Enshonga Ahabw’Enki Twine Kukora

NIKI eki orikukunda munonga, okukora nari okuzaana?— Buzima, okuzaana ti kubi. Baibuli neegamba aha bu Yerusaalemu yaabaire ‘eijwire aboojo n’abaishiki barikuzaanira omu nguuto zaayo.’​—Zekaria 8:5.

Omwegyesa Mukuru akaba ashemererwa ku yaabaire areeba abaana barikuzaana. Obu yaabaire atakaizire mu nsi, akagira ati: ‘Nkaba ndi hamwe na [Ruhanga], ndi omukozi mukuru . . . niinyesiimira omu maisho ge buri izooba.’ Yetegyereze ngu Yesu akaba naakora kumwe na Yehova omu iguru. Kandi ari omu iguru akagira ati: ‘Nkunda munonga abantu.’ Buzima, nk’oku tubaire twayegire, Omwegyesa Mukuru akaba naafayo ahari buri omwe, otwariiremu n’abaana.—Enfumu 8:30, 31.

Nooteekateeka ngu obu Yesu yaabaire ari muto akaba azaana?— Naabaasa kuba yaabaire azaana. Kwonka shi ku araabe yaabaire ari “omukozi mukuru” omu iguru, nooteekateeka ngu n’omu nsi akaba akora?— Ari omu nsi, Yesu akeetwa ‘omwana w’omubaizi.’ Kandi akeetwa ‘n’omubaizi.’ Ekyo nikyoreka ki?— Yosefu owaakurize Yesu nk’omwana we, naabaasa kuba niwe yaamwegyeise. N’ahabw’ekyo Yesu nawe akaba omubaizi.​—Matayo 13:55; Mako 6:3.

Yesu akaba omubaizi wa muringo ki?— Ku araabe yaabaire ari omukozi mukuru omu iguru, mbwenu shi taraabaire omubaizi mukuru ari omu nsi?— Kikaba nikyetengyesa omubaizi kukoresa amaani maingi omu bwire obwo. Obundi Yesu naabaasa kuba yaabaire aine kugyenda akatema omuti, akagutemamu empimbi, akazitwara omuka reero empimbi ezo akazikoramu emeeza, entebe n’ebindi bintu.

Nooteekateeka ngu omurimo ogwo gukareetera Yesu okushemererwa?— Okaashemereirwe ku waakukozire emeeza, entebe nungi n’ebindi bintu ebi abantu barikukoresa?— Baibuli neegira ngu ni kirungi omuntu “okushemerererwa emirimo ye.” Okukora nikureeta okushemererwa oku otarikubaasa kutunga omu kuzaana.​—Omubuurizi 3:22.

Buzima, okukora ni kurungi aha biteekateeko byaitu n’emibiri yaitu. Omu mahanga agamwe, abaana baingi nibashutama bareeba tiivi nari bazaana emizaano ahari kompyuta. Nibagomoka munonga bagira amagara mabi kandi buzima nibaba batashemereirwe. Kandi nabwo tibarikureetera bandi kushemererwa. Niki eki twine kukora kubaasa kugira okushemererwa?—

Omu Shuura 17 ey’ekitabo eki tukeega ngu okugaba n’okugira eki twakora kubaasa kuhwera abandi nikireeta okushemererwa. (Ebyakozirwe 20:35) Baibuli neegira ngu Yehova ni ‘Ruhanga w’okushemererwa.’ (1 Timoseo 1:11) Kandi nk’oku turikushoma omu Enfumu, Yesu akaba ‘ayesiimira omu maisho ge buri izooba.’ Ahabw’enki Yesu yaabaire ashemererwa?— Akaha enshonga emwe obu yaagira ati: “Tata naakikora na hati, kandi naanye ninkora.”​—Yohaana 5:17.

Yesu obu yaabaire ari omu nsi, tarakozire nk’omubaizi ebiro by’amagara ge byona. Yehova Ruhanga akaba amwiniire omurimo gw’omutaano ogw’okukora omu nsi. Omurimo ogwo noogumanya?— Yesu akagira ati: “Nshemereire kubuurira ebigambo ebirungi by’obukama bwa Ruhanga . . . ahabw’okuba nikyo naatumiirwe.” (Luka 4:43) Obumwe Yesu ku yaabaire aba naabuurira abantu, bakaba bamwikiriza kandi bakaba bagambira abandi ebintu ebi yaagamba, nk’oku omukazi Omusamaria ou orikureeba omu kishushani yaakozire.—Yohaana 4:7-15, 27-30.

