Eshuura ya Ikumi na Itaano

Okuramya Oku Ruhanga Arikusiima

Ediini zoona nizishemeza Ruhanga?

Nitubaasa kutaanisaho tuta ediini ey’amazima?

Abaramya ba Ruhanga ab’amazima abariho ebiro ebi nibo baahi?

1. Nitugasirwa tuta twaramya Ruhanga omu muringo oguhikire?

YEHOVA RUHANGA naatufaho munonga kandi naayenda ngu tugasirwe obuhabuzi bwe. Ku turaamuramye omu muringo oguhikire, nitwija kugira obusingye kandi nitwija kwekingira oburemeezi bwingi. Kandi nitwija kugira obuhwezi bwe hamwe n’emigisha ye. (Isaaya 48:17) Kwonka hariho ediini nyingi ezirikwegambaho ngu nizeegyesa amazima agarikukwata ahari Ruhanga. Kwonka nizitaana munonga omu bi zirikwegyesa aha ki Ruhanga ari, n’aha bi arikutwenza.

2. Nituhika tuta aha kumanya omuringo oguhikire ogw’okuramyamu Yehova, kandi niky’okureeberaho ki ekirikutuhwera kwetegyereza eki?

² Omuringo oguhikire ogw’okuramya Yehova noogumanya ota? Torikwetenga kubanza kwega aha nyegyesa z’ediini zoona ngu bwanyima ozigyeragyeranise. Eki orikwetenga kyonka n’okwega okamanya eki Baibuli buzima erikwegyesa aha kuramya okw’amazima. Eky’okureeberaho: Ensi enyingi ziine oburemeezi bw’esente z’ebikwangara. Ku waakuheebwa omurimo gw’okushoroora ebikwangara omu sente enungi, okaakikora ota? Nootandika kuteeraho kwijuka oku buri kikwangara kirikushusha? Ngaaha. Kikaaba kiri eky’obwengye okumanya oku esente enungi zirikushusha. Waaheza kumanya oku esente enungi zirikushusha nibwo orikwetegyereza oku ez’ebikwangara zirikushusha. Nikyo kimwe, ku turikwega kutaanisaho ediini ey’amazima, obwo nibwo turikumanya ediini ezo ez’ebishuba.

3. Okurugiirira ahari Yesu, n’enki eki tushemereire kukora ku turaabe nitwenda kusiimwa Ruhanga?

³ Nikikuru ngu turamye Yehova omu muringo ogu arikusiima. Abantu baingi nibagira ngu ediini zoona nizishemeza Ruhanga, kwonka Baibuli yo tikwo erikwegyesa. Tikiine mugasho omuntu okugamba kwonka ngu n’Omukristaayo. Yesu akagira ati: “Omuntu weena orikugira ati: Mukama wangye, Mukama wangye, tiwe aritaaha omu bukama bw’omu iguru, kureka orikukora ebi Tata ow’omu iguru akunda.” N’ahabw’ekyo, okubaasa kusiimwa Ruhanga, tushemereire kwega ebi Ruhanga arikutwenza kandi tukabikora. Abo abatarikukora ebi Ruhanga akunda Yesu akabeeta “abakora eby’obugomi.” (Matayo 7:21-23) Nk’esente z’ebikwangara, n’ediini z’ebishuba tiziine mugasho. Kandi ekibi munonga, ediini ezo n’ez’akabi.

