Daudi Akaba Atarikutiina

Waaba otiinire nookora ki?— Noobaasa kuza owa maama nari taata ngu akuhwere. Kwonka hariho ondiijo nawe orikubaasa kukuhwera. Kandi naakiza abandi boona amaani. Noomumanya?— Ni Ruhanga Yehova. Ka twegye ebirikukwata aha mwojo orikugambwaho omu Baibuli orikwetwa Daudi. Akaba naamanya ngu Yehova naija kuguma naamuhwera n’ahabw’ekyo akaba atarikutiina.

Abazaire ba Daudi bakamwegyesa ebirikukwata ahari Yehova kuruga omu buto. Eki kikahwera Daudi kutatiina n’obu yaabaire ahikwaho ebirikutiinisa. Akaba naamanya ngu Yehova ni munywani we kandi ngu naija kumuhwera. Izooba rimwe, Daudi ku yaabaire ariisize entaama, ekicuncu kihango kikaija kyakwataho emwe. Noomanya eki Daudi yaakozire? Akairukanzya ekicuncu yaakikwata yaakiita! Kandi edubu ku yaakwatsire entaama, nayo Daudi akagiita. Nooteekateeka ngu nooha owaahwereire Daudi?— Akaba ari Yehova.

Hariho n’obundi obu Daudi yaayorekire ngu n’emanzi. Abaisraeli bakaba nibarwanisa Abafilistia. Omwe aha baserukare b’Abafilistia akaba ari muraingwa munonga kandi ekikaaka! Eiziina rye ni Goliasi. Omushaija ogu akaba naaganiiza abaserukare b’Abaisraeli hamwe na Yehova. Goliasi akahaya abaserukare b’Abaisraeli kwija kurwana nawe. Kwonka Abaisraeli boona bakatiina kurwana nawe. Daudi ku yaakihuriire, yaagambira Goliasi ati: ‘Ninyija kurwana naiwe. Kandi Yehova naija kumpwera nkusingure!’ Nooteekateeka ngu Daudi akaba aine obumanzi?— Buzima, akaba ari emanzi. Nooyenda kumanya ekyakuratsireho?

Daudi akakwata enjungu ye n’amabaare ataano, atyo yaagyenda kurwana na Goliasi. Goliasi ku yaarebire ngu Daudi ni muto, yaamugaya. Kwonka Daudi akamugira ati: ‘Wampururira na rurara kwonka nyowe naija omu iziina rya Yehova!’ Yaata ibaare omu njungu ye, yairuka nairirira Goliasi, reero yaamurekyera ibaare. Ibaare ryateera Goliasi ahagati y’obuso yaagwa ahansi, yaafa! Abafilistia bakatiina kandi baahunga. Niki ekyahwereire omwojo muto Daudi kusingura Goliasi?— Yehova akamuhwera, kandi Yehova akaba naakiza Goliasi amaani!

Ekitebyo kya Daudi nookyegaho ki?— Yehova naakiza abantu boona amaani. Kandi ni munywani waawe. N’ahabw’ekyo haagira ekyakutiinisa, oijukye ngu Yehova naija kukuhwera kugira obumanzi.