Waahindwirwe Musya?

1, 2. Oku twakuziibwe nari ei turikutuura nikubaasa kutureetera kukora ki?

TWENA nitukora ebintu kurugiirira aha ku twakuziibwe nari ei turikutuura. Nitubaasa kuba nitujwara omu muringo ogurikutaana n’ogw’abandi, turikukunda eby’okurya ebitarikushushana n’eby’abandi, nari turikutwaza omu muringo ogurikutaana aha gw’abandi. Ahabw’enki? N’ahabw’okugira ngu abantu n’ebintu ebitwetoroire nibitureetera kutwaza tutyo.

² Kwonka hariho ebintu ebindi ebikuru ebirikukira eby’okurya ebi turikukunda n’omuringo ogu turikujwaramu. Nk’eky’okureeberaho, nitubaasa kuba tukuziibwe turikumanya ngu ebintu ebimwe bihikire kandi ngu ebindi bigwire. Ebintu nk’ebyo n’ebya buri omwe kwecweramu kandi abantu nibataana aha bi barikucwamu. Nitubaasa kucwamu turikwihirira aha muntu waitu ow’omunda. Baibuli neegira ngu butoosha ‘abanyamahanga abataine Biragiro nibakora ebi ebiragiro biragiira ahabw’obuhangwa.’ (Rom. 2:14) Mbwenu shi ekyo nikimanyisa ngu haaba hatariho misingye kuruga omu Baibuli, twine kukuratira ebyo ebi tukuzire nitumanya nari ebi abandi omu kicweka kyaitu barikureeba nk’ebihikire?

3. Ni nshonga ki ibiri ezirikureetera Abakristaayo kutafa kukuratira emitwarize n’emitindo y’ensi?

³ Hariho enshonga ibiri nkuru ahabw’enki Abakristaayo batashemereire kutwaza batyo. Eky’okubanza, Baibuli neetwijutsya eti: “Hariho omuhanda ogu omuntu ayeta murungi, kwonka omuheru gwagwo guri omuhanda gw’okufa.” (Enf. 16:25) Ahabw’okugira ngu tituhikiriire, titurikubaasa kumanya gye yaaba ebi turaacwemu nibiija kutugasira. (Enf. 28:26; Yer. 10:23) Ekya kabiri, Baibuli neeyoreka ngu emitwarize n’emitindo y’ensi nibitegyekwa Sitaane, “ruhanga w’ensi egi.” (2 Kor. 4:4; 1 Yoh. 5:19) N’ahabw’ekyo, ku turaabe nitwenda ngu Yehova atuhe emigisha kandi atusiime, twine kugyendera aha buhabuzi oburi omu Abarooma 12:2.​—Kishome.

4. Nituza kushwijuma ki omu kicweka eki?

⁴ Abarooma 12:2 harimu enshonga nkuru ezi twine kutaho omutima. (1) Ahabw’enki twine ‘kuhindurwa basya’? (2) Niki ekirikutwarirwa omu kuhindurwa basya? kandi (3) Nitubaasa kuhindurwa basya tuta? Ka tushwijume ebibuuzo ebi.

AHABW’ENKI TWINE KUHINDURWA BASYA?

5. Obuhabuzi bwa Paulo oburi omu Abarooma 12:2 okukira munonga akaba abuhandiikiire baahi?

⁵ Ebigambo by’entumwa Paulo ebiri omu baruha ei yaahandiikiire Abarooma omu gwa 56, bikaba bitari by’okuhwera abatari baikiriza, kureka Abakristaayo bagyenzi be abashukirweho amajuta. (Rom. 1:7) Akabahiga ati: “Mutashushanisibwa n’ab’obusingye obu.” Obusingye obwo bukaba nibutwariramu emitindo, emigyenzo, emitwarize, n’enjwara y’Abarooma. Paulo okugira ngu “murekye” [NW], nikimanyisa ngu ab’eishe-emwe abamwe bakaba baine emiteekateekyere nk’ey’Abarooma abandi abaabaire batari Bakristaayo. Eki kikakwata kita aha b’eishe-emwe obunaku obwo?

6, 7. Omu bunaku bwa Paulo, emitwarize n’ediini z’Abarooma bikareetera bita Abakristaayo kugumirwa kukora ekihikire?

