Eihema ry’Okuramizamu

Obu Musa yaabaire ari aha Rushozi Sinai, Yehova akamugambira kwombeka eihema ry’omutaano, ahu Abaisraeli baabaire nibabaasa kuramiza Yehova. Bakaba nibabaasa kugyenda n’eihema eryo ahu baabaire baza hoona.

Yehova akagira ati: ‘Gambira abantu kuhayo kyona eki barikubaasa kuhwera aha kwombeka eihema.’ Abaisraeli bakahayo ezaabu, efeeza, emiringa, amabaare g’obuguzi bwingi, n’amahunde. Bakahayo n’ebyooya, emyenda ya kitaani, empu z’enyamaishwa, n’ebindi bintu bingi. Bakahayo ebintu bingi munonga Musa yaahika n’aha kubagira ati: ‘Twine ebirikumara. Mutareeta ebindi.’

Abashaija n’abakazi abaabaire baine emyoga bakahwera aha kwombeka eihema. Yehova akabaha obwengye bw’okukora omurimo. Abamwe bakaruka emigoye, baaruka n’emyenda. Abandi bakatebeekanisa amabaare g’okuhuda, baashemeza ezaabu, kandi baasharura ebibaizirwe omu miti.

Abantu bakombeka eihema nk’oku Yehova yaabagambiire. Bakakora omwenda murungi gw’okubaganisamu eihema ebicweka bibiri, omwanya Ogurikwera n’omwanya Ogurikwera Munonga. Omu mwanya Ogurikwera Munonga hakaba harimu eshanduukye y’endagaano, ekozirwe omu munyinya n’ezaabu. Omu mwanya Ogurikwera hakaba harimu ekikondo ky’etabaaza eky’ezaabu, emeeza, n’eky’okwotereraho obubaane. Omu kibuga ky’eihema hakaba harimu ebaafu n’eitambiro rihango. Eshanduukye y’endagaano ekaba eijutsya Abaisraeli ekiraganiso kyabo ky’omutaano eky’okworobera Yehova.

Yehova akatoorana Arooni n’abatabani kuheereza omu ihema nk’abanyamurwa. Bakaba baine kurireeberera kandi bakahayo n’ebitambo ahari Yehova. Kandi Arooni, omunyamurwa omukuru, niwe yaabaire naikirizibwa kutaaha omu mwanya Ogurikwera Munonga. Akaba ataahamu omurundi gumwe buri mwaka kuhayo ekitambo ahabw’ebibi bye, n’eby’ab’omu ka ye, kandi n’ahabw’ebibi by’eihanga ryona.

Abaisraeli bakaheza kwombeka eihema bwanyima y’omwaka gumwe barugire Misri. Bakatunga omwanya gw’okuramizamu Yehova.

Yehova akaijuza ekitiinisa kye omu eihema kandi yaata ekicu ahaiguru yaaryo. Ekicu ku kyabaire kiba kiri aha mutwe gw’eihema, Abaisraeli bakaba baguma omu mwanya ogu barimu. Kwonka ekicu ku kyabaire kigyenda, bakaba bamanya ngu n’obwire bw’okugyenda. Bakaba bakiriza eihema bakuratira ekicu.