Omukazi aha Iziba

Bwanyima y’Okuhingurwaho, Yesu n’abeegi be bakaba bari Samaria barikugaruka Galilaaya. Yesu akeemerera haihi n’orurembo Sukaara, aha mwanya ogurikwetwa eiziba rya Yakobo. Ku yaabaire ahuumuriireho, abeegi be bakaza omu rurembo kugura eby’okurya.

Omukazi akaza aha iziba kutaha amaizi. Yesu akamugira ati: “Mpa eky’okunywa.” Omukazi akamubuuza ati: ‘Ahabw’enki waagamba naanye? Ndi Omusamariakazi. Abayudaaya tibarikugamba n’Abasamaria.’ Yesu akamugarukamu ati: ‘Kuri noomanya, naiwe okaganshabire kandi nkaakuhaire amaizi g’amagara.’ Omukazi akabuuza Yesu ati: ‘Noomanyisa ki? Toine ky’okutahisa.’ Yesu akamugira ati: ‘Orikunywa aha maizi agu ndimuha, tarigira iriho ebiro byona.’ Omukazi akamugira ati: “Mukama wangye, mpa amaizi ago.”

Yesu akamugira ati: ‘Irooko oyete baro.’ Omukazi akamugarukamu ati: ‘Tiinyine mushaija.’ Yesu akamugira ati: ‘Waagamba amazima. Ahabw’okuba okashwerwa abashaija bataano; n’ogwo ou oine hati ti baro.’ Omukazi akamugira ati: ‘Naayetegyereza ku ori nabi. Abantu bangye nibaikiriza ngu nitubaasa kuramiza Ruhanga aha rushozi oru, kwonka Abayudaaya nibagira ngu Yerusaalemu niyo twine kuramiza. Niinyikiriza ngu Mesia ku araije, naija kutwegyesa oku twine kuramya.’ Bwanyima Yesu akamugambira eki yaabaire atakagambiire omuntu weena ati: ‘Niinye Mesia.’

Ahonaaho omukazi akaza omu rurembo yaagambira Abasamaria ati: ‘Ninteekateeka ngu naareeba Mesia. Naamanya byona ebirikunkwataho. Mwije mu mureebe!’ Bakamukuratira aha iziba kandi baahurikiza Yesu arikwegyesa.

Abasamaria bakashaba Yesu ngu agume omu rurembo rwabo. Akagumayo kumara ebiro bibiri, naayegyesa, kandi abantu baingi bakamwikiriza. Bakagambira Omusamariakazi bati: ‘Bwanyima y’okuhurikiza omushaija ogu, naitwe twamanya ngu buzima niwe mujuni w’ensi.’