4. Ni makuru ki agari omu bigambo bya Yesu ebirikukwata aha marembo abiri, kandi buri irembo nirihitsya omuntu nkahi?

⁴ Yehova naaheereza buri omwe omu nsi omugisha gw’okutunga amagara agatahwaho. Okubaasa kutunga amagara agatahwaho omu Kibanja kye, nituragiirwa kuramya Ruhanga omu muringo oguhikire kandi tukatwaza amagara gaitu nk’oku arikusiima. Kwonka eky’obusaasi, baingi nibanga kukora ekyo. Nikyo Yesu yaagiriire ati: “Mutaahire omu irembo erifunzire; ahakuba eirembo eririkutaasya omu kucwekyerera rigarami, n’omuhanda gwaryo guba muhango, kandi n’abagutooramu baba baingi; kwonka eirembo eririkutaasya omu magara rifunzire, n’akahanda kaaryo kagumire, n’abakazoora baba bakye.” (Matayo 7:13, 14) Ediini ey’amazima neehitsya omu magara agatahwaho. Ediini ey’ebishuba neetwara omu kucwekyerera. Yehova tarikwenda omuntu weena kucwekyerera. Nikyo arikuheera abantu omugisha gw’okwega ebirikumukwataho. (2 Petero 3:9) N’ahabw’ekyo, omuringo gu turikuramyamu Ruhanga nigubaasa kumanyisa okufa nari okukira.

OKU ORIKUBAASA KUTAANISAHO EDIINI EY’AMAZIMA

5. Nitumanya tuta abo abarikukuratira ediini ey’amazima?

⁵ ‘Omuhanda ogurikuhitsya omu magara’ nigubaasa kuzoorwa guta? Yesu akagira ngu ediini ey’amazima ekaba neija kumanyirwa aha mitwarize y’abo abarikugikuratira. Yesu akagira ati: “Muryabamanyira aha byana byabo. . . . Omuti gwona omurungi gwana ebyana birungi.” (Matayo 7:16, 17) Eki nikimanyisa ngu abo abarikukuratira ediini ey’amazima bakaba nibaija kumanyirwa aha nyikiriza n’aha mitwarize yaabo. N’obu baraabe batahikiriire kandi barikukora enshobi, abaramya ab’amazima nk’ekibiina nibasherura kukora ebi Ruhanga akunda. Ka twetegyereze ebintu mukaaga ebirikutaanisaho abo abarikukuratira ediini ey’amazima.

6, 7. Abaheereza ba Ruhanga ab’amazima nibatwara bata Baibuli, kandi Yesu akataho ky’okureeberaho ki aha bikwatiraine n’eki?

⁶ Abaramya ba Ruhanga nibeegamya enyegyesa zaabo aha kigambo kya Ruhanga. Baibuli yo yonka neegira eti: “Ebyahandiikirwe byona, ebihandiikisiibwe [o]mwoyo wa Ruhanga, biine omugasho gw’okwegyesa omuntu, n’okumuhana, n’okumuhabura, n’okumutendeka omu by’okuhikiirira, ngu omuntu wa Ruhanga abone kuba ohikire buzima, oine byona ebishemereire omurimo gwona omurungi.” (2 Timoseo 3:16, 17) Arikuhandiikira Abakristaayo bataahi be, Paulo akagira ati: “Ku mwahuriire ekigambo ky’engiri ya Ruhanga eki twabagambiire, mwakyakiira; kandi timwakyakiira nk’ekigambo ky’abantu, kureka nk’ekigambo kya Ruhanga.” (1 Abatesalonika 2:13) N’ahabw’ekyo, enyikiriza n’ebikorwa by’ediini ey’amazima tibyegami aha miteekateekyere nari emigyenzo y’abantu. Byegami ahari Baibuli, Ekigambo kya Ruhanga ekihandiikisiibwe omwoyo gwe.

⁷ Yesu Kristo akataho eky’okureeberaho kirungi arikwegamya enyegyesa ze aha Kigambo kya Ruhanga. Omu shaara ye arikushaba Ishe, akagira ati: “Ekigambo kyawe n’amazima.” (Yohaana 17:17) Yesu akaba naikiririza omu Kigambo kya Ruhanga, kandi buri ki yaabaire ayegyesa kikaba kiba nikiikirizana n’Ebyahandiikirwe. Obutoosha Yesu akaba agira ati: “Kikahandiikwa ngu.” (Matayo 4:4, 7, 10) Ekindi, Yesu akaba ajuriza ebyahandiikirwe. Omu muringo nk’ogwo, abaheereza ba Ruhanga ab’amazima tibarikwegyesa ebyabo ahabwabo. Nibaikiriza ngu Baibuli n’Ekigambo kya Ruhanga, n’ahabw’ekyo ebi barikwegyesa nibirugiirira aha bi Baibuli erikugamba.

