Okuba Payoniya Nikuhamya Omukago Gwaitu Na Ruhanga

1, 2. (a) Twateekateeka aha muntu ou turikukunda kandi tukamugambaho, niharugamu ki? (Reeba ekishushani aha kubanza.) (b) Ni bibuuzo ki ebi turikuza kushwijuma?

OKUTEEKATEEKA n’okugamba aha muntu ou orikukunda nikibaasa kuhamya omukago gwawe n’omuntu ogwo. Nikyo kimwe n’omukago gwaitu na Yehova Ruhanga. Daudi ku yaabaire aba ariisize akaba amara obwire bwingi arikureeba ebihangirwe eby’ahaiguru kandi ateekateeka ahari ogwo owaabihangire. Akahandiika ati: “Ku nteekateeka aha iguru ryawe eri waahangire n’engaro zaawe, okwezi n’enyonyoozi ebi waataireho, omuntu ni kintu ki iwe kumwijuka? Nari shi omwana w’omuntu iwe kumutaayaayira?” (Zab. 8:3, 4) Entumwa Paulo bwanyima y’okuteekateeka aha ku Yehova yaabaire ariyo naahikiiriza ekigyendererwa kye aha bashukirweho amajuta, akagira ati: “Yeimwe! obutungi bwa Ruhanga, obwengye bwe n’okumanya kwe ka bitaine bugarukiro!”​—Rom. 11:17-26, 33.

² Ku turikuba nitubuurira, nituteekateeka ahari Yehova kandi tumugambaho. Ekyo kyonka nikirugamu ebirungi. Baingi abari omu buheereza obw’obutwire, bashangire ngu okwongyera aha buheereza bwabo nikibabaasisa kukundira kimwe Ruhanga. Ku oraabe ori omu buheereza obw’obutwire nari oine ekigyendererwa ekyo, teekateeka ahari eki: Obuheereza obw’obutwire nibubaasa kuhamya buta omukago gwawe na Yehova? Ku oraabe ori payoniya yeebuuze ekibuuzo eki: ‘Niki ekiraambasise kugumizamu omu buheereza obu?’ Ku oraabe otari payoniya yeebuuze oti: ‘Nimbaasa kukora mpindahinduka ki kubaasa kuba payoniya?’ Ka tureebe oku obuheereza obw’obutwire burikubaasa kuhamya omukago gwaitu na Ruhanga.

OBUHEEREZA OBW’OBUTWIRE HAMWE N’OMUKAGO GWAITU NA RUHANGA

3. Okugamba aha migisha y’Obukama omu kubuurira, nikituhwera kita?

³ Okubuurira abandi aha migisha y’Obukama erikwija kubaho nikutwiriza haihi na Yehova. Ni kyahandiikirwe ki eki orikukunda kukoresa waaba noobuurira enju aha nju? Mbwenu shi ni Zaaburi 37:10, 11; Danieli 2:44; Yohaana 5:28, 29; nari Okushuuruurwa 21:3, 4? Buri kugaaniira n’abantu aha biraganiso ebyo, nituba nitweijutsya ngu Ruhanga n’omunyambabazi kandi ngu niwe arikutuha “engabirano yoona enungi n’ekiconco kyona ekihikire.” Eki nikitureetera kwirira haihi nawe.​—Yak. 1:17.

4. Twareeba embeera mbi ey’eby’omwoyo ei abandi barimu nikitureetera kita kwongyera kusiima amazima?

⁴ Twareeba embeera mbi ey’eby’omwoyo ey’abo abu turikuba nitubuurira nikitureetera kwongyera kusiima amazima. Abantu omu nsi tibaine buhabuzi oburikwesigwa oburikubaasa kubahwera kusingura n’okugira okushemererwa. Baingi nibeerarikirira kandi tibaine matsiko aha biro by’omumaisho. Nibateeraho kusherura okushemererwa. Nangwa n’abarikweyeta abanyadiini tibarikumanya gye Ebyahandiikirwe. Nibashushana n’abantu ba Nineeve orwa ira. (Shoma Yona 4:11.) Twayejumbira kimwe omu kubuurira, nitwetegyereza gye entaaniso eri ahagati y’embeera y’eby’omwoyo ey’abo abatarikuheereza Yehova barimu n’ey’abaheereza be. (Isa. 65:13) Yehova naatureeberera omu by’omwoyo kandi atworeka n’oburungi bwe arikutweta kuhuumurizibwa n’okugira amatsiko agaabuzima.​—Kush. 22:17.

