Beseeli Nikimanyisa Ki?

Beseeli n’eiziina ry’Oruheburaayo kandi nirimanyisa ‘Enju ya Ruhanga.’ (Okutandika 28:17, 19) Beseeli n’emyanya eyombekirwe ei Abajurizi ba Yehova barikukoresa omu nsi yoona omu kureeberera n’okwebembera omurimo gw’okubuurira. Abari aha Kakiiko Akareeberezi nibaheereza aha ofiisi enkuru ey’Abajurizi ba Yehova omuri New York State, U.S.A., bareeberera omurimo ogurikukorwa aha ofiisi z’amataagi omu nsi yoona. Abo abarikuheereza aha Beseeli nibeetwa ababeseeli. Nk’eka nibatuura kumwe, bakora kumwe, barya kumwe eby’okurya kandi beega hamwe Baibuli.—Zaaburi 133:1.

Ababeseeli nibaba baine omutima gw’okwefeerereza. Aha Beseeli nihaheerezayo ab’eishe-emwe abeehaireyo kukora ebi Ruhanga akunda n’okukoresa obwire bwabo bwingi kushagika emirimo y’Obukama. (Matayo 6:33) Tibarikuheebwa mushaara, kwonka nibaheebwa oburaaro, eby’okurya n’obusente bw’okubahwera. Buri omwe naaba aine ahu arikuheereza, nk’omu ofiisi, omu kiyungu, ahu ebitabo birikuteererwa, okuboneza emyanya y’okuraaramu n’ey’okukoreramu, okwozya emyenda, okureeberera ebyombeko n’ebindi.

Ebirikukorerwayo byona nibishagika omurimo gw’okubuurira. Ekigyendererwa ekikuru ekya buri Beseeli n’okureeba ngu amazima gaahika aha bantu baingi. Akatabo aka ni kamwe ahari ebyo ebirikukorerwa aha Beseeli. Omurimo gw’okukahandiika gukeebemberwa ab’Akakiiko Akareeberezi, baakoherereza abavunuuzi omu nsi yoona barikukoresa kompyuta, bwanyima kaateererwa aha Beseeli ezirikuteera ebitabo reero kayoherezibwa omu bibiina ebirikurenga aha 115,000. Beseeli nizihwera kihango omuri byona ebirikukorwa kushagika omurimo gw’okubuurira amakuru marungi.—Mako 13:10.

• Ni baahi abarikuheereza aha Beseeli kandi nibareebererwa bata?

• Ebirikukorerwa aha buri Beseeli nibishagika murimo ki omukuru?