Ekigyendererwa kya Ruhanga Ahabw’Ensi ni Kiiha?

1. Ahabw’enki Ruhanga yaahangire ensi?

Yehova akahanga ensi kutuurwamu abantu. N’ahabw’ekyo Adamu na Haawa tibarahangirwe kuzaara bakaijuza iguru. Ruhanga akaba yaahangire baamaraika kutuura omu iguru. (Yobu 38:4, 7) Ruhanga akata omuntu w’okubanza omu musiri murungi munonga Edeni. (Okutandika 2:15-17) Yehova akamuha omugisha gw’okutuura omu nsi ebiro byona n’abaijukuru be.​—Shoma Zaaburi 37:29; 115:16.

Omu kubanza, omusiri Edeni nigwo gwonka ogwabaire guri paradiso. Omushaija n’omukazi ab’okubanza n’abaijukuru baabo bakaba nibaija kwijuza ensi. Bakaba nibaija kuhindura ensi yoona paradiso. (Okutandika 1:28) Ensi neija kugumaho erikutuurwamu abantu.​—Shoma Zaaburi 104:5.

2. Ahabw’enki hati ensi etari paradiso?

Adamu na Haawa bakagomera Yehova, yaabaiha omu paradiso. Bakagifeerwa kandi tihaine omuntu orabaasize kugigaruraho. Okuruga obwo ensi etwire eri omu mikono y’ababi.​—Shoma Okutandika 3:23, 24.

Mbwenu shi Yehova aremirwe kuhikiiriza ekigyendererwa kye ahabw’abantu? Ngaaha! N’ow’obushoboorozi bwona tarikubaasa kuremwa. (Isaaya 45:18) Naija kugarura abantu omu mbeera nk’ezi yaabaire naayenda batuuremu.​—Shoma Zaaburi 37:11, 34.

3. Paradiso neija kugarurwaho eta?

Yesu ku araatandike kutegyeka nk’Omugabe omu nsi, paradiso neija kugarurwaho. Omu rugamba orurikwetwa Haramagedoni, naija kwebembera baamaraika ba Ruhanga kucwekyereza abo boona abarikuhakanisa Ruhanga. Naija kukoma Sitaane kumara emyaka 1,000. Abarikworobera Ruhanga bo tibaraacwekyerezibwe ahakuba Yesu naija kubeebembera kandi abarinde. Nibaija kutunga amagara agatahwaho omu nsi ensya.​—Shoma Okushuuruurwa 20:1-3; 21:3, 4.

4. Okubonabona kuryahwaho ryari?

Ni ryari obu Ruhanga araamareho okubonabona omu nsi? Yesu akaha “akamanyiso” akaakworekire ngu emperu eri haihi kuhika. Ebirikubaho omu nsi nibyerarikiriza abantu kandi nibyoreka ngu turi omu ‘biro by’emperu y’ensi egi’ embi.​—Shoma Matayo 24:3, 7-14, 21, 22.

Omu myaka 1,000 Yesu arikutegyeka ensi, naija kumaraho okubonabona kwona. (Isaaya 9:6, 7; 11:9) Oyihireho okuba Omugabe, naija kukora nk’Omunyamurwa Omukuru kandi abarikukunda Ruhanga abasaasire ebibi. N’ahabw’ekyo Ruhanga naija kukoresa Yesu kwihaho endwara, okukaikura n’okufa.​—Shoma Isaaya 25:8; 33:24.

5. Ni baahi abaraatuure omu Paradiso?

Abarikworobera Ruhanga nibaija kutuura omu Paradiso. (1 Yohaana 2:17) Yesu akatuma abakuratsi be kusherura abacureezi n’okubeegyesa ebi baine kukora kubaasa kusiimwa Ruhanga. Omu bunaku obu, Yehova ariyo naayegyesa abantu nyamwingi abaraije kutuura omu Paradiso. (Zefania 2:3) Aha Byombeko by’Obukama eby’Abajurizi ba Yehova, abantu nibeega okuba abazaire barungi n’oku baine kutwarizana gye omu bushwere. Abazaire n’abaana nibaramiza hamwe kandi beega oku barikubaasa kugasirwa omu makuru marungi.​—Shoma Miika 4:1-4.