⁶ Obunaku obu, abarikurambura omuri Rooma nibareeba ebitsigarira bya zaahekalu, ebituuro, ebiijutsyo, ebishaayi n’ebindi nk’ebyo. Bimwe ahari ebi bikaba biriho omu kyasha ky’okubanza. Ebintu ebyo ebya ira, nibibaasa kutumanyisa ebi Abarooma baabaire nibakunda kukora n’ediini zaabo. Omu bitabo by’ebyafaayo nitubaasa kushoma aha mizaano yaabo, ebigaari by’empaka, n’ebyeshongoro ebirikukwata aha bintu bitari bimwe na bimwe, kandi bingi aharibyo bikaba nibihemurana. Kandi Rooma ekaba neemanywa omu by’obushuubuzi, n’ahabw’ekyo abantu bakaba baine emigisha mingi y’okuba abatungi.​—Rom. 6:21; 1 Pet. 4:3, 4.

⁷ N’obu baraabe baabaire baine hekalu nyingi na baaruhanga baingi, tihariho buhame oburikworeka ngu Abarooma bakaba baine omukago guhami na baaruhanga abo. Ediini zaabo zikaba zirimu emigyenzo mingi erikukwata aha kuzaara, obushwere, n’aha bafu. Ebyo byona bikaba nibireetera Abakristaayo b’omuri Rooma kugumirwa kukora ekihikire. Baingi aharibo bakakurira omu mbeera nk’ezo, n’ahabw’ekyo bakaba baine kuhinduka basya kubaasa kuba Abakristaayo abaabuzima, kandi okuhindurwa kwabo kukaba kutaine kuhendera baaheza kubatizibwa.

8. Ensi neeteeraho eta kuremesa Abakristaayo kukora ekihikire obunaku obu?

⁸ Nk’oku kyabaire kiri omu bwire bw’Abarooma, ensi egi neeteeraho kuremesa Abakristaayo kukora ekihikire. Ahabw’enki kiri kityo? Ahabw’okuba omwoyo gw’ensi nigureebekyera omu miringo mingi. (Shoma Abaefeso 2:2, 3; 1 Yohaana 2:16.) Ensi neeteeraho kutureetera kukuratira emiteekateekyere, ebyetengo, emicwe n’emitwarize yaayo. Hariho enshonga ehikire ahabw’enki butoosha twine kukuratira obuhabuzi bwa Ruhanga obu: “Mutashushanisibwa n’ab’obusingye obu, kureka muhindurwe basya.” Niki eki twine kukora?

NIKI EKIINE KUHINDURWA?

9. Omuntu atakahikire aha kubatizibwa, ni mpindahinduka ki ezi aine kukora?

⁹ Omuntu yaatandika kwega Baibuli akagyendera aha mazima agarimu, naatandika kukora empindahinduka. Kurugiirira aha bi arikwega naakora empindahinduka ezirikwetengyesa. Naareka ebikorwa by’ediini ebigwire n’emitwarize ye egwire reero agira emitwarize mirungi nk’eya Kristo. (Efe. 4:22-24) Nitushemererwa kureeba abantu baingi nibakora empindahinduka nk’ezo buri mwaka, bakahika aha kwehayo ahari Yehova Ruhanga n’okubatizibwa. Hatariho kubanganisa, ekyo nikishemeza Yehova. (Enf. 27:11) Kwonka twine kwebuuza tuti: Ezi nizo mpindahinduka zonka ezi twine kukora?

10. Okuhindurwa basya nikitaana kita aha kuboneza ekintu?

¹⁰ Buzima okuhindurwa basya nikikira aha kuhindura nari kuboneza emitwarize yaitu yonka. Ekintu ekirikuguzibwa nibabaasa kukihandiikaho ngu “kiboneziibwemu,” ekirikumanyisa ngu haine ebi bongyeiremu kukiboneza. Kwonka noobaasa kushanga bongyeiremu ekintu kimwe ekisya nari bahindwire aha muringo ogu kishembirwemu. Kashoboorozi erikushoboorora aha Baibuli, neegira ngu ekigambo ‘okuhindurwa basya’ ekiri omu Abarooma 12:2, nikitwariramu okuhindura emiteekateekyere yaitu turikuhwerwa omwoyo ogurikwera. N’ahabw’ekyo okuhinduka kw’Omukristaayo tikirikumanyisa okureka emize mibi, emigambire mibi n’ebikorwa bibi kwonka. N’abantu abatarikukuratira emisingye ya Baibuli nibabaasa kuteeraho kwetantara ebintu nk’ebyo. Mbwenu shi, niki ekirikutwarirwa omu kuhindurwa basya?