5. Okwegyesa abandi amazima nikituhwera kita kutahwamu amaani twaba twine oburemeezi?

⁵ Okwegyesa abandi amazima nikituhwera kutahwamu amaani twaba twine oburemeezi. Payoniya ow’obutwire orikwetwa Trisha, akareeba ngu ago n’amazima obu abazaire be baataana. Naagira ati: “Nkaguubwa kubi munonga abazaire bangye ku baataanire.” Eizooba rimwe akaba aine amaganya arikuhurira arikwenda kuguma omu ka, kwonka akacwamu kuza kwegyesa abeegi be bashatu bato abaabaire nibatuura omu ka erimu oburemeezi bw’amaani. Ishebo akaba abatsigireho, kandi na mukuru waabo akaba naabatwariza kubi. Trisha naagira ati: “Oburemeezi obwangye bukaba buri bukye waabugyeragyeranisa n’obwabo. Omu kwega, bakaba nibamwenya ahabw’okushemererwa. Abaana abo bakambeera nk’ekiconco kuruga ahari Yehova, na munonga eizooba eryo.”

6, 7. (a) Okwegyesa abantu amazima g’omu Baibuli, nikuhamya kuta okwikiriza kwaitu? (b) Twareeba abeegi ba Baibuli barikukora empindahinduka ahabw’okugyendera aha misingye ya Baibuli, nitweyongyera kusiima tuta obwengye bwa Ruhanga?

⁶ Okwegyesa abandi amazima g’omu Baibuli nikihamya okwikiriza kwaitu. Entumwa Paulo akahandiikira Abayudaaya abaabaire batarikugyendera aha bi barikwegyesa ati: “Iwe oyegyesa abandi, toyeyegyesa?” (Rom. 2:21) Nikyo kimwe na baapayoniya obunaku obu! Baine emigisha mingi y’okubuurira abantu amazima n’okubeegyesa Baibuli. Kubaasa kukikora gye, baine kwetebeekanisa gye barikuza kwega na buri mwegi kandi bakacondooza kubaasa kugarukamu ebibuuzo. Payoniya orikwetwa Janeen naashoboorora ati: “Buri murundi ogu ndikutunga omugisha kwegyesa abandi amazima, nimpurira amazima garikweyongyera kutaahira kimwe omu biteekateeko n’omu mutima gwangye. Ekirikurugamu, okwikiriza kwangye nikweyongyera kukura.”

⁷ Twareeba abeegi ba Baibuli barikukora empindahinduka ahabw’okugyendera aha misingye ya Baibuli, nitweyongyera kusiima obwengye bwa Ruhanga. (Isa. 48:17, 18) Ekyo nikituhwera kumariirira kugumizamu turikugyendera aha misingye egyo. Payoniya ondiijo orikwetwa Adrianna, akagira ati: “Abantu nibaba bari omu kabi ku barikwesiga obwengye bwabo. Kwonka ku barikutandika kwesiga obwengye bwa Yehova, nibagasirwa omu muringo oguhikire.” Phil nawe naagira ati: “Nooreeba oku Yehova arikuhindura abantu abaabaire nibateeraho kukora empindahinduka ahabw’abo,” kwonka bakaremwa.

