Rahabu Akaba Naikiririza Omuri Yehova

Ka tweshushanirize ngu tukaba turi omu rurembo Yeriko. Orurembo oru rukaba ruri omuri Kanaani, kandi abantu baayo bakaba batarikuramya Yehova. Omukazi orikwetwa Rahabu akaba naatuura omu rurembo oru.

Rahabu obu yaabaire akiri omwishiki, akahurira ekitebyo ekyabaire nikikwata aha ku Musa yaabaganiisemu Enyanja Erikutukura n’oku yaayebembeire Abaisraeli kuruga Misiri. Akahurira n’oku Yehova yaabahwereire kusingura entaro ezi baabaire nibarwana n’abazigu baabo. Kwonka akamanya ngu Abaisraeli baahikire haihi na Yeriko!

Omwabazyo gumwe, abashaija babiri b’Abaisraeli bakaza Yeriko kutata orurembo. Ku baahikire aha nju ya Rahabu, yaabaakiira kandi yaabaraaza. Omu kiro, omugabe wa Yeriko akamanya ngu abashaija babiri b’Abaisraeli baija omu rurembo kutata kandi ngu baaza omu nju ya Rahabu. Omugabe akoohereza abashaija be kubakwata. Rahabu akashereka abashaija abaabaire bagiire kutata, ahaiguru y’enju ye kandi yaagambira abashaija b’omugabe ati: ‘Baba bari aha kwonka bagyenda, murahukye mubakurate, nimwija kubakwata.’ Noomanya ahabw’enki Rahabu yaasherekire abashaija abaagiire kutata?— N’ahabw’okugira ngu akaba naikiririza omuri Yehova kandi arikumanya ngu naija kuha Abaisraeli ensi ya Kanaani.

Kwonka abashaija abaagiire kutata baatakarugire mu nju ya Rahabu, baakamuraganisa ngu we n’ab’omu nju ye nibaija kurindwa, orurembo Yeriko ku ruracwekyerezibwe. Niki eki baagambiire Rahabu kukora?— Baakamugira bati: ‘Twara omugoye gurikutukura ogu, oguhanikye omu dirisa yaawe. Waakora otyo, buri omwe ori omu nju yaawe naija kurindwa.’ Rahabu akakora nk’oku baamugambiire. Noogira ngu bwanyima hakabaho ki?—

Bwanyima y’ebiro bikye, Abaisraeli bakatandika kwetoorora orurembo. Bakaguma nibeetoorora orurembo kumara ebiro mukaaga, buri izooba barikurwetoorora omurundi gumwe. Kwonka aha kiro kya mushanju, bakeetoorora orurembo emirundi mushanju, reero boona baateera orwari. Yehova yaakumbagaza orugo rw’orurembo. Kwonka enju eyaabaire ekomireho omugoye gurikutukura omu dirisa yaaguma eyemereire. Noorureeba omu kishushani?— Rahabu n’ab’omu nju ye bakahonokaho!

Rahabu noobaasa kumwegaho ki?— Rahabu akaba naikiririza omuri Yehova ahabw’ebintu birungi ebi yaamwegireho. Naiwe oine ebintu bingi kandi birungi ebi orikwega ahari Yehova. Naiwe noikiririza omuri Yehova nka Rahabu?— Buzima nitumanya ngu noomwikiririzamu!