Obukristaayo Okujanjaara omu Mahanga Maingi

Entumwa za Yesu zikorobera ekiragiro ky’okubuurira amakuru marungi omu nsi yoona. Omuri 47 Y.A.K., ab’eishe-emwe omuri Antiokia bakoohereza Paulo na Barunaba kuza omu rugyendo rw’okubuurira. Ababuurizi babiri aba bakabuurira n’obweziriki omuri Asia nk’omu myanya ya Derube, Lusitura, na Ikonio.

Paulo na Barunaba bakabuurira buri omwe, abatungi n’abooro, abato n’abakuru. Abantu baingi bakaikiriza amazima agarikukwata ahari Kristo. Obu Paulo na Barunaba baabaire nibabuurira Serugio Paulo, omukuru w’omuri Kupuro, omushaija omurogi akateeraho kubazibira. Paulo akagambira omurogi ati: ‘Yehova naija kukufubira.’ Ahonaaho, omurogi akahinduka empumi. Omukuru Paulo ku yaareebire ekyo, akaikiriza.

Paulo na Barunaba bakabuurira buri hamwe, enju aha nju, omu butare, aha nguuto, n’omu sinagogi. Ku baatambiire omushaija ekirema omuri Lusitura, abaareebire eky’okutangaaza ekyo bakateekateeka ngu bakaba bari baaruhanga baayenda kubaramya. Kwonka Paulo na Barunaba bakabazibira babagira bati: ‘Muramye Ruhanga wenka. Naitwe turi abantu.’ Abayudaaya abamwe bakaija bareetera abantu kutwariza kubi Paulo. Abantu bakateera Paulo amabaare, baamutwara aheeru y’orurembo, kandi baamurekayo ngu afe. Kwonka, Paulo tarafiire. Ahonaaho, ab’eishe-emwe bakaija baamucungura baamugarura omu rurembo. Bwanyima, Paulo akagaruka Antiokia.

Omuri 49 Y.A.K., Paulo akaza omu rugyendo orundi. Ku yaagarukireyo kureeba ab’eishe-emwe omuri Asia, akagumizamu yaabuurira amakuru marungi n’omuri Buraaya. Akaza omuri Aseene, Efeso, Filipi, Tesalonika, n’omu myanya endiijo. Siila, Luka, na Timoseo bakagyenda na Paulo omu ngyendo ze. Bakaheereza nawe baatandikaho ebibiina kandi baabihwera kutunguuka. Paulo akaguma omuri Korinso omwaka gumwe n’ekicweka, arikugumya ab’eishe-emwe. Akabuurira, yaayegyesa, kandi akahandiikira ebibiina bingi amabaruha. Akaba naakora n’amahema. Ku haahingwireho obwire, Paulo akagaruka Antiokia.

Bwanyima, omu gwa 52 Y.A.K., Paulo akaza omu rugyendo rwe rwa kashatu, arikutandikira omuri Asia. Akagyenda yaahika bukiizi-bwa-buryo bwa Filipi, bwanyima yaaza Korinso. Paulo akamara emyaka mingi omuri Efeso, arikwegyesa, arikutambira abarwaire, kandi arikuhwera ekibiina. Akaba aha n’embazo z’abantu boona buri izooba omu mashomero. Abantu baingi bakahurira kandi baakora empindahinduka. Ahamuheru, Paulo ku yaaherize kubuurira amakuru marungi omu bicweka bingi, akaza Yerusaalemu.