8. Okubuurira n’abandi nikitugaruramu kita amaani?

⁸ Okubuurira n’abandi nikitugaruramu amaani. (Enf. 13:20) Baapayoniya nibamara obwire bwingi barikubuurira n’ababuurizi abandi. Eki nikibahwera ‘kugumyana.’ (Rom. 1:12; shoma Enfumu 27:17.) Payoniya orikwetwa Lisa naagira ati: “Aha murimo, hariyo omuze gw’okuhayahayana n’okugirirana eihari. Buri izooba nibasiiba nibagaamburana kandi barikukoresa ebigambo bibi. Obumwe nibakujuma kandi bakushekyerera ahabw’okugira ngu ori Omukristaayo. Kwonka waabuurira n’ab’eishe-emwe, buzima nikigaruramu amaani. Bwanyima y’okubuurira ku ndikugaruka omu ka, nimpurira mmazirwe n’obu ndikuba nduhire.”

9. Baapayoniya baabuurira n’abu bari nabo omu bushwere, nikihamya kita omurunga gw’enyabushatu?

⁹ Baapayoniya baabuurira n’abu bari nabo omu bushwere, nikihamya omurunga gw’enyabushatu. (Mub. 4:12) Madeline, orikuheereza nka payoniya hamwe na iba, naashoboorora ati: “Nyowe n’ibanyi nitumara obwire turikugamba aha byabaho omu kubuurira nari aha bi tushangire omu kushoma Baibuli ebi turikubaasa kukoresa omu kubuurira. Buri mwaka nitweyongyera kwirirana haihi ahabw’okuheereza hamwe nka baapayoniya.” Na Trisha naagira ati: “Twembi nitwetantara amabanja, n’ahabw’ekyo titurikurwanira sente. Twine entebeekanisa y’okubuurira erikushushana, n’ahabw’ekyo nitugarukayo hamwe aha bu twabuuriire, n’aha beegi baitu ba Baibuli, ekirikutuhwera kuhamya obushwere bwaitu.”

10. Nitweyongyera kwesiga Yehova tuta twayebembeza eby’Obukama, tukareeba oku arikutushagika, akagarukamu n’okushaba kwaitu?

¹⁰ Nitweyongyera kwesiga Yehova twayebembeza eby’Obukama, tukareeba oku arikutushagika, akagarukamu n’okushaba kwaitu. Abakristaayo boona bashemereire kwesiga Yehova. Kwonka abo abari omu buheereza obw’obutwire nibamanya ngu okwesiga Yehova nikibahwera kuguma bari baapayoniya. (Shoma Matayo 6:30-34.) Payoniya orikwetwa Curt, kandi orikuhwera omureeberezi orikutaayaayira ebibiina, akaikiriza kutaayaayira ekibiina ekyabaire kiri omu mwanya ogurikutwara eshaaha ibiri n’ekicweka kuhikayo. Kwonka we n’omukazi we ori payoniya, bakaba bataine majuta g’emotoka ag’okubahitsyayo n’okubagarura, kandi hakaba nihaburayo esaabiiti emwe akatunga omushaara aha murimo. Curt naagira ati: “Nkatandika kwebuuza yaaba naacwamu gye.” Bwanyima y’okushaba Ruhanga, bakagira obwesigye omuriwe ngu naija kubabaasisa kutunga ebi barikwetenga kuhikiiriza obujunaanizibwa obwo. Ku baabaire bari haihi kutandika orugyendo rwabo, munyaanyazi-itwe omwe akabateerera esimu yaabagira ngu abainiire ekiconco. Akabaha sente zenyine ezi baabaire nibenda kubabaasisa kuheza orugyendo rwabo. Curt naayongyera agira ngu, waaba orarabire omu bintu nk’ebyo, nikikworobera kumanya ngu Yehova naatuha ebi turikwetenga.

