Hekalu ya Yehova

Bwanyima ya Sulemaani kuba omugabe wa Israeli, Yehova akamubuuza ati: ‘Okaayenzire ngu nkuhe ki?’ Sulemaani akagarukamu ati: ‘Ndi muto, kandi tindikumanya eki ndikukora. Nyabura ’we mpa obwengye mbaase kureeberera abantu baawe.’ Yehova akamugira ati: ‘Ahabw’okugira ngu waashaba kuba omunyabwengye, Ninza kukuhindura omunyabwengye orikukirayo omu nsi. Kandi noija kuba omugaiga rugambwa. Kandi ku oraanyorobere, noija kuhangaara.’

Sulemaani akatandika kwombeka hekalu. Akakoresa efeeza, ezaabu, embaaho, n’amabaare ebirikukirayo oburungi. Abantu baingi munonga, abashaija n’abakazi abarikumanya kwombeka gye bakombeka hekalu egyo. Bwanyima y’emyaka mushanju, hekalu ekaba yaahweire eri ey’okuhayo ahari Yehova. Hekalu ekaba eine itambiro, kandi rikaba ririho ebitambo. Sulemaani akatsimba amaju omu maisho g’eitambiro yaashaba naagira ati: ‘Ai Yehova, hekalu egi timpango ekirikumara kandi ti nungi ekirikumara, kwonka nyabura ’we ikiriza okuramya kwaitu kandi ohurikize okushaba kwaitu.’ Yehova akareeba ata hekalu n’okushaba kwa Sulemaani? Ahonaaho Sulemaani ku yaaherize kushaba, omuriro gukaruga omu iguru gwayotsya ebitambo ebyabaire biri aha itambiro. Atyo Yehova yaikiriza hekalu. Abaisraeli ku baareebire ebyabaireho, bakashemererwa.

Omugabe Sulemaani akamanywa ahabw’obwengye bwe omuri Israeli yoona n’omu myanya ya hare munonga. Abantu bakaba baija ahari Sulemaani bamugambira oburemeezi bwabo ngu abahwere. Nangwa n’omugabekazi wa Sheeba akaija yaamugyeza naamubuuza ebibuuzo ebigumire. Omugabekazi ku yaahuriire eby’okugarukamu bye, akagira ati: ‘Mbaire ntarikwikiriza ebi abantu bangambiire ebirikukukwataho, kwonka hati nindeeba ngu ori omunyabwengye okukira oku bangambiire. Ruhanga waawe, Yehova, akuhaire omugisha.’ Embeera ekaba eri nungi omu ihanga rya Israeli, kandi abantu bakaba bashemereirwe. Kwonka ebintu bikaba biri haihi kuhinduka.