Obukama Oburaagumeho Ebiro Byona

Ekiro kimwe, Omugabe Nebukadeneeza akaroota ekirooto eki atarayetegyereize. Kikamureetera kwemereza omutima, yaabura oturo. Akeeta abafumu be yaabagira ati: ‘Munshoboororere ekirooto kyangye.’ Bakamugira bati: ‘Tugambire ekyo kirooto, Nyakusinga omugabe.’ Kwonka Nebukadeneeza akabagira ati: ‘Ngaaha! Mungambire ebi ndootsire, kitari ekyo, ninyija kubaita.’ Bakagaruka baamubuuza bati: ‘Tugambire ekyo kirooto, reero bwanyima nitwija kukishoboorora.’ Akabagira ati: ‘Mwena muriyo nimuteeraho kuntega. Mungambire eki ndotsire!’ Bakagambira omugabe bati: ‘Tihariho omuntu orikubaasa kukora ekyo. Eki oriyo nootushaba tikirikubaasika.’

Nebukadeneeza akaguubwa kubi yaagira ekiniga kingi kandi yaaragiira ngu abafumu n’abahi b’obwengye boona abari omu nsi egyo baitwe. Ekyo kikaba nikiija kutwariramu na Danieli, Seduraaka, Mesaaki, na Abedeneego. Danieli akashaba omugabe kutegyereza. Reero we n’abanywani be bakashaba Yehova kubahwera. Yehova akakora ki?

Omu kworekwa, Yehova akooreka Danieli ekirooto kya Nebukadeneeza n’amakuru gaakyo. Eizooba eryakuratsireho, Danieli akaza ow’omuheereza w’omugabe yaamugira ati: ‘Otakaayita omuntu weena aha bahi b’obwengye. Nimbaasa kushoboorora ekirooto ky’omugabe.’ Omuheereza w’omugabe akatwara Danieli ahari Nebukadeneeza. Danieli akagambira omugabe ati: ‘Ruhanga naakumanyisa ebiraabeho omu biro ebiriija. Ekirooto kyawe n’eki: Oreebire ekishushani kihango ekiine omutwe ogw’ezaabu, ekifuba kyakyo n’emikono yaakyo biri eby’efeeza, enda n’ebibero byakyo biri eby’emiringa, amaguru gaakyo gari ag’ekyoma, kandi ebigyere byakyo bibaire biri ekyoma n’eibumba. Bwanyima eibaare ryahiringita niriruga aha rushozi, ryateera ebigyere by’ekishushani ekyo. Ekishushani ekyo kikatagurika, kyahinduka nk’omweziga gw’aha ihuuriro omu kyanda, omuyaga gwakituntumura. Eibaare eryo ryahinduka orushozi ruhango, rwamara ensi yoona.’

Danieli akagaruka yaagira ati: ‘Aga nigo makuru g’ekirooto kyawe: Obugabe bwawe nigwo mutwe gw’ezaabu. Efeeza n’obugabe obundi oburakurate obwawe. Bwanyima haryakurataho obundi bugabe obw’omuringa, oburaije kutegyeka ensi yoona. Obugabe obundi oburikurataho buryaba bugumire nk’ekyoma. Bwanyima, haryabaho obugabe obwebaganisemu bwine ebicweka ebimwe bigumire nk’ekyoma kandi ebindi byorobi nk’eibumba. Eibaare eryahindukire orushozi n’Obukama bwa Ruhanga. Nibwija kwatagura obugabe obu bwona kandi bwo buryagumaho ebiro byona.’

Nebukadeneeza akagwa ahansi ajumaire omu maisho ga Danieli. Akamugira ati: ‘Ruhanga waawe yaakworeka ekirooto eki. Tihariho Ruhanga ori nkawe.’ Omu mwanya gw’okwita Danieli, Nebukadeneeza akamuhindura mukuru w’abahi b’obwengye boona kandi omutegyeki wa Babulooni. Nooreeba oku Ruhanga yaagarukiremu okushaba kwa Danieli?