11. Ahabw’enki turikubaasa kugira ngu okuba payoniya nikurugamu ebirungi?

¹¹ Buzima, baapayoniya ku barikwejumbira kimwe omu kuheereza Yehova kandi bakagira omukago murungi nawe, emigisha ye etaine bugarukiro ‘neebahikaho.’ (Bir. 28:2) Kwonka okuba payoniya nakwo kurimu oburemeezi. Tihariho muheereza wa Ruhanga otarikuhikwaho buremeezi obwaretsirweho obugomi bwa Adamu. N’obu baapayoniya abamwe baraabe bareebire ngu nikibetengyesa kubanza kurekyera aho kumara obwire, oburemeezi nk’obwo nibubaasa kwemerwa nari kwetantarwa. Niki ekirikubaasa kubahwera kugumizamu n’obuheereza bwabo?

OKUGUMA OMU BUHEEREZA OBW’OBUTWIRE

12, 13. (a) Payoniya aine kukora ki yaaba naagumirwa kuhitsya eshaaha ezi aine kuhayo buri kwezi? (b) Ahabw’enki ni kikuru okutaho entebeekanisa y’okushoma Baibuli buri izooba, okweshomesa, n’okuteekateeka aha bi arikwega?

¹² Baapayoniya abaingi nibaba baine eby’okukora bingi. Nikibaasa kubagumira kukora buri kimwe, n’ahabw’ekyo okukora entebeekanisa nungi ni kikuru. (1 Kor. 14:33, 40) Kyaba nikigumira payoniya kuhitsya eshaaha ezi aine kuhayo buri kwezi, nikibaasa kumwetengyesa kushwijuma oku arikukoresa obwire bwe. (Efe. 5:15, 16) Naabaasa kwebuuza ati: ‘Niimara bwire burikwingana ki omu by’okweshemeza? Nikinyetengyesa kwega kwerinda n’okwezibira? Nimbaasa kuhindahindura omu ntebeekanisa y’omurimo gwangye?’ Niimara obwire bwingi aha bintu ebitari bikuru munonga?’ Baapayoniya bashemereire kwebuuza ebibuuzo ebi butoosha kandi bakakora empindahinduka kyaba nikyetengyesa.

¹³ Entebeekanisa ya payoniya eshemereire kuba eriho okushoma Baibuli buri izooba, okweshomesa, n’okuteekateeka aha bi arikwega. Payoniya aine kuhamya ngu ebintu ebitari bikuru tibyatwara obwire obu ashemereire kuba naakoreramu ebintu ebikuru munonga. (Fil. 1:10) Nk’eky’okureeberaho, teekateeka ahari payoniya arikugaruka omuka bwanyima y’okubuurira eizooba ryona. Yaahika omuka, naayenda kutandika kutebeekanisiza enteerane. Kwonka abanza kushoma obutumwa aha kompyuta. Yaaheza kubushoma, agarukamu ogwo owaabwohereza. Akiheza, abanza areeba aha Intaneeti omuhendo gw’ekintu eki arikwenda kugura ku guraabe gushazirwe. Akiza kwetegyereza, ashanga haarabireho eshaaha nka ibiri, kwonka takatandikire kutebeekanisa nk’oku yaaba aine kukora omwabazyo ogwo. Ahabw’enki eki n’eky’akabi? Omuzaani w’emizaano rurangaanwa aine kuguma naareeberera gye omubiri gwe yaaba naayenda kumara obwire buraingwa omu mizaano. Nikyo kimwe, payoniya aine kugira entebeekanisa nungi y’okuhamya omukago gwe na Ruhanga kurabira omu kweshomesa, yaaba naayenda kugumizamu n’obuheereza obw’obutwire.​—1 Tim. 4:16.

14, 15. (a) Ahabw’enki baapayoniya baine kumarwa n’ebi baine? (b) Payoniya yaatunga oburemeezi, ashemereire kukora ki?

