Abaheereza Baine Bujunaanizibwa Ki omu Kibiina?

Baibuli neegamba aha ‘bareeberezi n’abadiikoni’ nari abaheereza nk’abashaija Abakristaayo abaine obujunaanizibwa omu kibiina. (Abafilipi 1:1) Buri kibiina nikiba kirimu ab’eishe-emwe abashaija abarikuheereza nk’abareeberezi nari abaheereza. Abaheereza nibakora ki ebirikutugasira?

Nibahwera abareeberezi omu kibiina. Abaheereza boona baine omukago murungi na Yehova, n’abeesigwa kandi n’abeeziriki. Abaheereza nibahikiiriza obujunaanizibwa butari bumwe na bumwe omu kibiina, haza ekyo kibaasisa abareeberezi kuta omutima aha kwegyesa n’okugumya abandi omu kibiina.

Obuheereza bwabo nibutugasira. Abaheereza abamwe nibaheebwa obujunaanizibwa bw’okwakiira abantu abarikwija omu nteerane. Abamwe nibahwera aha byoma ebirikuteera ebyeshongoro bikatunguura n’amaraka, aha by’ebitabo, eby’esente z’ekibiina n’okworeka ab’eishe-emwe ebicweka by’okubuuriramu. Kandi nibahwera n’omu kureeberera Ekyombeko ky’Obukama. Abareeberezi nibabaasa kushaba abaheereza kuhwera abakaikwire. Ahabw’okugira ngu abaheereza nibaba beteekateekire kuhikiiriza obujunaanizibwa bwona obu barikuheebwa, nikireetera abandi omu kibiina kubaha ekitiinisa.​—1 Timoseo 3:13.

Nibatuteeraho eky’okureeberaho kirungi. Abaheereza nibatooranwa ahabw’emitwarize yaabo mirungi y’Ekikristaayo. Ku barikwebembera ebicweka ebimwe omu nteerane nibatuhwera kuhamya okwikiriza kwaitu. Eky’okureeberaho kyabo kirungi omu kubuurira, nikituhwera kuba abeeziriki. Ahabw’okugira ngu nibakwatanisa n’abareeberezi, ekibiina nikibamu obusingye n’okushemererwa. (Abaefeso 4:16) Omu bwire bw’omumaisho, nabo nibabaasa kuba abareeberezi.

• Abaheereza omu kibiina baine kuba nibatwaza bata?

• Abaheereza baine bujunaanizibwa ki omu kibiina?