Oku Turikubaasa Kushemeza Ruhanga

NITUBAASA kukora ki okubaasa kushemeza Ruhanga? Mbwenu shi haine eki turikubaasa kumuha?— Yehova naagira ati: “Enyamaishwa zoona ez’omu kibira n’ezangye.” Kandi naagira ati: “Efeeza n’ezangye, ezaabu nazo n’ezangye.” (Zaaburi 24:1; 50:10; Hagai 2:8) Kwonka, haine eki turikubaasa kuha Ruhanga. Niki?—

Yehova naatuha obugabe kwecweramu kumuheereza nari kutamuheereza. Tarikutugyema kukora eki arikwenda. Ka tureebe ahabw’enki Ruhanga yaatuhangire n’obugabe kwecweramu kumuheereza nari kutamuheereza.

Noobaasa kuba noomanya rooboti. N’ekyoma ekikozirwe kukora emirimo ei mukama waakyo arikwenda ngu kikore. N’ahabw’ekyo ekyoma ekyo tikirikwecweramu. Yehova akaba naabaasa kutukora atyo nk’ekyoma ekyo arikwenda ngu tukore ebyo byonka ebi arikwenda. Kwonka Ruhanga ekyo tikyo yaakozire. Noomanya ahabw’enki?— Buzima eby’okuzaanisa ebimwe biri nk’ekyoma ekyo. Waimata eipeesha, nibikora ekyo kyonka eki bikoriirwe kukora. Oraareebire eky’okuzaanisa nk’ekyo?— Obwire obwingi abantu nibarahuka kutamwa eby’okuzaanisa nk’ebyo. Ruhanga tarikwenda ngu tube nk’ebyoma ebirikukora ekyo kyonka eki babikoriire. Yehova naayenda ngu tumuheereze ahabw’okugira ngu nitumukunda n’ahabw’okugira ngu nitwenda kumworobera.

Nooteekateeka ngu Tataitwe ow’omu iguru naahurira ata twamworobera twekundiire?— Ninkushaba ongambire, oku orikutwaza nikukwata kuta aha bazaire baawe?— Baibuli neegira ngu omwana omunyabwengye “ashemeza ishe” kandi ngu omwana omushema “agwisa kubi nyina.” (Enfumu 10:1) Waayetegyereza ngu waakora eki nyoko na sho barikukugambira nibashemererwa?— Kwonka shi nibahurira bata ku orikwanga kuborobera?—

Hati ka tuteekateeke ahari Tataitwe ow’omu iguru, Yehova. Natugambira oku turikubaasa kumushemeza. Noobaasa kukwata Baibuli yaawe oshome Enfumu 27:11. Aho Ruhanga naatugambira ati: ‘Mwana wangye, gira obwengye oshemeze omutima gwangye, mbone kugarukamu ogwo otuura naanjuma.’ Noomanya eki okujuma omuntu kirikumanyisa?— Eego, omuntu naabaasa kukujuma arikukushekyerera kandi agire ngu torikubaasa kukora eki orikuba ogambire. Sitaane shi naajuma ata Yehova?— Ka tureebe.

Ijuka, omu Shuura 8 y’ekitabo eki twegire ngu Sitaane naayenda kuba ow’Okubanza kandi naayenda ngu buri omwe amworobere. Sitaane naagira ngu abantu nibaramya Yehova ahabw’okugira ngu naija kubaha amagara agatahwaho. Sitaane akahakanisa Ruhanga obu yaareetera Adamu na Haawa kugomera Yehova. Akagambira Ruhanga ati: ‘Abantu nibakuheereza ahabw’ebi orikubaha. Wampa omugisha, nimbaasa kureetera buri omwe kukwehakana.’

N’eky’amazima, ebigambo nk’ebyo byenyine tibirikushangwa omuri Baibuli. Kwonka ku turikushoma aha birikukwata aha mushaija Yobu, nibyoreka butunu ngu Sitaane akagambira Ruhanga ebigambo ebiri nk’ebyo. Buzima obwesigwa bwa Yobu ekaba eri enshonga nkuru ahari Sitaane na Yehova. Ka tushome omuri Baibuli zaitu, omuri Yobu eshuura 1 na 2, tureebe ekyabaireho.

