Yesu Okutoorana Saulo

Saulo akaba ari omutuuzi wa Rooma kandi enzaarwa ya Taruso. Akaba ari Omufarisaayo owaabaire ari omukugu omu Biragiro by’Ekiyudaaya, kandi akaba naayanga Abakristaayo. Akaba akwata abashaija n’abakazi Abakristaayo abaiha omu maka gaabo abata omu kihome. Kandi akaba ariho obu abantu baingi b’ekiniga baateera Stefano amabaare bakamwita.

Kwonka Saulo taratiire omu kihome Abakristaayo ab’omuri Yerusaalemu bonka. Akashaba orusa omunyamurwa omukuru kumwikiriza kuza na Damasiko kukwata Abakristaayo abandi. Saulo ku yaahikire haihi n’orurembo, ekyererezi kingi kikaaka ahu yaabaire ari, yaagwa ahansi. Akahurira eiraka nirigira riti: “Saulo, noompiigira ki?” Saulo akamubuuza ati: “Ori oha?” Akamugarukamu ati: ‘Niinye Yesu. Za omuri Damasiko, noija kumanya eki oraakore.’ Omu kaanya ako, Saulo akahinduka empumi, kandi bakamukwata omukono baamuhitsya omu rurembo.

Omuri Damasiko, hakaba hariyo Omukristaayo omwesigwa orikwetwa Anania. Yesu akamugambira omu kirooto ati: ‘Irooko oze omu muhanda ogurikwetwa Ogugororokire oze omu nju ya Yuda osherure Saulo.’ Anania akagira ati: ‘Mukama wangye, nimmanya byona ebirikukwata aha mushaija ogwo. Naata abeegi baawe omu kihome.’ Kwonka Yesu akagira ati: ‘Irooko ogyende. Ntooraine Saulo kubuurira amakuru marungi omu mahanga goona.’

N’ahabw’ekyo Anania akashangayo Saulo yaamugira ati: ‘Ow’eishe-emwe, Saulo, Yesu yaantuma kuhuumura amaisho gaawe.’ Ahonaaho, Saulo akagaruka yaareeba. Akeega ebirikukwata ahari Yesu kandi yaahinduka omukuratsi we. Saulo akabatizibwa yaahinduka Omukristaayo, akatandika kubuurira omu sinagogi n’Abakristaayo bagyenzi be. Noobaasa kuteekateeka oku Abayudaaya baatangaire ahabw’okureeba Saulo naayegyesa abantu ebirikukwata ahari Yesu. Bakagira bati: ‘Ogu t’omushaija owaabaire naakwata abeegi ba Yesu?’

Okumara emyaka eshatu, Saulo akabuurira abantu abaabaire nibatuura omuri Damasiko. Abayudaaya bakaba nibanga Saulo kandi bakatebeekanisa kumwita. Kwonka ab’eishe-emwe ku baakimanyire bakamuhwera kuhunga. Bakamuta omu kitukuru kandi baamurabya omu rugo rw’orurembo.

Saulo ku yaagiire Yerusaalemu, akateeraho kuba n’ab’eishe-emwe. Kwonka bakaba nibamutiina. Bwanyima omwegi omunyambabazi orikwetwa Barunaba akatwara Saulo aha ntumwa kandi yaabahamiza ngu Saulo akaba ahindukire. Saulo akatandika kubuurira amakuru marungi n’obweziriki arikubuurira n’ekibiina omuri Yerusaalemu. Bwanyima, Saulo akahinduka yaayetwa Paulo.