Yoshua n’Abagibeoni

Amakuru agarikukwata ahari Yeriko gakahika n’omu mahanga agandi omuri Kanaani. Abagabe baago mahanga bakacwamu kweteerana kuza kurwanisa Abaisraeli. Kwonka Abagibeoni bakacwamu ekirikutaana ahari ekyo. Bakajwara ebijwaro bikuzire, baaza owa Yoshua baamugira bati: ‘Nituruga omu nsi ya hare. Tuhuriire ebirikukwata ahari Yehova n’ebi yaabakoreire omuri Misri na Moabu. Turaaganise ngu timuraturwanise, kandi nitwija kuba abairu baanyu.’

Yoshua akabaikiiriza kandi yaabaraganisa ngu tarabarwanise. Bwanyima y’ebiro bishatu, akamanya ngu bakaba batarikuruga omu nsi ya hare. Bakaba nibaruga omu nsi ya Kanaani. Yoshua akabuuza Abagibeoni ati: ‘Ahabw’enki mutubeihire?’ Bakagarukamu bati: ‘Tukatiina. Nitumanya ngu Yehova Ruhanga waanyu naabarwanirira. Nyabura ’mwe mutatwita.’ Yoshua akarinda okuraganisa kwe kandi bakabareka.

Ku haahingwireho obwire bukye, abagabe ba Kanaani bataano n’amahe gaabo bakatiinatiinisa Abagibeoni. Yoshua n’amahe ge bakagyenda ekiro kyona kucungura Abagibeoni. Okurwana kukatandika kare omu kasheeshe akakuratsireho. Abanyakanaani bakatandika kuhunga barikutoora embaju zoona. Hoona ei baabaire bahungira, Yehova akaba abaitsa emengo z’orubaare. Bwanyima Yoshua akashaba Yehova kwemereza izooba. Ahabw’enki Yoshua yaashabire Yehova kwemereza izooba kandi obwo ritakemerera ga? N’ahabw’okugira ngu Yoshua akaba naamwesiga. Eizooba ryoona, izooba rikaguma niryaka kuhitsya obu Abaisraeli baasingura abagabe ba Kanaani n’amahe gaabo.