Enshonga Ahabw’Enki Tushemereire Kukunda Yesu

TEERA akashushani ori omu bwato oburiyo nibutobera. Okaayenzire omuntu akujune?— Mbwenu shi omuntu ku yaakwehayo kukujuna?— Ekyo nikyo Yesu Kristo yaakozire. Nk’oku twegire omu Shuura 37, akahayo amagara ge nk’ekitambo ngu tubaase kujunwa.

Yesu tarikutujuna ngu tutatobera omu maizi. Noijuka eki arikutujuna?— Naatujuna ekibi n’okufa ebi twena twahungwiire kuruga ahari Adamu. N’obu abantu bamwe baraabe bakozire ebintu bibi munonga, nabo Yesu akabafeera. Okaata amagara gaawe omu kabi orikuteeraho kujuna abantu nk’abo?—

Baibuli neegira eti: “Kigumire omuntu kufeera ohikiriire; nangwa, shana akaayemera kufeera ow’emicwe mirungi.” Kwonka, Baibuli neeshoboorora ngu Yesu ‘akafeera abatarikutiina Ruhanga.’ Ekyo nikitwariramu abantu abatarikuheereza Ruhanga. Baibuli neegaruka egira eti: “Ahakuba ku twabaire tukiri abanyabibi [tukiri kukora ebintu bibi], Kristo yaatufeera.”​—Abarooma 5:6-8.

Noomanya omwe aha ntumwa owaabaire araakozireho ebintu bibi munonga?— Akahandiika ati: ‘Kristo Yesu akaija omu nsi kujuna abasiisi kandi omuri abo niinye w’okubanza.’ Entumwa owaagambire ebyo ni Paulo. Akagira ngu ira akaba ari ‘omushema’ kandi ngu akaba agumiizemu arikugyendera ‘omu bubi.’​—1 Timoseo 1:15; Tito 3:3.

Teekateeka ahari rukundo ei Ruhanga yaabaire aine oku yaabaire neingana okwohereza Omwana we okufeera abantu nk’abo abaakozire ebibi! Ahabw’enki otarikukwata Baibuli yaawe okashoma ahari eki omuri Yohaana eshuura 3, orunyiriri 16. Nihagira hati: “Ahakuba oku nikwo Ruhanga yaakunzire atyo ensi [nibo bantu abarikutuura omu nsi] akahayo omwana we omwe nyamunegyere, ngu omuntu weena orikumwikiriza arekye kuhwerekyerera, kureka atungye amagara agatahwaho.”

Yesu akooreka ngu akaba atwiniire rukundo nk’ei Ishe yaabaire aine. Noobaasa kuba noijuka ngu omu Shuura ya 30 y’ekitabo eki, tukashoma aha ku Yesu yaabonabonesiibwe aha kiro eki yakwatiirweho. Akatwarwa omu ka y’Omunyamurwa Omukuru Kayaafa, ahu yagyeziibwe. Bakareeta Abajurizi b’ebishuba abaagambire ebishuba ahari Yesu, kandi abantu baamuteera entomi. Obwo nibwo Petero yaayehakana ku atarikumanya Yesu. Hati ka tweshushanirize ngu turiyo kandi nitubaasa kureeba ebindi ebiriyo nibibaho.

Bwasheesha. Yesu araire atagwejegyeire ekiro kyona. Ahabw’okuba okuhozesibwa okw’ekiro kubaire kutahikire omu biragiro, abanyamurwa ahonaaho baayeta ab’omu Ishengyero, nari kooti nkuru y’Abayudaaya, baagaruka kumuhozesa ogundi murundi. Kandi baagaruka baayomesereza ngu Yesu aine orubanja ahari Ruhanga.

Ekyakuratsireho abanyamurwa bakaragiira ngu Yesu akomwe, kandi baamutwara owa Pilaato omutegyeki w’Abarooma. Bakagambira Pilaato bati: ‘Yesu naahakanisa obutegyeki ashemereire kwitwa.’ Kwonka Pilaato akareeba ngu abanyamurwa nibagamba ebishuba. N’ahabw’ekyo Pilaato yaabagira ati: ‘Tindikureeba rubanja aha mushaija ogu, ninyija kumurekura agyende.’ Kwonka abanyamurwa n’abandi baagambira ahaiguru bati: ‘Ngaaha aitwe.’