Yobu eshuura 1 neeyoreka ngu Sitaane akaba ari omu iguru obu baamaraika baija kureeba Yehova. Yehova akabuuza Sitaane ati: “Nooruga hi?” Sitaane yaamugarukamu ngu naaruga kugyendagyenda omu nsi. Kandi Yehova yaamubuuza ati: ‘Ebyo waayetegyereza Yobu, ngu naampereza kandi ngu tarikukora kibi?’​—Yobu 1:6-8.

Sitaane akagira ati: ‘Yobu naakuheereza ahakuba taine buremeezi. Waareka kumurinda n’okumuha omugisha, naija kukwehakana butunu.’ Yehova yaamugira ati: ‘Noobaasa kukora kyona eki orikwenda aha bi atungire, kwonka we Yobu omurekye.’​—Yobu 1:9-12.

Sitaane akakora ki?— Akareetera abantu kwiba ente za Yobu hamwe n’engamira kandi n’abariisa baazo baabaita. Omurabyo gukaita entaama n’abariisa baazo. Bwanyima, abantu bakaija baiba endogoya kandi baita n’abariisa baazo. Ekyahererukire, Sitaane akareeta omuyaga gw’amaani gwateera enju ei abaana ba Yobu ikumi baabaire barimu boona baafa. N’obu ebyo byona biraabe byabaireho, Yobu akaguma naaheereza Yehova.​—Yobu 1:13-22.

Sitaane ku yaizire kureeba Yehova ogundi murundi, Yehova akamugambira ngu Yobu akiri omwesigwa. Sitaane akagira ati: ‘Wandeka nkarwaza omubiri gwe, naija kukwehakana butunu.’ Yehova akaikiriza Sitaane kurwaza Yobu kwonka yaamugira ngu atamwita.

Sitaane akarwaza Yobu ebihuute omubiri gwona. Ebihuute ebyo bikaba nibinuuka kubi hatariho orikwenda ngu amuhikye aha rubaju. N’omukazi we akamugira ati: “Yehakane Ruhanga, ofe!” Abo abaabaire nibeetwara nka banywani ba Yobu bakaija kumutayaayira kwonka baamwongyerera enaku barikugira ngu haine ebibi ebi akozire ebimureeteire kubonabona. N’obu Yobu araabe yaabonabonesiibwe Sitaane, akaguma ari omwesigwa arikuheereza Yehova.​—Yobu 2:1-13; 7:5; 19:13-20.

Nooteekateeka ngu Yehova akahurira ata Yobu ku yaagumire ari omwesigwa?— Yehova akashemererwa ahabw’okuba akaba naabaasa kugambira Sitaane ati: ‘Reeba Yobu naampereza ahakuba naakunda kukikora.’ Noija kuba nka Yobu, ou Yehova arikubaasa kugambaho nk’eky’okureeberaho kworeka ngu Sitaane n’omubeihi?— Buzima, n’omugisha okworeka ngu ebi Sitaane yaagambire ngu naabaasa kwiha abantu aha kuheereza Ruhanga n’ebishuba. Yesu akakireeba nk’omugisha.

Omwegyesa Mukuru tarabaasize kwikiriza Sitaane kumureetera kukora ekibi. Teekateeka aha ku eky’okureeberaho kye kyareeteire Ishe kushemererwa! Yehova akagamba aha Mwana we arikugarukamu Sitaane ati: ‘Omwana wangye agumire ari omwesigwa ahabw’okuba naankunda!’ Teekateeka n’aha kushemererwa oku Yesu yaabaire agira obu yaabaire ashemeza Ishe. Ahabw’okushemererwa okwo, Yesu akagumisiriza yaafeera aha muti.​—Abaheburaayo 12:2.

Nooyenda kuba nk’Omwegyesa waitu Mukuru kandi okashemeza Yehova?— Guma nooyega ebi Yehova arikwenda ngu okore, kandi omushemeze orikubikora.