Rukundo Ya Ruhanga Neegumaho Ebiro Byona

1, 2. Ahabw’enki nookunda Yehova Ruhanga?

NOOKUNDA Ruhanga? Noobaasa kuba noomukunda munonga, ekikureeteire kwehayo ahariwe. Noobaasa kuba noomanya ngu niwe munywani waawe orikukirayo. Kwonka iwe otakakunzire Yehova, niwe yaabandize kukukunda. Baibuli neegira eti: “Itwe nitukunda, ahakuba akabanza kutukunda.”​—1 Yohaana 4:19.

² Teekateeka aha miringo yoona ei Yehova ayorekire ngu naatukunda. Atuhaire ensi nungi kuba eka yaitu, na buri kimwe ekirikwetengyesa kubaisaho amagara. (Matayo 5:43-48; Okushuuruurwa 4:11) Naayenda ngu tugire omukago murungi nawe, kandi ataireho oburyo bw’okutubaasisa kwega ebirikumukwataho. Twashoma Baibuli, nituba nituhurikiza Yehova. Kandi twashaba naatuhurira. (Zaaburi 65:2) Naatuhabura kandi atugumya arikukoresa amaani g’omwoyo gurikwera. (Luka 11:13) Akoohereza n’Omwana we ow’omuhendo omu nsi kutucungura ekibi n’okufa.​—Shoma Yohaana 3:16; Abarooma 5:8.

3. Twine kukora ki kubaasa kuguma twine omukago murungi na Yehova?

³ Teekateeka ahari munywani waawe ow’aha mara, orikuguma naiwe omu bwire bw’okushemererwa n’obw’obusaasi. Nikyetengyesa okuteeraho n’amaani kurinda omukago nk’ogwo kuguma guhami. Nikyo kimwe n’omukago ogu twine na Yehova munywani waitu orikukirayo. Nitubaasa kuguma turi banywani be ebiro byona. N’ahabw’ekyo Baibuli neetuhiga eti: “Mwerindire omu kukunda kwa Ruhanga.” (Yuda 21) Eki nitubaasa kukikora tuta? Baibuli neegarukamu eti: ‘Oku nikwo kukunda Ruhanga, itwe okworobera ebiragiro bye, kandi ebiragiro bye tibirikurutsya.’​—1 Yohaana 5:3.

EKI NIKYO ‘OKUKUNDA RUHANGA’ KIRIKUMANYISA

4, 5. (a) Ebigambo ‘okukunda Ruhanga’ nibimanyisa ki? (b) Rukundo ei oyiniire Yehova ekatandika eta kukura?

⁴ Baibuli neeba neemanyisa ki yaakoresa ebigambo ‘okukunda Ruhanga’? Neeba neemanyisa rukundo mpango ei twiniire Ruhanga. Noijuka obu waatandika kukunda Yehova?

⁵ Ijuka oku waayehuriire obu waabanza kwega ngu Yehova naayenda ngu otuure omu nsi ensya ebiro byona. Okamanya byona ebi Yehova yaaherize kukora kubaasisa eki kubaho, kandi okeetegyereza ngu akatuha ekiconco ky’omuhendo munonga arikwohereza Omwana we omu nsi. (Matayo 20:28; Yohaana 8:29; Abarooma 5:12, 18) Ku waagumire nooyega ahari rukundo mpango ei Yehova akwiniire, naiwe okatandika kumukunda.​—Shoma 1 Yohaana 4:9, 10.

6. Okukunda omuntu nikutwariramu ki, kandi okukunda Yehova kikuhigire kukora ki?

⁶ Kwonka rukundo egyo ei waagiriire Ruhanga ekaba eri entandikiriro. Nk’eky’okureeberaho, waaba nookunda omuntu, nookora ekirikukira aha kumugambira ngu ‘noomukunda.’ Rukundo ei omwiniire neekuhiga kukora ebirikumushemeza. Nikyo kimwe, okukunda Yehova kukakureetera kwenda kutwaza omu muringo ogurikumushemeza. Ku waayongyeire kukunda Yehova, obundi noobaasa kuba oyehaireyo ahariwe kandi okabatizibwa. Omu kukora otyo, okaraganisa kuheereza Yehova ebiro byona. (Shoma Abarooma 14:7, 8.) Noobaasa kuhikiiriza ota okuraganisa okwo?

‘NITWOROBERA EBIRAGIRO BYE’

7. Twaba nitukunda Yehova nitwija kukora ki, kandi ni bintu ki ebimwe ebi arikugira ngu bigwire?

⁷ Ahabw’okugira ngu nitukunda Yehova, ‘nitworobera ebiragiro bye.’ Eki nitukikora tuta? Turikumworobera. Omu Baibuli Yehova naatworeka oku arikwenda ngu tutwaze. Nk’eky’okureeberaho, naatugambira ngu kigwire kusinda, kwiba, kubeiha, kuteerana n’ou otari nawe omu bushwere, nari kuramya omuntu nari ekintu ekindi kyona.—1 Abakorinso 5:11; 6:18; 10:14; Abaefeso 4:28; Abakolosai 3:9.

