Koruneelio Okutunga Omwoyo Gurikwera

Omuri Kaisarea, hakaba hariyo omukuru w’amahe g’Abarooma arikwetwa Koruneelio. N’obu araabe yaabaire atari Muyudaaya, Abayudaaya bakaba nibamuha ekitiinisa. Akaba ari efura arikuhwera abooro n’abakyene. Koruneelio akaba naikiririza omuri Yehova kandi akaba amushaba obutoosha. Eizooba rimwe, maraika akamweyoreka yaamugira ati: ‘Ruhanga ahuriire okushaba kwawe. Hati tuma abashaija omu rurembo Yoopa, ahu Petero arikutuura, bamukwetere.’ Ahonaaho, Koruneelio akatuma abashaija bashatu kuza Yoopa mahiro nka 30 bukiizi-bwa-buryo.

Omuri Yoopa, Petero akatunga okworekwa. Akareeba enyamaishwa ezi Abayudaaya baabaire batashemereire kurya, kandi akahurira eiraka nirimugira ngu arye. Petero akanga, yaagira ati: ‘Tinkaryaga kintu kyona ekitashemeire.’ Bwanyima eiraka rikamugira riti: ‘Enyamaishwa ezo otazeeta ezitashemeire. Ruhanga azishemeize.’ Kandi, ‘aha rwigi hariho abashaija bashatu. Gyenda nabo.’ Petero akaza aha rwigi yaabuuza abashaija abo ahabw’enki baija omu ka ye. Bakagarukamu bati: ‘Koruneelio, omukuru w’amahe g’Abarooma atutumire kukweta kwija omu ka ye, omuri Kaisarea.’ Ekiro ekyo Petero akaakiira abashaija abo baaba abagyenyi be. Ekiro ekyakuratsireho, akagyenda nabo Kaisarea, na bamwe aha b’eishe-emwe kuruga Yoopa.

Koruneelio ku yaareebire Petero, yaamugwa aha bigyere. Kwonka Petero akamugira ati: ‘Imuka. Naanye ndi omuntu nkaiwe. Ruhanga angambiire kwija omu nju yaawe, n’obu Abayudaaya baraabe batarikutaaha mu nju z’Abanyamahanga. Mbwenu ngambire eki onyetiire.’

Koruneelio akagambira Petero ati: ‘Ebiro bina enyima mbaire ninshaba; ku mbaire ninshaba, maraika yaangira ngu nkwete. Nyabura ’we twegyese ekigambo kya Yehova.’ Petero akagira ati: ‘Naayetegyereza ngu Ruhanga tashoroora. Naikiriza weena orikwenda kumuramya.’ Petero akabeegyesa ebintu bingi ebirikukwata ahari Yesu. Bwanyima Koruneelio akatunga omwoyo gurikwera na boona abaabaire bari nawe, kandi boona bakabatizibwa.