Abeegi ba Yesu Okutunga Omwoyo Gurikwera

Bwanyima y’ebiro ikumi Yesu aherize kugaruka omu iguru, abeegi be bakatunga omwoyo gurikwera. Ekaba eri Pentekoote ogwa 33 Y.A.K., kandi abantu baingi bakaba barugire omu bicweka bingi baizire Yerusaalemu. Abeegi ba Yesu 120 bakaba bari omu kishengye ky’ahaiguru omu nju. Ahonaaho, hakabaho ekintu kirikutangaaza. Ekintu ekirikushusha nk’omuriro kikareebeka aha mutwe gwa buri mwegi, kandi boona bakatandika kugamba omu ndimi zitarikushushana. Hakabaho okuhoorera nk’okw’omuyaga kwijura enju.

Abagyenyi abaarugire omu bicweka ebindi abaabaire baizire Yerusaalemu bakahurira okuhoorera kw’amaani baataaha omu nju kureeba ekyabaho. Bakatangaara ku baahuriire abeegi nibagamba omu ndimi z’owaabo. Bakagira bati: ‘Kwonka abantu aba nibaruga Galilaaya. Mbwenu shi nibabaasa bata kugamba endimi z’owaitu?’

Bwanyima Petero n’ezindi ntumwa bakeemerera omumaisho g’abantu. Petero akagambira abantu oku Yesu yaitsirwe n’oku Yehova yaamuzoire. Petero akagira ati: ‘Hati Yesu ari omu iguru aha rubaju rwa buryo orwa Ruhanga, kandi yaayohereza omwoyo gurikwera nk’oku yaaraganiise. Nikyo mwareebera kandi mukahurira eby’okutangaaza ebi.’

Abantu ku baahuriire ebigambo bya Petero bakakwatwaho omu mutima, kandi baamubuuza bati: “Tugire tuta?” Akabagarukamu ati: ‘Mweteise, mwena mubatizibwe omu iziina rya Yesu Kristo; kandi nimwija kuheebwa ekiconco ky’omwoyo gurikwera.’ Aha izooba eryo, abantu nka 3,000 bakabatizibwa. Kuruga obwo, ahonaaho entumwa bakatandika kweyongyera omuri Yerusaalemu. Entumwa barikuhwerwa omwoyo gurikwera, bakatandikaho ebibiina ebindi kugira ngu babaase kwegyesa abeegi ebintu byona ebi Yesu yaabaragiire.