8. N’enki ekirikutwarirwa omu kuramya Yehova?

⁸ Abo abarikukuratira ediini ey’amazima nibaramya Yehova wenka kandi bamanyisa eiziina rye. Yesu akagira ati: “Oramye [Yehova] Mukama Ruhanga waawe; obe niwe waaheereza wenka.” (Matayo 4:10) Ahabw’enshonga egi, abaheereza ba Ruhanga ab’amazima tibarikuramya ondiijo weena okwihaho Yehova wenka. Okuramya oku nikutwariramu okumanyisa abantu eiziina rya Ruhanga ow’amazima hamwe n’eki ari. Zaaburi 83:18 nirugira ruti: “Bamanye ngu niiwe wenka orikwetwa Yehova, okira boona, kandi otegyeka ensi yoona.” Yesu akataho eky’okureeberaho kirungi omu kuhwera abandi kumanya Ruhanga obu yaagira ati omu kushaba: “Abashaija, abu waampaire omu nsi nkabooreka eiziina ryawe.” (Yohaana 17:6) Nikyo kimwe, n’abaramya ab’amazima ebiro ebi nibeegyesa abandi aha iziina rya Ruhanga, aha bigyendererwa bye n’aha mitwarize ye.

9, 10. Ni mu miringo ki ei Abakristaayo ab’amazima barikworekanamu rukundo?

⁹ Abaheereza ba Ruhanga ab’amazima niboorekana rukundo eya buzima etarimu kweyendeza. Yesu akagira ati: “Ku muriguma nimukundana, nibwo abantu boona baribamanya ku muri abeegi bangye.” (Yohaana 13:35) Abakristaayo aba ira bakaba nibakundana batyo. Rukundo ei Ruhanga arikuturagiira kugira neesingura okweshoroora omu nganda, n’amahanga kandi neekomerana abantu omu ruganda rw’ab’eishe-emwe oruhamire. (Abakolosai 3:14) Abari omu diini z’ebishuba tibaine ruganda rw’ab’eishe-emwe nk’orwo. Ekyo nitukimanya tuta? Nibaitana ahabw’okushoroorana omu mahanga nari enganda. Abakristaayo ab’amazima tibarikukwata by’okurwanisa kwita ab’eishe-emwe bataahi baabo nari omuntu ondiijo weena. Baibuli neegira eti: “Ekyo nikyo kimanyisa abaana ba Ruhanga n’abaana ba Sitaane; weena otakora by’okuhikiirira ti wa Ruhanga, n’obu yaakuba otakunda mwene ishe. . . . Tukundane, turekye kuba nka Kaini owaabaire ari ow’Omubi, akaita omurumuna.”—1 Yohaana 3:10-12; 4:20, 21.

¹⁰ N’eky’amazima ngu okukunda okwa buzima nikukira aha kutaita bandi. Ahabwa rukundo, Abakristaayo ab’amazima nibakoresa obwire, amaani n’ebintu byabo okuhwerahwerana n’okugumyagumyana. (Abaheburaayo 10:24, 25) Nibahwerahwerana omu buremeezi, kandi n’abeesigwa aha bandi. Nibata omu nkora obuhabuzi bwa Baibuli ‘okukora gye abantu boona.’—Abagalatia 6:10.

