Ba Omwesigwa aha U Ori Nawe omu Bushwere

Yehova naayenda ngu abari omu bushwere barekye kureebyana. (Malaki 2:16) Eki ni kikuru, ahabw’okuba waareebya ou ori nawe omu bushwere nikimureetera kutakwesiga. Obwesigwa nibureetera obushwere kubamu rukundo.

Obunaku obu, abari omu bushwere abamwe tibeesigwa. Kubaasa kurinda obushwere bwawe, oine kumariirira kukora ebintu bibiri.

1 OINE KWEBEMBEZA OBUSHWERE BWAWE

EKI BAIBULI ERIKWEGYESA: Oine kwebembeza ebirikukira obukuru. (Abafilipi 1:10) Obushwere bwawe ni kimwe aha bi oine kutwara nka bikuru. N’ahabw’ekyo, oshemereire kubwebembeza.

Yehova naayenda ngu okunde ou ori nawe omu bushwere kandi oshemererwe nawe. (Omubuurizi 9:9) Yehova naayenda ngu ofeyo aha u ori nawe omu bushwere kandi buri omwe ateereho kushemeza mutaahi we. (1 Abakorinso 10:24) Aine kumanya ngu noomutwara nk’ow’omuhendo kandi ngu noomukunda.

EKI ORIKUBAASA KUKORA:

• Teeraho kugira obwire bw’okugaaniira n’ou ori nawe omu bushwere butoosha kandi omuhurikize

• Omu mwanya gw’okugira ngu “nyowe” yeemanyiize kugira ngu “itwe”

2 RINDA OMUTIMA GWAWE

EKI BAIBULI ERIKWEGYESA: “Orikureeba omukazi akamwetenga, biri aherize kumushambanaho omu mutima gwe.” (Matayo 5:28) Omuntu yaaguma naateekateeka aha birikubaasa kumureetera kushambana, naaba atari mwesigwa aha u ari nawe omu bushwere.

Yehova naayenda ngu ‘orinde omutima gwawe.” (Enfumu 4:23; Yeremia 17:9) Kubaasa kukora eki oine kurinda amaisho gaawe. (Matayo 5:29, 30) Tooreza omuheereza wa Ruhanga owa ira Yobu, owaakozire endagano n’amaisho ge kutareeba ondiijo mukazi akamwetenga. (Yobu 31:1) Mariirira kutareeba ebirikwitsa enshoni. Yetantare kugirira omuntu ou otari nawe omu bushwere rukundo eshemereire kuba einwe abashweraine.

EKI ORIKUBAASA KUKORA:

• Kyorekye butunu ngu omaririire kuguma n’ou ori nawe omu bushwere

• Fayo aha nyehurira z’ou ori nawe omu bushwere, kandi orekyere aho emikago yoona erikumureetera kwerarikirira