EISHOMO 59
Aboojo Bana Abaayorobeire Yehova
Nebukadeneeza akatwara abanyiginya ba Yuda omuri Babulooni, kwonka akataho mukuru w’abakonwa be orikwetwa Ashipenazi kubareeberera. Nebukadeneeza akagambira Ashipenazi kuronda aboojo barungi kandi ab’amaani omuri bo. Aboojo abo bakaba nibaija kutendekwa kumara emyaka eshatu. Okutendeka okwo kukaba nikwija kubatebeekanisa kuba abakuru omuri Babulooni. Aboojo abo bakaba baine kwega kushoma, kuhandiika, n’okugamba orurimi rwa Babulooni. Bakaba baine n’okurya aha by’okurya ebi omugabe yaabaire naaryaho. Aboojo bana abo bakaba bari Danieli, Hanania, Mishaeli, na Azaria. Ashipenazi akabaha amaziina masya g’Abababulooni: Beliteeshaza, Seduraaka, Mesaaki, na Abedeneego. Mbwenu shi obwegyese obwo bukaba nibwija kubareetera kurekyeraho kuheereza Yehova?
Aboojo bana aba bakaba bamaririire kworobera Yehova. Bakaba nibamanya ngu tibashemereire kurya aha by’okurya by’omugabe, ahakuba ekiragiro kya Yehova kikaba nikigira ngu bimwe aha by’okurya ebyo bikaba bitashemeire. N’ahabw’ekyo bakagambira Ashipenazi bati: ‘Nyabura ’mwe mutaturiisa eby’okurya by’omugabe.’ Ashipenazi akabagambira ati: ‘Mwaba mutabiriire omugabe akareeba nimurwara, naija kunyita.’
Danieli akaba aine eki arikuteekateeka. Akagambira omugabuzi ati: ‘Nyabura ’we tuhe ebihimba n’amaizi byonka kumara ebiro ikumi. Reero otugyeragyeranise n’abandi boojo abarikurya aha by’okurya by’omugabe.’ Omugabuzi akaikiriza.
Bwanyima y’ebiro ikumi, Danieli na banywani be bashatu bakaba nibareebeka gye, kandi bagomokire okukira abandi boojo. Yehova akashemererwa ahabw’aboojo abo kumworobera. Nangwa akaha Danieli obwengye bw’okwetegyereza okworekwa n’ebirooto.
Okutendeka ku kwahweire, Ashipenazi akareetera Nebukadeneeza aboojo boona. Omugabe akagamba nabo kandi yaareeba ngu Danieli, Hanania, Mishaeli, na Azaria baine obwengye kandi nibareebeka gye okukira abandi boona. Akatoorana aboojo bana abo kukora omu kikaari kye. Omugabe butoosha akaba abashaba obuhabuzi aha nshonga enkuru. Yehova akaba abahaire obwengye okukira abahi b’obwengye ab’omugabe n’abarangi be.
N’obu Danieli, Hanania, Mishaeli, na Azaria baraabe baabaire bari omu ihanga ritari ryabo, tibareebirwe ngu n’abaheereza ba Yehova. Naiwe noija kuguma noijuka Yehova butoosha, nangwa n’obu waakuba otari n’abazaire baawe?
“Hatagira owaagaya obutsigazi bwawe kureka obe eky’okureeberaho aha barikwikiriza omu kugamba n’omu mitwarize, omu kukunda, omu kwikiriza n’omukugira omutima ogushemeire.”—1 Timoseo 4:12