Ebihandiiko aha Kisiika

Ku haahweireho obwire, Belishaza akaba omugabe wa Babulooni. Ekiro kimwe, akeeta abantu baingi ab’ebitiinisa aha bugyenyi. Akaragiira abaheereza be kureeta ebikopo by’ezaabu ebi Nebukadeneeza yaabaire aihire omu hekalu ya Yehova. Belishaza n’abagyenyi be bakanywera omu bikopo ebyo baahimbisa baaruhanga baabo. Omu kaanya kakye, engaro y’omushaija ekareebeka erikuhandiika aha kisiika ebigambo ebigumire kwetegyereza.

Belishaza akatiina. Akeeta abahi b’obwengye be yaabagira ati: ‘Haaba hariho orikubaasa kushoboorora ebigambo ebi, niinyija kumuhindura mukuru munonga abe owaakashatu omuri Babulooni.’ Bakateeraho, kwonka tihariho n’omwe omuri bo owaabaasize kubishoboorora. Omugabekazi akaija yaabagira ati: ‘Hariho omushaija orikwetwa Danieli owaabaire naakira kushoboororera Nebukadeneeza ebintu. Naabaasa kukushoboororera ebigambo ebi.’

Danieli akaza ow’omugabe. Belishaza akamugira ati: ‘Waaba noobaasa kushoma kandi okashoboorora ebigambo ebi, niinyija kukuha orukwanzi rw’ezaabu nkuhindure omushaija wa kashatu omukuru omuri Babulooni.’ Danieli akamugira ati: ‘Tindikwenda ebiconco byawe, kwonka niinyija kukugambira amakuru g’ebigambo ebi. Sho Nebukadeneeza akaba aine amaryo, kandi Yehova akamucureeza. Noomanya byona ebyamuhikireho, kwonka oyangire kuha Yehova ekitiinisa waanywera omu bikopo by’ezaabu eby’omu hekalu ye. N’ahabw’ekyo Ruhanga ahandiikire ebigambo ebi: Mene, Mene, Teekeli, na Parasiini. Ebigambo ebi nibimanyisa ngu Abameedi n’Abaperesi nibaija kusingura Babulooni, kandi toragaruke kuba omugabe.’

Kikaba nikireebeka ngu tihaine owaabaire naabaasa kusingura Babulooni. Orurembo oru rukaba rurinzirwe engo zigumire n’omugyera. Kwonka ekiro ekyo kyenyine, Abameedi n’Abaperesi bakataahirira orurembo orwo. Omugabe wa Buperesi, Kuuro akahabya omugyera kugira ngu abaserukare babaase kurabaho bahikye aha ngo z’orurembo. Ku baahikireyo, bakashanga engo zigwire. Abaserukare bakataaha omu rurembo, baarusingura kandi baita omugabe. Bwanyima Kuuro yaaba omugabe wa Babulooni.

Omu mwaka gumwe, Kuuro akaranga ati: ‘Yehova angambiire kugaruka kwombeka hekalu ye omuri Yerusaalemu. Weena orikwenda kuhwera naikirizibwa kuzayo.’ N’ahabw’ekyo nk’oku Yehova yaabaire araganiise, Abayudaaya baingi bakagaruka owaabo bwanyima y’emyaka 70 Yerusaalemu eherize kucwekyerezibwa. Kuuro akagarurayo ebikopo by’ezaabu n’eby’efeeza n’ebikoreso ebindi ebi Nebukadeneeza yaabaire aihire omuri hekalu. Nooreeba oku Yehova yaakoreise Kuuro kuhwera abantu be?