11. Ahabw’enki nikikuru okwikiriza Yesu Kristo nk’omuhanda gw’okujunwa ogu Ruhanga ataireho?

¹¹ Abakristaayo ab’amazima nibaikiriza Yesu nk’omuhanda ogu Ruhanga arikwejunisa kutujuna. Baibuli neegira eti: “Kandi tihariho ondiijo ou twakuboneramu okujunwa, ahakuba tihariho rindi iziina ahansi y’eiguru eryahairwe abantu, erishemereire kutujuna.” (Ebyakozirwe 4:12) Nk’oku twareebire omu Shuura ya 5, Yesu akahayo amagara ge nk’ekitambo ahabw’abantu abacureezi. (Matayo 20:28) Kandi ekindi, Yesu niwe Mugabe ou Ruhanga ayemekire omu Bukama bw’omu iguru orikwija kutegyeka ensi yoona. Ruhanga naayenda ngu tworobere Yesu kandi tugyendere aha nyegyesa ye ku turaabe nitwenda amagara agatahwaho. Egi niyo nshonga ahabw’enki Baibuli neegira eti: “Orikwikiriza Omwana aine amagara agatahwaho; kwonka otarikworobera Mwana, taribona magara; kureka ekiniga kya Ruhanga kiguma ahariwe.”—Yohaana 3:36.

12. Okutaba kicweka ky’ensi nikitwariramu ki?

¹² Abaramya ab’amazima tibari kicweka ky’ensi. Obu yaabaire naahozesibwa omu maisho ga Pilaato omutegyeki w’Abarooma, Yesu akagira ati: “Obugabe bwangye ti bw’ensi egi.” (Yohaana 18:36) Yaaba nibatuura mu ihanga ki, abakuratsi ba Yesu ab’amazima bari ahansi y’Obukama bwe obw’omu iguru. Ahabw’enshonga egi, nibaguma bataine rubaju omu by’obutegyeki bw’ensi egi. Tibarikwejumba mu rwanju rwayo. Kandi ekindi abaramya ba Yehova tibarikwetaatsya omu bi abandi barikucwamu kukora yaaba kuza omu kibiina ky’eby’obutegyeki, yaaba kwetsimba, nari kuteera akaruuru. N’obu abaramya ba Ruhanga ab’amazima baraabe bataine rubaju omu by’obutegyeki, beitu kwonka niboorobera ebiragiro. Kwonka shi ahabw’enki? N’ahabw’okuba Ekigambo kya Ruhanga nikibaragiira “kworobera abakama abarikutegyeka.” (Abarooma 13:1) Ku harikubaho obutaikiirizana aha bi Ruhanga akunda n’ebi ab’obutegyeki barikutwenza, abaramya ab’amazima nibakuratira eky’okureeberaho ky’abeegi, abaagizire bati: “Tushemereire kworobera Ruhanga okukira abantu.”—Ebyakozirwe 5:29; Mako 12:17.

13. Abakuratsi ba Yesu ab’amazima nibatwara bata Obukama bwa Ruhanga, kandi ekyo nikibareetera kukora ki?

¹³ Abakuratsi ba Yesu ab’amazima nibabuurira ngu Obukama bwa Ruhanga nigo matsiko g’omuntu gonka. Yesu akaragura ati: “Engiri egi ey’obukama eryagambwa omu nsi zoona okuba eky’okuhamya aha mahanga goona; obwo nibwo emperu erihika.” (Matayo 24:14) Omu mwanya gw’okuhiga abantu kwesiga abategyeki okushoborora oburemeezi bwabo, abakuratsi ba Yesu Kristo ab’amazima nibarangirira Obukama bwa Ruhanga nk’amatsiko gonka aha bantu. (Zaaburi 146:3) Yesu akatwegyesa kushaba obutegyeki obuhikiriire obu yaagira ati: “Obukama bwawe bwije; eby’okunda bikorwe omu nsi nk’oku bikorwa omu iguru.” (Matayo 6:10) Ekigambo kya Ruhanga kikaragura ngu Obukama bw’omu iguru ‘buryayatagura obu bugabe bwona [oburiho hati], bubumareho kandi bwo bugumeho ebiro byona.’—Danieli 2:44.