8, 9. Nitumanya tuta eki Yehova arikwenda ngu tukore haaba hatariho kiragiro omu Baibuli ekirikugamba butunu aha nshonga? Ha eky’okureeberaho.

⁸ Kwonka kubaasa kushemeza Yehova, twine kukora ekirikukira aha kworobera bworobera ebiragiro bye. Tatuhaire omushororongo gw’ebiragiro ebirikukwata ahari buri mbeera. N’ahabw’ekyo, obumwe nooshanga hatariho kiragiro omu Baibuli ekirikworeka eki twine kukora. Mbwenu shi nitubaasa kucwamu gye tuta? (Abaefeso 5:17) Omu Baibuli nitushangamu emisingye, nari amazima makuru agarikutuhwera kumanya emiteekateekyere ya Yehova aha nshonga zitari zimwe na zimwe. Kandi twashoma Baibuli nitwongyera kwetegyereza gye Yehova. Nitumanya emiteekateekyere ye, otwariiremu ebi arikukunda n’ebi arikwanga.—Shoma Zaaburi 97:10; Enfumu 6:16-19; reeba Ebirikukiraho 1.

⁹ Nk’eky’okureeberaho, nitubaasa kucwamu tuta ebi turaareebe aha tiivi nari aha Intaneeti? Yehova tarikutugambira kyenyini eki twine kukora. Kwonka emisingye ei arikutuha neetuhwera kucwamu gye. Eby’okweshemeza ebiriho hati biijwiremu obushaarizi n’okuteerana. Baibuli neeyoreka ngu Yehova naayanga ‘abarikukunda’ obushaarizi, kandi ngu ‘abashambani naija kubacwera orubanja.’ (Zaaburi 11:5; Abaheburaayo 13:4) Emisingye egi neebaasa kutuhwera eta kucwamu gye? Twamanya ngu Yehova naayanga ekintu nari ngu naakireeba nk’ekirikuhemurana, tushemereire kukyetantara.

10, 11. Ahabw’enki nitworobera Yehova?

¹⁰ Ahabw’enki nitworobera Yehova? Ti ahabw’okugira ngu nitwenda kwetantara kufubirwa nari oburemeezi oburikuruga omu kucwamu kubi. (Abagalatia 6:7) Ngaaha! Kureka nitworobera Yehova ahabw’okumukunda. Nk’oku abaana barikuba nibenda kushemeza ishebo, naitwe nituba nitwenda kushemeza Tataitwe ow’omu iguru. Ka nikishemeza munonga kumanya ngu Yehova naasiima ebi turikukora!—Zaaburi 5:12; Enfumu 12:2; reeba Ebirikukiraho 2.

¹¹ Titurikworobera Yehova obu kirikuba kyorobi bwonka, nari obu turikuba tutaine ekindi ky’okukora. Kandi titurikworobera ebiragiro ebimwe n’emitindo emwe, reero endiijo tukagyehuzya. (Eky’Ebiragiro 12:32) Kureka, nitumworobera omu bwijwire, nk’omuhandiiki wa Zaaburi owaagizire ati: ‘Ninshemezibwa ebiragiro byawe, kandi nimbikunda.’ (Zaaburi 119:47; Abarooma 6:17) Nitwenda kuba nka Noa, owaayorekire ngu naakunda Yehova arikukora buri kimwe eki yaamuragiire kukora. Baibuli neegira ngu Noa akaba “nikwo yaatwaza.” (Okutandika 6:22) Naiwe nooyenda Yehova akugambeho atyo?

12. Nitubaasa kushemeza tuta Yehova?

¹² Yehova naayehurira ata twamworobera? ‘Nitushemeza omutima’ gwe. (Enfumu 11:20; 27:11) Hati teekateeka ahari ekyo! Nitushemeza Omuhangi w’ebintu byona twamworobera. Kwonka tarikutugyema kukikora. Kureka atuhaire obugabe bw’okwecweramu. Eki nikimanyisa ngu twine obugabe bw’okucwamu kukora ekihikire nari ekigwire. Yehova naayenda ngu rukundo ei tumwiniire etuhigye kucwamu gye, kubaasa kutunga amagara agarikukirayo oburungi nk’oku kirikubaasika.—Eky’Ebiragiro 30:15, 16, 19, 20; reeba Ebirikukiraho 3.

‘EBIRAGIRO BYE TIBIRIKURUTSYA’

13, 14. Nituhamya tuta ngu ebiragiro bya Ruhanga tibigumire munonga kubyorobera? Ha eky’okureeberaho.

