Embaraasi n’Ebigaari by’Omuriro Ebya Yehova

Omugabe wa Siria, Benihadadi, akaguma naatahirira Israeli. Kwonka nabi Elisa akaguma naarabura omugabe wa Israeli, n’ahabw’ekyo akabaasa kuhunga. Benihadadi akacwamu kukwata Elisa. Ku yaamanyire ngu Elisa ari omu rurembo Dosani, akooherezayo amahe ga Siria kumukwata.

Abasiria bakaza Dosani omu kiro. Akasheeshe akakuratsireho, omuheereza wa Elisa ku yaashohweire aheeru akareeba orurembo rwehinguririze eihe rihango. Akatiina munonga yaagira ati: ‘Elisa, tugire tuta?’ Elisa akamugira ati: ‘Otatiina; abari naitwe ni baingi okukira abari nabo.’ Omu kaanya ako, Yehova akareetera omuheereza wa Elisa kureeba orushozi rwijwire embaraasi n’ebigaari by’omuriro.

Eihe rya Siria kuryataireho kukwata Elisa, akashaba Yehova ati: ‘Ninkweshengyereza humya amaisho g’aba bantu.’ Omu kaanya kakye, n’obu abaserukare baabaire nibabaasa kureeba, bakaba batarikumanya omwanya ogu baabaire barimu. Elisa akagira abaserukare ati: ‘Muri omu rurembo orutarirwo. Munkuratire, niinyija kubooreka omushaija ou murikusherura.’ Bakakuratira Elisa yaabahitsya Samaria, ahu omugabe wa Israeli yaabaire naatuura.

Abasiria ku baahikire Samaria nibwo baamanyire ei baabaire bari. Omugabe wa Israeli akabuuza Elisa ati: ‘Mbaite?’ Mbwenu shi Elisa akakireeba nk’omugisha gw’okwita abantu abaabaire nibenda kumukora kubi? Ngaaha. Elisa akagira ati: ‘Otabaita. Bahe eby’okurya n’amaizi reero obarekye bagarukyeyo.’ N’ahabw’ekyo akabateekyera eby’okurya bingi kandi bwanyima yaabareka baagaruka owaabo.