14. Ni kibiina ki ky’ediini eki orikuteekateeka ngu nikihikiiriza ebirikwetengwa omu kuramya okuhikire?

¹⁴ Okurugiirira aha bi twaheza kureeba, yebuuze eki: Ni kibiina ki ky’ediini ekirikwegamya enyegyesa zaakyo ahari Baibuli kandi ekirikumanyisa abantu eiziina rya Yehova? Ni diini ki erikworeka rukundo ei Ruhanga arikuturagiira kworeka, erikworeka okwikiriza omuri Yesu, etari kicweka ky’ensi kandi erikurangirira ngu Obukama bwa Ruhanga nigo matsiko gonka aha bantu? Omu diini zoona eziri omu nsi, neeha erikuhikiiriza ebi?’ Obuhame nibworeka gye ngu n’Abajurizi ba Yehova.—Isaaya 43:10-12.

N’ENKI EKI ORAAKORE?

15. N’enki eki Ruhanga arikutwenza oyihireho eky’okwikiriza kwonka ngu ariho?

¹⁵ Okwikiririza omuri Ruhanga kwonka tikirikumara okubaasa kushemeza Ruhanga. Manya Baibuli neegira ngu na baadaimoni nibaikiriza ngu Ruhanga ariho. (Yakobo 2:19) Kwonka tibarikukora bi Ruhanga akunda kandi Ruhanga tarikubasiima. Okubaasa kusiimwa Ruhanga, tushemereire kuba nitwikiririza omu kubaho Kwe, t’ekyo kyonka. Tushemereire kukora n’ebi akunda. Tushemereire kandi kwecwa aha diini ey’ebishuba tukaza omu kuramya okw’amazima.

16. N’enki eki omuntu ashemereire kukora aha bikwatiraine n’okwejumba omu diini y’ebishuba?

¹⁶ Entumwa Paulo akooreka ngu nituragiirwa kutejwanzya omu kuramya okw’ebishuba. Akahandiika ati: “Mubarugyemu, mubeetaaniseho; nikwo Mukama arikugira; mutarikora aha kintu kyona ekitashemeire; obwo naanye ndyabaakiira.” (2 Abakorinso 6:17; Isaaya 52:11) N’ahabw’ekyo, Abakristaayo ab’amazima nibeetantara ekintu kyona ekiine akakwate n’ediini y’ebishuba.

17, 18. “Babulooni orurembo Orukuru” niki, kandi ahabw’enki kirikikuru ‘okururugamu’?

¹⁷ Baibuli neeyoreka ngu ediini z’ebishuba ez’emiringo yoona n’ekicweka kya “Babulooni orurembo Orukuru.”a (Okushuuruurwa 17:5) Eiziina eri niritwijutsya Babulooni orurembo orwa ira, ei ediini z’ebishuba zaatandikiire bwanyima y’Omwegyemure gw’omu bunaku bwa Noa. Enyegyesa hamwe n’ebikorwa bingi ebirikukira kureebwa omu diini ey’ebishuba bikakomooka omuri Babulooni ira munonga. Nk’eky’okureeberaho, Abababulooni bakaba baramya obushatu nari shi baaruhanga bashatu omuri ruhanga omwe. Ebiro ebi, enyegyesa nkuru omu madiini amaingi n’eya Tiriniiti nari shi Obushatu. Kwonka Baibuli neeyoreka kurungi ngu hariho Ruhanga omwe wenka ow’amazima, niwe Yehova, kandi ngu Yesu Kristo n’Omwana we. (Yohaana 17:3) Abababulooni bakaba baikiriza ngu omuntu aine omwoyo ogutarikufa ogugumizamu kubaho bwanyima y’okufa kw’omubiri ngu kandi niguza omu mwanya gw’okubonaboneramu. Ebiro ebi, enyikiriza y’omwoyo nari omwitsyo ogutarikufa ogurikubonabonera omu muriro ogutaraara neyegyesibwa omu madiini agarikukira obwingi.