¹³ Kwonka shi ku twakuba nituteekateeka ngu ebiragiro bya Yehova bigumire munonga kworobera, nari ngu nibituremesa kugira obugabe? Baibuli neekyoreka gye ngu ‘ebiragiro bye tibirikurutsya.’ (1 Yohaana 5:3) Ekigambo ky’Orugriika ‘okurutsya’ nikimanyisa “okuremeera.” Omu byahandiikirwe ebindi, ekigambo eki nikikoresibwa kumanyisa ebiragiro by’amaremesa nari abantu abarikutegyeka abandi, kandi bakabakora kubi. (Matayo 23:4; Ebyakozirwe 20:29, 30) Baibuli eya New English Translation yo neegira ngu “ebiragiro bye tibirikutukiza amaani.” Ebiragiro bya Yehova ‘tibirikuremeera,’ ekirikumanyisa ngu tibigumire munonga kuturema kubyorobera. Butoosha ebi arikutushaba ti maremesa.

¹⁴ Nk’eky’okureeberaho, ka tugire ngu oriyo noohwera munywani waawe kufuruka kuza omu nju endiijo. Ebintu bye byona abitaire omu bibokusi. Ebimwe tibirikuremeera kandi byorobi kukiriza, kwonka ebindi nibiremeera munonga biine kukirizibwa abantu babiri. Mbwenu shi munywani waawe naija kukushaba kukiriza wenka ekibokusi ekirikuremeera munonga? Ngaaha tarikubaasa! Ahabw’enki? Ahakuba tarikwenda ngu ohendekye. Nka munywani waawe ogwo, Yehova tarikubaasa kutushaba kukora ekintu ekigumire munonga. (Eky’Ebiragiro 30:11-14) Yehova naayetegyereza gye oku tukozirwe. “Naamanya obuhangwa bwaitu, naijuka ku turi omucuucu.”​—Zaaburi 103:14.

15. Ahabw’enki nitubaasa kuhamya ngu ebiragiro bya Yehova n’eby’oburungi bwaitu?

¹⁵ Musa akagambira eihanga rya Israeli ngu ebiragiro bya Yehova bikaba biri eby’oburungi bwabo, ‘n’okukiza amagara’ gaabo baabyorobera. (Eky’Ebiragiro 5:28-33; 6:24) Nikyo kimwe n’obunaku obu. Buri kimwe eki Yehova arikutushaba kukora nikiija kutuhwera kuba gye. (Shoma Isaaya 48:17.) Tataitwe Yehova butoosha naamanya ekiraatugasire. (Abarooma 11:33) Baibuli neegira eti: “Ruhanga [ni] rukundo.” (1 Yohaana 4:8) Eki nikimanyisa ngu buri kimwe eki Yehova arikugamba n’eki arikukora naahigwa rukundo.

16. Nitumanya tuta ngu nitubaasa kworobera Yehova n’obu turaabe turi abatahikiriire kandi turikutuura omu nsi esiisikaire?

¹⁶ Hariho obumwe obu kirikutugumira kworobera Ruhanga. Nitutuura omu ensi esiisikaire munonga, kandi eri ahansi y’obutegyeki bw’Omuregi. Naateeraho kureetera abantu kukora ebibi. (1 Yohaana 5:19) Kandi twine kurwanisa enyehurira zaitu n’ebiteekateeko byaitu ebitahikiriire, ebirikubaasa kutureetera kugomera Ruhanga. (Abarooma 7:21-25) Kwonka rukundo ei twiniire Yehova neetuha amaani g’okukora ebihikire. Naareeba okuteeraho kwaitu kumworobera, kandi naatuhwera arikutuha omwoyo gwe gurikwera ogw’amaani maingi. (1 Samueli 15:22, 23; Ebyakozirwe 5:32) Omwoyo ogu nigutuhwera kugira emitwarize erikutubaasisa kumworobera tutagumiirwe.​—Abagalatia 5:22, 23.

17, 18. (a) Nituza kwega ki omu kitabo eki? (b) Nituza kushwijuma ki omu shuura erikukurataho?

¹⁷ Omu kitabo eki, nituza kwega oku turikubaasa kutwaza omu muringo ogurikushemeza Yehova. Nituza kwega oku turikubaasa kugyendera aha misingye ye n’emitindo ye ey’emicwe omu bi turikukora. Ijuka ngu Yehova tarikutugyema kumworobera. Twacwamu kumworobera, nitugira amagara marungi, kandi ebiro byaitu eby’omumaisho nibiija kuba birungi. Ekikuru munonga, ku turikworobera Yehova nitworeka ngu nitumukunda.—Reeba Ebirikukiraho 4.

¹⁸ Yehova kubaasa kutuhwera kumanya ekihikire n’ekigwire, buri omwe ahariitwe akamuha omuntu w’omunda. Twatendeka gye omuntu waitu w’omunda, naabaasa kutuhwera ‘kworobera ebiragiro bye.’ Omuntu waitu w’omunda niki, kandi nitumutendeka tuta? Ka tureebe.