Ekibi ky’Omugabe Daudi

Bwanyima ya Saulo kufa, Daudi akaba omugabe. Akaba aine emyaka 30 y’obukuru. Bwanyima y’okumara emyaka ari omugabe, eizooba rimwe akaba ari ahaiguru y’enju ye, yaareeba omukazi murungi. Daudi akamanya ngu iziina ry’omukazi ogwo ni Batisheba kandi ngu akaba ashweirwe omuserukare orikwetwa Uriya. Daudi akaragiira ngu bareete Batisheba omuka ye. Akashambana nawe, kandi Batisheba akagira enda. Daudi akateeraho kushereka eki yaakozire. Akagambira mukuru w’abaserukare kuta Uriya omumaisho g’orugamba kandi baamutsigyeho. Uriya ku yaaherize kufeera omu rutaro, Daudi akashwera Batisheba.

Kwonka Yehova akareeba ebintu bibi byona ebyabaireho. Mbwenu shi akakora ki? Yehova akatuma nabi Nasani ahari Daudi. Nasani akagambira Daudi ati: ‘Omushaija omutungi akaba aine amasyo maingi g’entaama, kandi omushaija omworo akaba aine akaana k’entaama kamwe aku yaabaire naakunda munonga. Omutungi akatwara akataama k’omworo.’ Daudi akagira ekiniga kingi munonga, yaagira ati: ‘Omushaija ogwo omutungi ashemereire kufa.’ Nasani akagambira Daudi ati: ‘Ogwo mushaija omutungi niiwe.’ Daudi akahurira obusaasi bwingi aha mutima, yaagira Nasani ati: ‘Ncumwire ahari Yehova.’ Ekibi ekyo kikareetaho oburemeezi bwingi ahari Daudi n’omuka ye. Yehova akafubira Daudi kwonka yaamwikiriza kugumaho ahakuba akaba ari omwesigwa kandi omucureezi.

Daudi akaba naayenda kwombekyera Yehova hekalu, kwonka Yehova akatoorana Sulemaani mutabani wa Daudi kuba niwe yaayombeka hekalu egyo. Daudi akatandika kutebeekanisiza Sulemaani ebintu by’okukoresa reero yaagira ati: ‘Enju ya Yehova eshemereire kuba ey’ekitiinisa kingi munonga. Sulemaani akiri muto, kwonka niinza kumuhwera mutebeekanisize ebintu.’ Daudi akahayo esente ze nyingi munonga ahabw’omurimo gw’okwombeka. Akareeta abombeki barungi. Akareeta efeeza n’ezaabu, kandi yaareeta emyereezi kuruga Tuuro na Sidoni. Daudi ku yaabaire ari haihi kufa, akagambira Sulemaani oku araayombekye hekalu. Akamugira ati: ‘Yehova andagiire kukuhandiikira ebintu ebi. Yehova naija kukuhwera. Otatiina. Gira obumanzi otandikye kwombeka.’