Ahabw’Enki omu Nteerane Zaitu Nitujwara Gye?

Omu bishushani ebiri omu katabo aka, oyetegyereize ngu Abajurizi ba Yehova omu nteerane zaabo nibajwara gye? Ahabw’enki nitufayo munonga aha mijwarire yaitu n’endeebeka yaitu?

Okworeka ngu nituha Ruhanga ekitiinisa. N’eky’amazima, endeebeka y’omuntu ey’aharuguru tiyo Ruhanga arikutwara nka kikuru. (1 Samueli 16:7) Kwonka twaba tweteeraine kuramya Ruhanga, nitufayo kujwara gye okworeka ngu nitumuha ekitiinisa n’abaramya bagyenzi baitu. Twaba nituza omu maisho g’omuramuzi omu icwero ry’emanja, nitufayo kureebeka gye ahabw’okumuha ekitiinisa. Nikyo kimwe, twaba nitureebeka gye omu nteerane zaitu, nikyoreka ngu nituha ekitiinisa “Omucwi w’Emanja z’ensi yoona,” Yehova Ruhanga hamwe n’omwanya ogu turikumuramizamu.​—Okutandika 18:25.

Okworeka ngu nitugyendera aha misingye ei turikwega. Baibuli neehiga Abakristaayo kujwara gye “n’okwerinda” ahakuba nikyo kishemereire “abarikutiina Ruhanga.” (1 Timoseo 2:9, 10) Okujwara gye nikimanyisa okwetantara kujwara ebijwaro ebirikuteeza abandi entsibo nari ebirikureeberwamu. Kandi ‘okwerinda’ nikutuhwera kutoorana ebijwaro ebirungi kwonka ebitarikureetera abantu kutushamaarira. Emisingye egi neehwera omuntu kutoorana ebijwaro ebi arikukunda kwonka ebishemeire. Twajwara ebijwaro ebishemeire ‘nitusiimisa enyegyesa ya Ruhanga Omujuni waitu’ kandi ‘nitumuhimbisisa.’ (Tito 2:10; 1 Petero 2:12) Twaba nitujwara gye omu nteerane zaitu, nitubaasa kureetera abandi kukunda kuramya Yehova.

Kwonka otakaaremwa kwija omu nteerane zaitu ahabw’ebijwaro. Nitubaasa kujwara ebijwaro ebishemeire kandi ebicumire gye kwonka ebitari by’esente nyingi.

• Emijwarire yaitu ni mikuru eta omu kuramya Ruhanga?

• Ni misingye ki erikutuhwera kujwara gye n’okureebeka gye?