Otarihinduka Omushuma

HAINE orakwibireho ekintu?— Okahuurira ota?— Owaakiibire akaba ari omushuma kandi tihariho orikukunda omushuma. Noogira ngu omuntu naahinduka ata omushuma? Naazaarwa ari omushuma?—

Twegire ngu abantu nibazaarwa n’ekibi. N’ahabw’ekyo twena turi abatahikiriire. Kwonka tihariho muntu orikuzaarwa ari omushuma. Omushuma naabaasa kuruga omu ka y’abantu abaine emicwe mirungi. Abazaire be, beene ishe, na banyaanya nibabaasa kuba bari abeesigwa. Kwonka ebyetengo by’omuntu nk’okukunda esente n’ebi esente zirikubaasa kugura nibibaasa kumureetera kuba omushuma.

Nooteekateeka n’oha owaabaire omushuma w’okubanza?— Ka tukiteekateekyeho. Omwegyesa Mukuru obu yaabaire akiri omu iguru akaba naamumanya. Omushuma ogwo akaba ari maraika. Kwonka Ruhanga ku araabe yaahangire baamaraika boona bahikiriire, maraika ogwo akahinduka ata omushuma?— Nk’oku twayegire omu Shuura 8 ey’ekitabo eki, akeetenga ekintu ekyabaire kitari kye. Noijuka eki yaayetengire?—

Ruhanga ku yaaherize kuhanga omushaija n’omukazi ab’okubanza, maraika ogwo akenda ngu bamuramye. Bakaba batashemereire kumuramya. Bakaba baine kuramya Ruhanga wenka. Kwonka akaiba okuramya oku baabaire bashemereire kuha Ruhanga. Ahabw’okureetera Adamu na Haawa kumuramya, maraika ogwo akahinduka omushuma. Akahinduka Sitaane Omuregi.

Niki ekirikureetera omuntu kuba omushuma?— N’okwetenga ekintu ekitari kye. Ekyetengo ekyo nikibaasa kuba eky’amaani kandi kireetere abantu barungi kukora ebintu bibi. Obumwe, abantu abo abarikuhinduka abashuma nibanga kweteisa kugaruka kukora ebirungi. Omwe aharibo akaba ari entumwa ya Yesu. Eiziina rye akaba ari Yuda Iskaryota.

Yuda akaba naamanya ngu kikaba kitahikire okwiba ahabw’okuba akaba ayeegyesiibwe Ekiragiro kya Ruhanga okuruga omu buto. Akaba naamanya ngu Ruhanga omurundi gumwe akeema omu iguru yaagambira abantu be ati: ‘Mutariiba.’ (Okuruga 20:15) Yuda ku yaakuzire, akabugana Omwegyesa Mukuru reero yaahinduka omwe aha beegi be. Bwanyima, Yesu akatoorana Yuda kuba omwe aha ntumwa ze 12.

Yesu hamwe n’entumwa ze bakaba bagyenda hamwe. Bakaba barya hamwe eby’okurya. Kandi esente ezi baabaire baine zikaba nizibiikwa omu kabokisi. Yesu akakwatsa Yuda akabokisi ako kuguma naakabiika. Kwonka esente zikaba zitari za Yuda. Kwonka noomanya eki Yuda yaakozire bwanyima?—

Yuda akatandika kwiha sente omu kabokisi ako kandi ekyo n’ekintu eki yaabaire atashemereire kukora. Akaba aziihamu abandi batarikumureeba, kandi obumwe akaba ateeraho kusherura n’ezindi nyingi. Akatandika kuteekateeka aha sente obwire bwona. Ka tureebe eki ekyetengo ekyo kyamureeteire kukora, obu Omwegyesa Mukuru yaabaire atakaitsirwe.

Mariamu, munyaanya Laazaaro owaabaire ari munywani wa Yesu, akatwara amajuta g’omugaju reero yaagasiiga aha bigyere bya Yesu. Kwonka Yuda akeetomboita. Noomanya ahabw’enki?— Akagira ngu amajuta ago gakaba gashemereire kuguzibwa reero esente ziheebwe abooro. Kwonka buzima eki yaabaire naayenda n’okutunga esente nyingi omu kabokisi kugira ngu abaase kuziiba.—Yohaana 12:1-6.

Yesu akagambira Yuda okutateganisa Mariamu, owaabaire aine embabazi. Ekyo tikirashemeize Yuda, n’ahabw’ekyo akaza ow’abanyamurwa abakuru abaabaire bari abazigu ba Yesu. Bakaba nibenda kukwata Yesu, kwonka bakaba nibenda kukikora omu kiro abantu batarikubareeba.

Yuda akagambira abanyamurwa ati: ‘Niinyija kubagambira oku murikubaasa kukwata Yesu mwampa esente. Nimwija kumpa sente zingahi?’

