Yesu Okuhinduka Mesia

Yohaana akaba naabuurira ati: “Enyima yangye nihaija omuntu orikunkira.” Obu Yesu yaabaire aine emyaka nka 30, akaruga Galilaaya yaaza aha Mugyera Yorudani, ahu Yohaana yaabaire naabatiriza abantu. Yesu akaba naayenda ngu Yohaana amubatize, kwonka Yohaana akeenda kumwangira arikugira ati: ‘Ti nshemereire kukubatiza. Naiwe oine kumbatiza.’ Yesu akagambira Yohaana ati: ‘Yehova naayenda ngu ombatize.’ N’ahabw’ekyo bakaza omu Mugyera Yorudani, kandi Yohaana akaibika Yesu weena omu maizi.

Yesu ku yaarugire omu maizi, akashaba. Omu kaanya ako, eiguru rikakinguuka, omwoyo gwa Ruhanga gwamwijaho omu kishushani ky’enkombe. Kandi Yehova akeema omu iguru yaagira ati: “Niiwe Mwana wangye ou nkunda, kandi ou nshemerererwa munonga.”

Omwoyo gwa Yehova ku gwaizire ahari Yesu, akahinduka Kristo nari Mesia. Akaba naaza kutandika kukora omurimo ogu Yehova yaabaire omwohereize kukora omu nsi.

Ahonaaho, Yesu ku yaaherize kubatizibwa akaza omu ihamba yaagumayo kumara ebiro 40. Ku yaagarukire, akaza kureeba Yohaana. Yohaana ku yaareebire Yesu naija, akagira ati: “Reeba, Omwana gw’entaama wa Ruhanga, orikwihaho ekibi ky’ensi.” Yohaana akagamba atyo, arikwenda ngu abantu bamanye ngu Yesu akaba ari Mesia. Noomanya ekyabaire ahari Yesu obu yaabaire ari omu ihamba? Ka tureebe.