Okwikiriza kwa Abrahamu Kugyezibwa

Abrahamu akeegyesa omutabani Isaaka kukunda Yehova n’okwikiririza omu biraganiso bye byona. Kwonka Isaaka ku yaabaire aine emyaka nka 25, Yehova akagambira Abrahamu kukora ekintu ekyabaire kigumire. Kikaba kiri kintu ki?

Ruhanga akagira Abrahamu ati: ‘Twara omwana waawe omwe nyamunegyere kandi omutambe nk’ekitambo aha kibungo kimwe omu nsi ya Moria.’ Abrahamu akaba atarikumanya ahabw’enki Yehova yaamugambiire kukora ekyo. Kwonka nabwo akoorobera Yehova.

Omu kasheeshe akakuratsireho, Abrahamu akatwara Isaaka n’abaheereza be babiri baaza Moria. Bwanyima y’ebiro bishatu, bakaba nibabaasa kureeba ebibungo. Abrahamu akagambira abaheereza be kutegyereza kandi we na Isaaka bakagyenda kutamba ekitambo. Abrahamu akeekoreza Isaaka enku, reero we yaatwara omusyo. Isaaka akabuuza ishe ati: “Beitu shi ka twine omuriro n’enku; omwana gw’entaama ogw’okutamba gurahi?” Abrahamu akagarukamu ati: ‘Mwana wangye, Yehova naija kutuha omwana gw’entaama’

Bwanyima ku baahikire aha kibungo, baakombeka eitambiro. Reero Abrahamu yaakoma Isaaka emikono n’ebigyere yaamuta aha itambiro.

Abrahamu akakwata omusyo. Omu shaaha egyo, maraika wa Yehova akeema omu iguru yaamweta ati: ‘Abrahamu! Otaita omwojo! Hati naamanya ku orikutiina Ruhanga ahakuba waikiriza kuhayo omwana waawe nk’ekitambo.’ Abrahamu akareeba entaama ekwatsirwe ebikamba omu kishaka. Ahonaaho akakomoorora Isaaka, yaihayo entaama egyo yaaba niyo yaatamba.

Okuruga obwo, Yehova akeeta Abrahamu munywani we. Noomanya ahabw’enki? Abrahamu akakora byona ebi Yehova yaamuragiire kukora, n’obu araabe yaabaire atarikwetegyereza ahabw’enki yaabaire aine kubikora.

Yehova akagarukamu eki yaabaire yaaraganiise Abrahamu: ‘Ndyakuha omugisha kandi nkanyise abaana baawe, nari oruzaaro rwawe.’ Eki kikaba nikimanyisa ngu Yehova naija kuha abantu boona omugisha kurabira omu ka ya Abrahamu.