Abanyamurwa bakamugira bati: ‘Nitwija kukuha ebicweka by’efeeza makumi ashatu.’​—Matayo 26:14-16.

Yuda akatwara esente ezo. Akaba ari nk’orikuguza abashaija abo Omwegyesa Mukuru. Teekateeka omuntu kukora ekintu kibi nk’ekyo! Kwonka ekyo nikyo kirikubaho omuntu yaahinduka omushuma kandi akaiba esente. Naaba naakunda esente okukira oku arikukunda abantu na Ruhanga.

Obundi noobaasa kugira oti: ‘Tindikubaasa kukunda ekintu kyona okukira oku ndikukunda Yehova Ruhanga.’ Ni kirungi okureeba ngu nooteekateeka otyo. Obu Yesu yaatoorana Yuda kuba entumwa, noobaasa kushanga ngu Yuda nikwo yaabaire naateekateeka. Abandi abaahindukire abashuma, omu kubanza nibabaasa kuba baabaire nibateekateeka batyo. Ka tureebe bamwe aharibo.

Omwe aharibo akaba ari omuheereza wa Ruhanga orikwetwa Akani, owaabaire ariho Omwegyesa Mukuru atakazairwe. Akani akareeba omwenda murungi, ezaabu, hamwe n’ebicweka by’efeeza. Bikaba bitari bye. Baibuli neegira ngu bikaba biri ebya Yehova ahabw’okuba bikaba bihiirwe aha bazigu b’abantu ba Ruhanga. Kwonka Akani akabyetenga munonga yaahika n’aha kubiiba.​—Yoshua 6:19; 7:11, 20-22.

Eki n’eky’okureeberaho ekindi. Ira, Yehova akatoorana Daudi kuba omugabe w’abantu ba Israeli. Eizooba rimwe, Daudi akatandika kureeba omukazi murungi Batisheba. Akaguma naareeba Batisheba kandi arikuteekateeka aha ku aramutware omuka akaguma nawe. Kwonka omukazi ogwo akaba ari muka Uriya. Niki eki Daudi yaabaire aine kukora?—

Daudi akaba aine kureekyeraho kuteekateeka aha kutwara Batisheba. Kwonka ekyo tikyo yaakozire. Daudi akatwara omukazi ogwo omu ka ye. Yaahika aha kwitisa Uriya. Ahabw’enki Daudi yaakozire ebintu bibi ebyo?— Ahabw’okuba akaguma naayetenga omukazi w’abandi.​—2 Samueli 11:2-27.

Kwonka ahabw’okugira ngu Daudi akeeteisa, Yehova akamureekaho. Okuruga obwo Daudi akagira oburemeezi bwingi. Omutabani Abusalomu akenda kutwara obugabe bwe. N’ahabw’ekyo abantu ku baabaire baija kureeba Daudi, Abusalomu akaba abagwa omu kifuba abanywegyera. Baibuli neegira eti: ‘Abusalomu yaiba emitima y’Abaisraeli.’ Akabeihabeiha abantu abo arikwenda ngu bamuhindure omugabe omu mwanya gwa Daudi.​—2 Samueli 15:1-12.

Orayetengire ekintu munonga, nka Akani, Daudi nari Abusalomu?— Ekintu ekyo kyaba kiri eky’omuntu ondiijo, okukitwara atakwikiriize nikuba kuri okwiba. Noijuka eki omushuma w’okubanza Sitaane yaabaire naayenda?— Akaba naayenda ngu abantu bamuramye omu mwanya gw’okuramya Ruhanga. N’ahabw’ekyo Sitaane akaiba obu yaabeihabeiha Adamu na Haawa kumworobera.

Omuntu yaaba aine ekintu, naaba aine obugabe kukiha ou arikwenda. Nk’eky’okureeberaho, noobaasa kuza kuzaana n’abaana abandi omu nju yaabo. Mbwenu nikiba kihikire okwiha ekintu omu nju egyo okakitwara owaanyu?— Nikiba kitahikire okwihaho ishe nari nyina abaana abo yaakugira ngu noobaasa kukitwara. Kwonka waatwara ekintu otakishabire, okwo nikuba kuri okwiba.

Ahabw’enki orikubaasa kwohibwa kwiba?— N’ahabw’okwetenga ekintu kitari kyawe. Omuntu ondiijo n’obu yaakuba atakureebire orikukitwara, n’oha orikukureeba?— Ni Yehova Ruhanga. Twine kwijuka ngu Ruhanga naayanga okwiba. N’ahabw’ekyo rukundo ei oiniire Ruhanga hamwe n’abataahi neija kukuhwera kwetantara okuba omushuma.