Adamu na Haawa Bakagomera Ruhanga

Eizooba rimwe Haawa ku yaabaire ari wenka, enjoka ekagamba nawe. Ekagira eti: ‘N’eky’amazima Ruhanga tarikubaikiriza kurya aha bijuma by’emiti yoona?’ Haawa akagira ati: ‘Nitubaasa kurya aha miti yoona kureka omuti gumwe. Twarya aha bijuma by’omuti ogwo, nitwija kufa.’ Enjoka ekagira eti: ‘Timurikwija kufa. Kureka, nimuza kuba nka Ruhanga.’ Mbwenu shi ekyo kikaba kihikire? Ngaaha, kikaba kiri ekishuba. Kwonka Haawa akakiikiriza. Haawa ku yaagumire naareeba ekijuma ekyo, akoongyera kukikunda. Akakirya kandi yaahaho na Adamu. Adamu akaba naamanya ngu baagomera Ruhanga nibaija kufa. Kwonka nabwo akakirya.

Bwanyima aha izooba eryo, Yehova akagamba na Adamu na Haawa. Yaababuuza ahabw’enki baamugomera. Haawa akeekwatsa enjoka, kandi Adamu akeekwatsa Haawa. Ahabw’okugira ngu Adamu na Haawa bakagomera Yehova, akababinga omu musiri. Ahabw’okugira ngu akaba atarikwenda ngu bagarukyeyo, akataho baamaraika na rurara erikumurinkana kandi erikuhindahinduka embaju zoona kurinda omuhanda ogurikuzayo.

Yehova akagira ngu owaabeihire Haawa nawe akaba naaza kufubirwa. Ekaba etari njoka eyaagambire na Haawa. Yehova tarahangire njoka zirikugamba. Akaba ari maraika omubi owaareebekiise enjoka nk’erikugamba. Akakora eki kutega Haawa. Ogwo maraika naayetwa Sitaane Omuregi. Omu biro by’omumaisho, Yehova naaza kucwekyereza Sitaane kugira ngu atagaruka kureetera abantu kukora ebintu bibi.