Yesu Okutoorana Entumwa Ikumi na Babiri

Bwanyima ya Yesu kubuurira nk’omwaka gumwe n’ekicweka, akaba aine kucwamu ekintu kikuru. Ni baahi abu yaabaire naija kutoorana kuguma nibakora nawe? Ni baahi obu yaabaire naija kutendeka kwebembera ekibiina Ekikristaayo? Yesu kubaasa kucwamu gye akaba naayetenga obuhabuzi bwa Yehova. N’ahabw’ekyo akaza aha rushozi wenka, yaashaba ekiro kyona. Omu kasheeshe, Yesu akeeta bamwe aha beegi be kandi yaatooranamu entumwa ze 12. Ni baahi aharibo abu orikwijuka amaziina? Bakaba nibeetwa Petero, Anderea, Yakobo, Yohaana, Filipo, Baturumaayo, Tomasi, Matayo, Yakobo mwene Alufaayo, Tadaayo, Simooni, na Yuda Iskaryota.

Ikumi na babiri aba bakaba baagyenda na Yesu. Ku yaaherize kubatendeka, akaboohereza kubuurira. Yehova akabaha amaani g’okubinga baadaimoni n’okukiza abarwaire.

Ikumi na babiri aba Yesu akabeeta banywani be, kandi akaba naabeesiga. Abafarisaayo bakaba nibagira ngu entumwa za Yesu bakaba batashomire kandi ab’ahansi. Kwonka Yesu akabatendeka kukora omurimo gwabo. Bakaba nibaija kuguma na Yesu obu yaabaire naabeetenga, nk’obu yaabaire ari haihi kufa na bwanyima y’okuzooka. Nka Yesu, baingi aha ntumwa ze bakaba nibaruga Galilaaya. Bamwe aharibo bakaba bari omu bushwere.

Entumwa bakaba batahikiriire barikubaasa kukora enshobe. Obumwe bakaba baagamba batabandize kuteekateeka kandi bakaba bacwamu kubi. Obumwe bakaba baba bataine kugumisiriza. Bakagira empaka aha waabaire ari mukuru omuribo. Kwonka bakaba bari abantu barungi abaabaire nibakunda Yehova. Bakaba nibaija kuba omusingi gw’ekibiina Ekikristaayo Yesu yaaba atakiri nabo.