Bwanyima, Pilaato omurundi ogundi yaateeraho kugambira abantu ngu yaaza kurekura Yesu agyende. Kwonka abanyamurwa bakareetera abantu kugambira ahaiguru bati: ‘Ku oraamurekure akagyenda, naiwe nooba noohakanisa obutegyeki, mwite.’ Abantu baagambira ahaiguru munonga. Noomanya eki Pilaato yaakozire?—

Akaikiriza ebi abantu baamugambiire. Eky’okubanza akaragiira ngu Yesu ateerwe. Bwanyima yaamuha abaserukare ngu bamwite. Bakata ekirunga ky’amahwa aha mutwe gwa Yesu kandi baatandika kumushungisa barikwinama omu maisho ge. Bwanyima bakaha Yesu omuti muhango ngu agwekorere, kandi baamutwara aheeru y’orurembo omu Mwanya ogurikwetwa Empanga y’Omutwe, omu Ruheburaayo Gologosa. Omu mwanya ogwo niyo baahanikire Yesu aha muti barikumuteera emisumaari omu ngaro n’omu bigyere. Bwanyima omuti ogwo baagwemereza Yesu yaaguma ahanikirweho. Akaba naajwa eshagama kandi aine obusaasi bwingi munonga.

Yesu tarafiire ahonaaho. Ari aha muti ogwo, Abanyamurwa abakuru bakaguma nibamushungisa. Kandi n’abahinguzi baagira bati: ‘Ku oraabe ori omwana wa Ruhanga, hanuka orugye aha muti.’ Kwonka Yesu akaba naamanya eki Ishe yaamwohereize kukora. Akaba naamanya ngu aine kuhayo amagara ge agahikiriire ngu tubaase kutunga omugisha gw’okutunga amagara agatahwaho. Bwanyima, nka shaaha mwenda ez’eihangwe, Yesu akagamba n’eiraka rihango arikweta Ishe kandi yaafa.​—Matayo 26:36–27:50; Mako 15:1; Luka 22:39–23:46; Yohaana 18:1–19:30.

Yesu ka yaabaire ari ow’omutaano munonga ahari Adamu! Adamu taragiriire Ruhanga rukundo. Akagomera Ruhanga. Naitwe taratugiriire rukundo. Ahabw’okushisha kwe, twena tukazaarwa twine ekibi. Kwonka Yesu akooreka ngu ainiire Ruhanga naitwe rukundo. Butoosha akaba ayorobera Ruhanga. Kandi akahayo amagara ge ngu abaase kwihaho akabi aku Adamu yaaturetsireho.

Noosiima ekintu kirungi munonga eki Yesu yaakozire?— Waashaba Ruhanga, noomusiima ahabw’okutuha Omwana we?— Entumwa Paulo akasiima eki Kristo yaamukoreire. Paulo akagira ngu Omwana wa Ruhanga ‘akankunda yaayehayo ahabwangye.’ (Abagalatia 2:20) Yesu akafeera iwe naanye. Akahayo amagara ge agahikiriire ngu tubaase kutunga amagara agatahwaho. Buzima egyo n’enshonga nkuru ahabw’enki tushemereire kukunda Yesu.

Entumwa Paulo akahandiikira Abakristaayo ab’omu rurembo rwa Korinso ati: ‘Rukundo ya Kristo netureetera kukora.’ Nooteekateeka ngu rukundo ya Kristo eshemereire kutureetera kukora ki?— Yetegyereze eky’okugarukamu kya Paulo: ‘Kristo akafeera boona ngu babaase kubaho ahabwe. Tibashemereire kubaho ahabw’okweshemeza bonka.’—2 Abakorinso 5:14, 15.

Noobaasa kuteekateeka aha miringo ei orikubaasa kworekamu ngu noobaho ahabw’okushemeza Kristo?— Omuringo gumwe n’okugambira abandi ebi omwegireho. Nari teekateeka ahari eki: Noobaasa kuba ori wenka, nyoko nari sho nari omuntu ondiijo weena batarikubaasa kureeba ebi oriyo nookora. Noija kureeba puroguramu z’aha tiivi nari ebintu aha Intaneeti ebi orikumanya ngu tibirikushemeza Yesu?— Ijuka, Yesu hati ahuriire, kandi naabaasa kureeba buri kimwe kyona eki turikukora.

Enshonga endiijo ahabw’enki tushemereire kukunda Yesu n’okugira ngu nitwenda kutooreza Yehova. ‘Tata naankunda,’ nikwo Yesu yaagambire. Noomanya ahabw’enki Yehova naakunda Yesu kandi naitwe ahabw’enki tushemereire kumukunda?— Ahabw’okuba Yesu akaba ayeteekateekire kufa ngu ebi Ruhanga akunda bibaase kukorwa. (Yohaana 10:17) N’ahabw’ekyo ka tukore eki Baibuli erikutugambira: ‘Mutooreze Ruhanga, nk’abaana abarikukundwa. Kandi mugyendere omu kukunda nk’oku Kristo yaabakunzire, akeehayo ahabwanyu.’—Abaefeso 5:1, 2.