11. Paulo akagira ngu niki ekirikwetengyesa omuntu kubaasa kuhindurwa musya?

¹¹ Paulo akagira ngu “muhindurwe basya ahabw’okugarurwa obusya omu biteekateeko byanyu.” Ekigambo ‘ebiteekateeko’ nikikwata aha miteekateekyere yaitu. Kandi nk’oku kirikukoresibwa omu Baibuli, nikitwariramu obushoboorozi bw’okuteekateeka. Enyimaho omu baruha ei Paulo yaahandiikire Abarooma, akabagambaho nk’abaine “emitima etarikusiimwa.” Ekyo kikareetera Abarooma kugira emitwarize ‘nk’okutahikiirira, obubi, omururu, n’okwangana, eihari, obwitsi, entongane, obugobya,’ n’ebindi bintu bibi. (Rom. 1:28-31) Niyo nshonga ahabw’enki Paulo yaahigire abantu abaakuriire omu mbeera nk’ezo, abaahindukire abaheereza ba Ruhanga ‘kuhindurwa basya’ kandi ‘bakahindurwa busya omu biteekateeko byabo.’

12. Abantu obunaku obu baine miteekateekyere ki, kandi neebaasa kuba eta ey’akabi aha Bakristaayo?

¹² Abantu omu nsi egi bari nk’abu Paulo yaagambireho. Nibateekateeka ngu okworobera ebiragiro n’emisingye ya Baibuli n’eky’obushema. Abashomesa n’abazaire baingi nibashwekyerera ebikorwa bibi kandi baikiriza n’abaana baabo kukora eki barikwenda kyona. Nibagira ngu buri omwe naabaasa kwecweramu ekihikire n’ekigwire. Nangwa n’abo abarikwetwara nk’abanyadiini, tibarikufayo kworobera Ruhanga n’ebiragiro bye. (Zab. 14:1) Emiteekateekyere nk’egi, neebaasa kuba ey’akabi aha Bakristaayo ab’amazima. Baaba bategyendesereize, nibabaasa kutagyendera aha buhabuzi obu turikuheebwa ekibiina kya Ruhanga, batandikye n’okwetomboita aha buri kintu eki batarikukunda. Nari nibabaasa kwanga kwikiriza obuhabuzi kuruga omu Baibuli oburikukwata aha by’okweshemeza, okukoresa Intaneeti, n’obwegyese bw’ahaiguru.

13. Twaba nitweshwijuma, ahabw’enki twine kuba ab’amazima?

¹³ Kubaasa kwetantara kushushanisibwa n’ab’ensi egi, twine kushwijuma emiteekateekyere yaitu, enyehurira, ebigyendererwa, n’emitwarize yaitu. Ebintu nk’ebyo nibibaasa kuba bitarikureebwa bandi. Nibabaasa kutugira ngu nitutwaza gye. Kwonka niitwe twenka abarikubaasa kumanya yaaba ebi twegire omu Baibuli nitubiikiriza kutuhindura kandi nitugumizamu kukora empindahinduka.​—Shoma Yakobo 1:23-25.

OKU TURIKUBAASA KUHINDURWA BASYA

14. Niki ekirikubaasa kutuhwera kukora empindahinduka ezirikwetengyesa?

¹⁴ Kubaasa kuhindurwa basya, twine kuhindura ebiri omu mutima gwaitu, ekirikumanyisa eki turi buzima. Niki ekirikubaasa kutuhwera omu nshonga egi? Twaheza kumanya eki Yehova arikutwenza aha bikwatiraine n’ebigyendererwa bye nk’oku biri omu Baibuli, oku turikubitwara nikworeka eki turi omu mutima n’empindahinduka ezi twine kukora kuhikaana ‘n’ebi Ruhanga akunda.’​—Rom. 12:2; Heb. 4:12.

15. Nituhindurwa basya tuta, Yehova ku arikutubumba?

¹⁵ Shoma Isaaya 64:8. Eky’okureeberaho eki nabi Isaaya yaakoreise, nikitwegyesa ekintu kikuru. Omubumbi waitu Yehova naatubumba ata nk’eibumba? Buzima ku arikutubumba, tarikutuhindura oku turikushusha aha mubiri. Yehova tarikututendeka omu by’omubiri kureka naatutendeka omu by’omwoyo. Twaikiriza kutubumba, nituhindurwa basya omu by’omwoyo ekirikutuhwera kwetantara emiteekateekyere y’ensi. Yehova naatubumba ata?

16, 17. (a) Omubumbi naatebeekanisa ata eibumba atakarikoreise kubumba ekintu? (b) Ekigambo kya Ruhanga nikituhwera kita kuhindurwa basya tukaba ab’omugasho omu maisho ga Yehova?