Yesu akahurira ata aha bikwatiraine n’okukora omurimo ogwo? Nooteekateeka ngu akaba naakunda kugukora?— Yesu akagira ati: “Eby’okurya byangye nikwo kukora eki Owantumire akunda n’okuhikiiriza omurimo gwe.” (Yohaana 4:34) Nookunda kurya eby’okurya ebi orikukunda kirikwingana ki?— Ekyo nikyoreka oku Yesu yaabaire naakunda omurimo ogu Ruhanga yaamuhaire kukora.

Ruhanga akatuhanga turikubaasa kutunga okushemererwa omu mirimo ei turikukora. Naagira ngu ekiconco eki yaahaire omuntu ‘n’okushemerererwa ebi arikukora n’obweziriki.’ N’ahabw’ekyo ku orikwega kukora emirimo okiri omwana, noija kutunga okushemererwa omu magara gaawe.​—Omubuurizi 5:19.

Ekyo tikirikumanyisa ngu omwana muto naabaasa kukora omurimo gw’omuntu mukuru, kwonka twena nitubaasa kugira omurimo ogu twakora. Abazaire baawe nibabaasa kuba nibaza kukora buri izooba kutunga esente kugira ngu eka yaanyu ebe n’eby’okurya n’enju y’okutuuramu. Kandi nk’oku orikumanya, hariho emirimo mingi eine kukorwa aha ka kuharinda hakaguma hacumire gye.

Ni murimo ki ogu orikubaasa kukora ogurikugasira eka yoona?— Noobaasa kutereeza ebintu aha meeza mwaba nimuza kurya, kwozya ebintu, kunaga ebisasiro, oboneze ahu orikuraara kandi obiikye n’ebi orikuzaanisa. Bimwe ahari ebyo obundi noobaasa kuba orikubikora. Okukora ebintu nk’ebyo buzima nikigasira eka.

Ka tureebe oku kirikugasira eka. Oshemereire kubiika eby’okuzaanisa waaheza kuzaana. Ahabw’enki ekyo kiri kikuru?— Nikirinda enju eguma ecumire gye kandi kituhwera n’okwetantara butandu. Waaba otarikubiika by’okuzaanisa byawe, eizooba rimwe nyoko naabaasa kwija aine ebintu bingi omu ngaro aribate kimwe aha by’okuzaanisa ebyo. Naabaasa kugwa atungye obuhuta. Nikibaasa n’okumwetengyesa kuza omu irwariro. Mbwenu ekyo t’eky’akabi?— N’ahabw’ekyo ku orikuguma noobiika eby’okuzaanisa byawe, nikigasira eka yoona.

Hariho omurimo ogundi ogu abaana barikubaasa kukora. Nk’eky’okureeberaho, hariho ebi orikwega ah’eishomero. Ah’eishomero nooyega kushoma. Abaana abamwe okushoma nikubashemeza, kwonka abandi nibagira ngu kugumire. N’obu kwakuba nikureebeka nk’okugumire omu kubanza, noija kushemererwa ku oraayege kushoma gye. Waaba noomanya kushoma, hariho ebintu bingi ebirikushemeza ebi orikubaasa kwega. Noija kubaasa kweshomesa ekitabo kya Ruhanga Baibuli. N’ahabw’ekyo ku orikuteeraho kukora gye omu bi orikwega ah’eishomero, nikikugasira, tikwo?—

Hariho abantu abatarikwenda kukora. Noobaasa kuba noomanya omuntu nk’ogwo. Kwonka obu Ruhanga yaatuhangire twine kukora, tushemereire kwega okukunda kukora. Omwegyesa Mukuru akakunda omurimo gwe kwingana ki?— Akaba naagutwara nk’okurya eby’okurya ebi arikukunda. Kwonka shi akaba naagamba ahari murimo ki?— Okugambira abandi ebirikukwata ahari Yehova Ruhanga n’oku barikubaasa kutunga amagara agatahwaho.

Aha hariho ekirikubaasa kukuhwera kukunda kukora. Yebuuze oti, ‘Ahabw’enki omurimo ogu gwine kukorwa?’ Waamanya enshonga ahabw’enki ekintu kiri kikuru, nikikworobera kukikora. Kandi omurimo n’obu gwakuba guri muhango nari mukye, oine kugukora n’obweziriki. Waakora otyo, noobaasa kutunga okushemererwa nk’oku Omwegyesa Mukuru yaatungire.