Esteeri Okujuna Abantu Be

Esteeri akaba ari omwishiki Omuyudaaya owaabaire naatuura omu rurembo rwa Buperesi omuri Shushani. Emyaka mingi enyima, Nebukadeneeza akaiha ab’omuka ya Esteeri omuri Yerusaalemu. Akakuzibwa mwihwa we Morodekai, omuheereza w’Omugabe Ahasuero owa Buperesi.

Omugabe Ahasuero akaba naayenda omugabekazi omusya. Abaheereza be bakamureetera abaishiki abarikukirayo oburungi ab’omu ihanga eryo, otwariiremu na Esteeri. Omu baishiki abo boona, omugabe akatoorana Esteeri kuba omugabekazi. Morodekai akagambira Esteeri kutagira ou yaagambira ngu akaba ari Omuyudaaya.

Omushaija owaabaire aine amaryo orikwetwa Hamani niwe yaabaire ari mukuru w’abanyiginya boona. Akaba naayenda ngu buri omwe amwinamire. Morodekai akanga kukikora, kandi Hamani akamugirira ekiniga kingi yaayenda n’okumwita. Hamani ku yaamanyire ngu Morodekai akaba ari Omuyudaaya, akatebeekanisa kwita Abayudaaya boona omu ihanga eryo. Akagambira omugabe ati: ‘Abayudaaya nibabi munonga; oine kubaita.’ Ahasuero akamugira ati: ‘Kora kyona eki orikwenda kukora,’ kandi akamuha n’obushoboorozi bw’okutaho ekiragiro. Hamani akataho ekiragiro arikuragiira abantu kwita Abayudaaya boona aha kiro 13 ky’okwezi kwa Adari. Yehova akaba naabireeba.

Esteeri akaba atarikumanya ekiragiro ekyo. N’ahabw’ekyo Morodekai akamwoherereza ebaruha erimu ekiragiro ekyo kandi yaamugira ati: ‘Gyenda ogambe n’omugabe.’ Esteeri akagira ati: ‘Weena orikuza ow’omugabe ateetsirwe naitwa. Omugabe takanyetsire kumara ebiro 30. Kwonka niinyija kuzayo. Yaampa enkoni ye, niinyija kuguma buhooro. Yaaba atagimpaire, niinyija kufa.’

Esteeri akaza omu kikaari ky’omugabe. Omugabe ku yaamureebire, yaamuha enkoni ye. Esteeri akamwirira haihi, reero omugabe yaamubuuza ati: ‘Nkukorere ki, Esteeri?’ Esteeri akamugira ati: ‘Niinyenda kukweta iwe na Hamani aha bugyenyi obu nkuteekateekiire.’ Ku baabaire bari aha bugyenyi, Esteeri akabeeta aha bugyenyi bwa kabiri. Aha bugyenyi obwo, omugabe akagaruka yaamubuuza ati: ‘Nkukorere ki?’ Esteeri akamugarukamu ati: ‘Hariho omuntu orikwenda kunyita n’abantu bangye. Nyabura ’we tujune.’ Omugabe akamubuuza ati: ‘N’oha orikwenda kukwita?’ Esteeri akamugarukamu ati: ‘Omushaija ogu mubi Hamani.’ Ahasuero akagira ekiniga kingi yaaragiira ngu Hamani aitwe ahonaaho.

Kwonka tihaine owaabaire naabaasa kushazamu ekiragiro kya Hamani, n’obu yaakuba omugabe. N’ahabw’ekyo omugabe akahindura Morodekai mukuru w’abanyiginya kandi yaamuha obushoboorozi bw’okutaho ekiragiro ekisya. Morodekai akataho ekiragiro ekyabaire nikiikiriza Abayudaaya kwerwanaho baataahirirwa. Aha kiro 13 ky’okwezi kwa Adari, Abayudaaya bakasingura abazigu baabo. Kuruga obwo, buri mwaka bakaba nibakuza ekiro ekyo.