¹⁸ Obu endamya y’omuri Babulooni eya ira yaajanjaire omu nsi yoona, Babulooni orurembo Orukuru orw’omu bunaku obu nirumanywa nk’ediini z’ebishuba zoona ez’omu nsi. Kandi Ruhanga akaranga ngu ediini z’ebishuba zoona niziija kucwekyerezibwa kitaraariire. (Okushuuruurwa 18:8) Mbwenu nooreeba ahabw’enki kiri kikuru ngu oyetaanise aha kicweka kyona ekya Babulooni orurembo Orukuru? Yehova Ruhanga naayenda ngu ‘orurugyemu’ jubajuba hakiriyo omwanya.—Okushuuruurwa 18:4.

19. N’enki eki oraije kutunga omu kuheereza Yehova?

¹⁹ Ahabw’okucwamu kwawe kureka kukuratira ediini y’ebishuba, bamwe nibabaasa kucwamu kukwehuzya. Omu kuheereza Yehova ori n’abantu be, noija kutunga ebirikukira aha bi oraije kwefeereza. Nk’abakuratsi ba Yesu aba ira abaarekireho bingi okubaasa kumukuratira, noija kugira ab’eishe-emwe baingi. Noija kuba omwe aha busiriira bw’Abakristaayo abakwiniire rukundo eya buzima. Kandi noija kugira amatsiko g’amagara agatahwaho ‘omu nsi ensya erikwija.’ (Mako 10:28-30) Shana nk’oku obwire buraahingureho, abo abaakwecwireho ahabw’enyikiriza yaawe nibaija kushwijuma ebi Baibuli erikwegyesa bahinduke abaramya ba Yehova.

20. Ebiro by’omu maisho byiniire ki abo abarikukuratira ediini ey’amazima?

²⁰ Baibuli neeyegyesa ngu Ruhanga naaza kucwekyereza obusingye obu obubi reeru bugiibwemu ensi ensya ey’okuhikiirira ahansi y’obutegyeki bw’Obukama. (2 Petero 3:9, 13) Egyo ka neija kuba ensi nungi! Kandi omu nsi ensya ey’okuhikiirira, haryabayo ediini emwe yonka, nikwo kuramya kumwe okuhikire. T’eky’obwengye iwe ahonaaho okukora ekirikwetengyesa okuteerana hamwe n’abaramya ab’amazima?

[Obugambo obw’Ahansi]

EBI BAIBULI ERIKWEGYESA

▪ Hariho ediini emwe yonka ehikire.—Matayo 7:13, 14.

▪ Ediini ehikire neemanyirwa aha nyegyesa n’aha mitwarize y’abagirimu.—Matayo 7:16, 17.

▪ Abajurizi ba Yehova nibaramya omu muringo ogu Ruhanga arikusiima.—Isaaya 43:10.

[Akabokisi/Ekishushani ekiri aha rupapura 147]

ABO ABARIKURAMYA RUHANGA OW’AMAZIMA

▪ nibeegamya enyegyesa zaabo ahari Baibuli

▪ nibaramya Yehova wenka kandi nibamanyisa abantu eiziina rye

▪ nibagirirana rukundo eya buzima

▪ nibaikiriza Yesu nk’omuhanda ogu Ruhanga arikwejunisa kutujuna

▪ tibari kicweka ky’ensi

▪ nibabuurira aha Bukama bwa Ruhanga nk’amatsiko gonka aha bantu

[Ekishushani ekiri aha rupapura 150]

Omu kuheereza Yehova ori hamwe n’abantu be, noija kutunga ebirikukira aha bi orikubaasa kufeerwa byona