¹⁴ Baapayoniya abasinguzi nibateeraho kumarwa n’ebi baine. Yesu akahiga abakuratsi be kumarwa n’ebi baine. (Mat. 6:22) Yesu akamarwa n’ebi yaabaire aine kubaasa kuhikiiriza obuheereza bwe ataine kirikumuhuzya. Akagira ati: “Zaamuha ziine ebiina, n’enyonyi z’omu mwanya ziine ebyashuri; kwonka Omwana w’omuntu taine na h’okuta omutwe.” (Mat. 8:20) Payoniya orikwenda kutooreza Yesu, aine kwijuka ngu yaaba aine ebintu bingi nikiija kumwetengyesa kubireeberera, kubihunduuza n’okugura ebindi ebimwe byasiisikara.

¹⁵ Baapayoniya nibamanya ngu obuheereza bwabo n’obw’omutaano, kwonka tikirikumanyisa ngu nibakira abandi. Ekiconco kyona eki barikubaasa kuba baine, bakiine ahabw’embabazi za Ruhanga. N’ahabw’ekyo, baaba nibenda kugumizamu bari baapayoniya, buri omwe aine kwesiga Yehova. (Zab. 121:1, 2) Kwonka abamwe nibabaasa kutunga oburemeezi. (Zab. 34:19) Baapayoniya baatunga oburemeezi, baine kushaba Yehova obuhabuzi kandi baikirize abahwere, omu mwanya gw’okurekyera aho obuheereza bwabo. (Shoma Zaaburi 37:5.) Yaabaha obuhwezi, nibaija kwongyera kumwirira haihi nka Ishebo ow’omu iguru orikubafaho.​—Isa. 41:10.

NOOBAASA KUBA PAYONIYA?

16. Waaba nooyenda kuba payoniya, oine kukora ki?

¹⁶ Waaba nooyenda kutunga emigisha nk’ey’abo abari omu buheereza obw’obutwire, gambira Yehova ekyetengo kyawe. (1 Yoh. 5:14, 15) Gamba n’abo abari baapayoniya hati. Taho ebigyendererwa ebiraakuhwere kuba payoniya. Eki nikyo Keith na Erika baakozire. Bakaba baine emirimo erikubatwarira obwire bwingi kandi nk’abandi ab’emyaka yaabo, bakaba baguzire enju n’emotoka bwanyima y’okutaaha omu bushwere. Nibagira bati: “Tukaba nituteekateeka ngu ebintu ebyo nibiija kutureetera kumarwa, kwonka tibirabaasize kukureeta.” Keith ku yaabingirwe aha murimo, yaaba payoniya omuhwezi. Naagira ati: “Okuba payoniya omuhwezi kikampwera kumanya ngu okushemererwa okwingi nikuruga omu kwejumba omu kubuurira.” Bakanywana baapayoniya omushaija n’omukazi we abaabahwereire kureeba okushemererwa okurikuruga omu kumarwa n’ebi oine n’okuba payoniya. Keith na Erika bakakora ki? “Tukahandiika ebigyendererwa byaitu twabihanika aha furiigi, kandi eki twabaire tuhikiiriza tukaba tukicebera.” Ku haahingwireho obwire, bakabaasa kuba baapayoniya ob’obutwire.

17. Ahabw’enki kiri eky’obwengye kweshwijuma okareeba ku oraabe noobaasa kuba payoniya?

¹⁷ Noobaasa kuba payoniya? Ku kiraabe kitarikubaasika hati, kora kyona ekirikubaasika kwirira haihi na Yehova orikwejumbira kimwe omu kubuurira. Waashaba kandi okeeshwijuma, noobaasa kushanga ngu okukora empindahinduka omu ntebeekanisa yaawe nari omu ku orikukoresa obwire bwawe, nikukubaasisa kuba payoniya. Waaba payoniya, okushemererwa oku oraatungye nikwija kukira ebi oraabe ofeereirwe. Noija kwongyera kutunga okumarwa okurikuruga omu kwebembeza eby’Obukama. (Mat. 6:33) Okushemererwa kwawe nikwija kweyongyera ahabw’okuha abandi. Kandi, noija kutunga obwire bwingi bw’okuteekateeka n’okugamba ahari Yehova, ekiraakuhwere kwongyera kumukunda n’okumushemeza.