu akagambira abakuratsi be ngu tibaine kuba batyo. Kureka Yesu akabagira ati: ‘Orikwenda kuba ow’okubanza omuriimwe ashemereire kuba omuhuuku waanyu.’ Teekateeka ahari ekyo!​—Matayo 20:20-28.

Noomanya eki omuhuuku akora?— Naaheereza abandi, atarikuteekateeka ngu abandi nibaija kumuheereza. Naatwara omwanya gw’ahansi, beitu gutari ogw’ekitiinisa. Naatwaza nk’ori ow’ahansi munonga, beitu nk’otari w’ekitiinisa. Kandi ijuka, Yesu akagira ngu orikwenda kuba ow’okubanza ashemereire kutwaza nk’omuhuuku aha bandi.

Mbwenu, nooteekateeka ngu ekyo nikimanyisa ki ahariitwe?— Omuhuuku naabaasa kuhakanira omwanya gw’ekitiinisa na mukama we? Nari naabaasa kuhakana ngu we na mukama we n’oha oraabanze kurya? Nooteekateeka ki ahari ekyo?— Yesu akashoboorora ngu omuhuuku butoosha naayebembeza ebyetengo bya mukama we okukira ebye.​—Luka 17:7-10.

Mbwenu omu mwanya gw’okuteeraho kuba ab’okubanza, twine kukora ki?— Tushemereire kuba nk’abahuuku aha bandi. Kandi ekyo nikimanyisa okwebembeza ebya bagyenzi baitu okukira ebyaitu. Nikimanyisa okutwara abandi nk’abari ab’ekitiinisa okutukira. Noobaasa kuteekateeka emiringo ei orikubaasa kworekyeramu ngu abandi nibakukira?— Ahabw’enki otarikuza aha rupapura 40 na 41 okagaruka okareeba emwe aha miringo ei orikubaasa kutwara abandi nk’abarikukukira orikubaheereza.

Noija kwijuka ngu Omwegyesa Mukuru akeebembeza eby’abandi arikubaheereza. Akanabisa n’entumwa ze ebigyere, ekiro eki yaahererukireyo kuba nabo. Naitwe twayebembeza eby’abandi turikubaheereza, nitwija kuba nitushemeza Omwegyesa Mukuru hamwe n’Ishe Yehova Ruhanga.