Okuzaarwa kw’Omwana w’Omwojo

Abrahamu na Saara bakaba bamazire emyaka mingi omu bushwere. Bakatsigaho eka yaabo nungi omuri Uri baaza kutuura omu eihema. Kwonka Saara taretomboitsire, ahakuba akaba naayesiga Yehova.

Saara akaba naayenda omwana, akagambira Abrahamu ati: ‘Omuzaana wangye Hagari ku yaakuzaara, omwana ogwo naaba ari nk’owangye.’ Ku haahingwireho obwire, Hagari akazaara omwana. Eiziina rye akaba naayetwa Ishimaeli.

Bwanyima y’emyaka mingi, obu Abrahamu yaabaire aine emyaka 99 na Saara aine 89, bakataayaayirwa abagyenyi bashatu. Abrahamu akabatwara ahansi y’omuti kuhuumuraho n’okurya. Abagyenyi aba noobamanya? Bakaba bari baamaraika! Bakagambira Abrahamu bati: ‘Omwaka ogurikwija obwire nk’obu, iwe n’omukazi waawe nimwija kuzaara omwana w’omwojo.’ Saara akaba ahurikiriize ari omu ihema. Akeeshekyerera reero yaateekateeka ati: ‘Buzima nimbaasa kugira omwana kandi obwo nkuzire munonga?’

Omwaka ogwakuratsireho, Saara akazaara omwana w’omwojo, nk’oku baamaraika ba Yehova baabaire baraganiise. Abrahamu akamweta Isaaka, ekirikumanyisa “Okusheka.”

Isaaka ku yaahikize emyaka nk’etaano, Saara akareeba Ishimaeli naamutwariza kubi. Saara akaba naayenda kurinda omwana we, n’ahabw’ekyo akagambira Abrahamu kubinga Hagari na Ishimaeli. Omu kubanza, Abrahamu akaba atarikwenda kubabinga. Kwonka Yehova akagambira Abrahamu ati: ‘Hurikiriza Saara. Niinyija kureeberera Ishimaeli. Kwonka okuraganisa kwangye kuryahikiiririra omuri Isaaka.’