Akakiiko Akareeberezi Nikakora Kata Obunaku Obu?

Omu kyasha ky’okubanza, ‘entumwa n’abakuru’ omuri Yerusaalemu nibo baabaire bari aha kakiiko akareeberezi barikucwamu aha nshonga nkuru ezirikukwata aha Bakristaayo abashukirweho amajuta boona. (Ebyakozirwe 15:2) Ahabw’okushwijuma Ebyahandiikirwe n’okukuratira obuhabuzi bw’omwoyo gurikwera, boona bakaba bacwamu baikirizaine. (Ebyakozirwe 15:25) Obunaku obu nikwo n’Akakiiko Akareeberezi karikukora.

Ruhanga naakakoresa kuhikiiriza ebi akunda. Ab’eishe-emwe abashukirweho amajuta abari aha Kakiiko Akareeberezi, nibakundira kimwe Ekigambo kya Ruhanga kandi nibamanya kucwamu gye oku omurimo gwaitu gwine kukorwa. Nibagira orukiiko buri saabiiti kugamba aha nshonga ezirikukwata aha b’eishe-emwe boona omu nsi. Nk’oku kyabaire kiri omu kyasha ky’okubanza, nibatuha obuhabuzi kuruga omu Baibuli kurabira omu mabaruha, omu bareeberezi abarikutaayaayira ebibiina nari abandi. Eki nikihwera abantu ba Ruhanga kugira obumwe omu bi barikukora. (Ebyakozirwe 16:4, 5) Ab’Akakiiko Akareeberezi nibareeberera omurimo gw’okutebeekanisa eby’okurya eby’omwoyo, omurimo gw’okubuurira hamwe n’ogw’okutoorana ab’eishe-emwe abarikuheebwa obujunaanizibwa.

Nibakuratira obuhabuzi bw’omwoyo gurikwera. Abari aha Kakiiko Akareeberezi nibasherura obuhabuzi ahari Yehova ow’Obushoboorozi Bwona n’ahari Yesu Omutwe gw’ekibiina. (1 Abakorinso 11:3; Abaefeso 5:23) Tibarikwetwara nk’abategyeki b’abantu ba Ruhanga. Abari aha Kakiiko Akareeberezi hamwe n’abashukirweho amajuta boona, ‘nibakuratira omwana gw’entaama [Yesu] ei arikuza yoona.’ (Okushuuruurwa 14:4) Nibashemererwa twabashabira hamwe n’omurimo ogu barikukora.

• Ni baahi abaabaire bari aha kakiiko akareeberezi omu kyasha ky’okubanza?

• Obunaku obu ab’Akakiiko Akareeberezi nibasherura bata obuhabuzi ahari Ruhanga?