¹⁶ Omubumbi kubaasa kubumba ekintu kirungi, aine kukoresa eibumba rirungi. Kwonka, hariho ebintu bibiri ebi aine kukora. Eky’okubanza, aine kwozya eibumba akaihamu ebintu ebitarikwetengyesa. Ekya kabiri, eibumba aine kurijwanzyamu amaizi agahikire, akarikaata kugira ngu yaaza kurikoresa ribe ryorobi.

¹⁷ Yetegyereze ngu amaizi nigakoresibwa omu kuboneza eibumba kwihamu ebintu ebitarikwetengyesa, n’omu kuhwera eibumba kworoba kugira ngu rikoresibwe gye omu kubumba. Nk’oku amaizi garikuhindura eibumba, nikwo n’Ekigambo kya Ruhanga kirikutuhindura. Nikibaasa kutuhwera kweihamu emiteekateekyere egwire ei twabaire twine tutakamanyire Ruhanga, reero tuhindurwe basya, kandi ekyo n’eky’omuhendo omu maisho ge. (Efe. 5:26) Teekateeka aha mirundi ei turikugambirwa kushoma Baibuli buri izooba, n’okuguma nituza omu nteerane ei Ekigambo kya Ruhanga kirikwegyesibwa. Ahabw’enki nituhigwa kukora ebintu ebi? N’ahabw’okugira ngu twabikora, nituba nitwikiriza Yehova kutubumba.​—Zab. 1:2; Byak. 17:11; Heb. 10:24, 25.

18. (a) Ahabw’enki ni kikuru kuteekateeka aha bi turikwega twaba nitwenda ngu ekigambo kya Ruhanga kituhwere kuhinduka basya? (b) Ni bibuuzo ki ebirikubaasa kutuhwera kukora ekyo?

¹⁸ Ekigambo kya Ruhanga kubaasa kutuhindura basya, twine kukora ekirikukira aha kukishoma buri izooba n’okwega ebirimu. Abantu baingi obumwe nibashoma Baibuli kandi nibabaasa kuba nibamanya ebirimu. Noobaasa kuba oraashangireho abantu nk’abo omu kubuurira. Abamwe nibabaasa n’okugamba ebyahandiikirwe kuruga omu mutwe.a Kwonka ekyo nikibaasa kutabahwera kuhindura emiteekateekyere n’emitwarize yaabo. Ahabw’enki? Ahabw’okuba Ekigambo kya Ruhanga kubaasa kuhwera omuntu kuhinduka, aine kwikiriza kikamuhikira kimwe omunda omu mutima. N’ahabw’ekyo, twine kugira obwire tukateekateeka aha bi turikwega. Nikiba kiri kirungi kwebuuza tuti: ‘Ninkyetegyereza ngu ebi ndikwega ti nyegyesa z’ediini kwonka? Nimpamiza kimwe ntaine kubanganisa kwona ngu aga nigo mazima? Hariho ahu nyine kukora empindahinduka kubaasa kugyendera aha bi ndikwega, beitu kutari kuteekateeka ngu n’ebintu ebi nyine kwegyesa abandi? Mbwenu shi niinyikiriza ngu ebi ndikwega nibiruga ahari Ruhanga, kandi ngu naaba ari nk’orikugamba naanye?’ Okuteekateeka munonga aha bibuuzo nk’ebi, nikiija kutuhwera kwirira haihi na Yehova. Nitwija kweyongyera kumukunda. Kandi ekyo nikiija kutureetera kukora empindahinduka.​—Enf. 4:23; Luk. 6:45.

19, 20. Ni buhabuzi ki obwa Baibuli oburikubaasa kutugasira munonga twabugyenderaho?

¹⁹ Okushoma Ekigambo kya Ruhanga obutoosha n’okuteekateeka aha bi turikwega nikituhiga kugumizamu: ‘kujuura omuntu owa ira n’emitwarize ye, tukajwara omuntu omusya, ohindurwa musya obutoosha omu bwengye.’ (Kol. 3:9, 10) Twayetegyereza eki Baibuli erikwegyesa kandi tukagyendera aha bi turikwega, nikiija kutuhiga kujwara omuntu omusya ekiraatuhwere kwetantara emitego ya Sitaane.

²⁰ Entumwa Petero naatwijutsya ati: “Nk’abaana abarikuhurira, mutashushanisibwa nk’oku mwabaire muri, nimukurata okwetenga okubi,” kureka mube “abarikwera omu micwe yaanyu yoona.” (1 Pet. 1:14, 15) Twakora kyona ekirikubaasika kwetantara emitwarize yoona ei twabaire twine ira, kandi tukaikiriza kuhindurwa basya, nitwija kutunga ebirungi nk’oku turikuza kureeba omu kicweka ekirikukurataho.