Timoseo Akaba Naakunda Kuhwera Abantu

Timoseo akaba ari omutsigazi owaabaire naakunda kuhwera abantu. Akaba aza omu myanya mingi kuhwera abandi. Ahabw’okuhwera abandi akatunga okushemererwa. Okaayenzire kumanya ebirikumukwataho?—

Timoseo akakurira omu rurembo Lusitura. Obu yaabaire ari muto, nyinenkuru Loisi na nyina, Yunike, bakamwegyesa ebirikukwata ahari Yehova. Ku yaakuzire, akenda kuhwera abandi kwega ebirikukwata ahari Yehova.

Obu Timoseo yaabaire akiri muto, Paulo akamushaba ngu agyende nawe kubuurira omu myanya endiijo. Timoseo akaikiriza, ahabw’okuba akaba amaririire kuza kuhwera abandi.

Timoseo akagyenda na Paulo omu rurembo rw’omuri Makedonia orurikwetwa Tesalonika. Kubaasa kuhika okwo, bakaba baine kubanza bagyenda engyendo ndaingwa reero bakagyendera omu bwato. Ku baahikireyo, bahwera abantu baingi kwega ebirikukwata ahari Yehova. Kwonka abantu abamwe bakagira ekiniga kandi baayenda kwita Timoseo na Paulo. Paulo na Timoseo bakarugayo baaza kubuurira omu myanya endiijo.

Ku haahingwireho ameezi makye, Paulo akashaba Timoseo kugaruka Tesalonika kureeba ab’eishe-emwe. Kikaba nikyetengyesa obumanzi Timoseo kugaruka omu rurembo orwabaire rurimu abantu babi. Kwonka Timoseo akazayo ahakuba akaba naayenda kuhwera ab’eishe-emwe abaabaire bariyo. Akareetera Paulo amakuru marungi. Ab’eishe-emwe b’omuri Tesalonika bakaba nibakora gye.

Timoseo akabuurira na Paulo emyaka mingi. Omurundi gumwe, Paulo akahandiika arikugira ngu Timoseo niwe yaabaire naabaasa kutuma kuhwera ebibiina. Kandi Timoseo akaba naakunda Yehova hamwe n’abantu.

Naiwe nookunda abantu kandi nooyenda kubahwera kwega ebirikukwata ahari Yehova?— Kyaba nikwo kiri, noija kugira okushemererwa nk’oku Timoseo yaabaire aine.