Nooyefeerereza Kugira Ebi Waahayo Ahabw’obukama?

1. Abantu baingi nibeefeerereza ki, kandi n’ahabw’enki?

ABANTU nibeefeerereza kukora ebintu ebi barikutwara nka bikuru. Abazaire nibakoresa obwire bwabo, esente zaabo, n’amaani gaabo kuhwera abaana baabo. Omwiruki orikuba naayenda kujwekyera eihanga rye omu mpaka z’okwiruka, bagyenzi be baaba bariyo nibazaana, we naamara eshaaha nyingi buri izooba arikutendekwa. Na Yesu akeefeerereza ahabw’ebintu ebi yaabaire naatwara nka bikuru. Akaba atarikwesherurira by’obutungi, kandi akaba ataine baana. Omu mwanya gw’ekyo, akacwamu kuta omutima aha kushagika eby’Obukama. (Mat. 4:17; Luk. 9:58) N’abakuratsi be bakeefeerereza bingi kubaasa kushagika Obukama bwa Ruhanga. Bakaba nibatwara eby’Obukama nka kikuru, kandi bakeefeerereza kugira ngu babaase kubushagika. (Mat. 4:18-22; 19:27) N’ahabw’ekyo noobaasa kwebuuza oti: ‘Niki eki ndikutwara nka kikuru?’

2. (a) Ni kwefeerereza ki oku Abakristaayo ab’amazima barikutwara nka kukuru? (b) Nikwefeerereza ki oku abamwe bakozire?

² Okwefeerereza okumwe ni kukuru aha Bakristaayo ab’amazima kandi nikutuhwera kuguma twine omukago murungi na Yehova. Okwefeerereza oku nikutwariramu okugira obwire bw’okushaba, okushoma Baibuli, okwejumba omu kuramya kw’eka, okuza omu nteerane, n’okubuurira.a (Yos. 1:8; Mat. 28:19, 20; Heb. 10:24, 25) Ahabw’okuteeraho kwaitu n’obuhwezi bwa Yehova, omurimo gw’okubuurira guriyo nigweyongyerera kimwe kandi baingi nibahimintikira aha ‘rushozi rw’enju ya’ Yehova. (Isa. 2:2) Kubaasa kushagika Obukama, abamwe bacwiremu kuheereza aha Beseeli, kuhwera omu kwombeka Ebyombeko by’Obukama n’ebirikubamu enteerane empango, kuhwera omu kutebeekanisa enteerane empango, nari kuhwera abahikirweho ebihikiirizi. Okukora ebi, tikyo kirikuhaisa omuntu amagara agatahwaho kwonka ni bikuru omu kushagika eby’Obukama.

3. (a) Nitugasirwa tuta twayefeerereza ahabw’Obukama? (b) Ni bibuuzo ki ebi turikuza kushwijuma?

³ Obunaku obu okushagika omurimo gw’Obukama nikyetengyesa munonga. Nikishemeza kureeba baingi barikwefeerereza bakahayo ahari Yehova beekundiire. (Shoma Zaaburi 54:6.) Omutima nk’ogwo ogw’okwefeerereza nigutureetera okushemererwa kwingi obwo tutegyereize Obukama bwa Ruhanga. (Bir. 16:15; Byak. 20:35) Kwonka, twena twine kweshwijuma gye. Ni miringo ki endiijo ei turikubaasa kwefeererezamu ahabw’Obukama? Nitukoresa tuta obwire bwaitu, esente zaitu, amaani gaitu, n’okubaasa kwaitu? Ni bintu ki ebi tushemereire kuguma nitwijuka? Ka tureebe eky’okureeberaho eki turikubaasa kutooreza twaba nituhayo twekundiire, ekiraatuhwere kwongyera kushemererwa.

EBITAMBO OMU BWIRE BW’ABAISRAELI

4. Abaisraeli bakaba nibagasirwa bata omu kuhayo ebitambo?

⁴ Okuhayo ebitambo kukaba kuhwera Abaisraeli kusaasirwa ebibi byabo. Ebitambo bikaba nibyetengyesa kubaasa kusiimwa Yehova. Ebitambo ebimwe bakaba nibaragiirwa kubihayo kandi ebindi barikubihayo ahabw’okweyendera. (Lev. 23:37, 38) Ebitambo eby’okwotsya bikaba biheebwayo ahari Yehova ahabw’okweyendera nari nk’ekiconco. Eky’okureeberaho kikuru eky’okuhayo ebitambo nk’ebyo kikabaho obu hekalu yaabaire neeheebwayo omu bunaku bwa Sulemaani.​—2 Bus. 7:4-6.

5. Yehova akataho ntebeekanisa ki eyaabaire neebaasisa n’abooro kugira eki baahayo?

⁵ Yehova akaba naakimanya ngu Abaisraeli bakaba batarikubaasa kuhayo ebirikwingana, n’ahabw’ekyo akashaba buri omwe kuhayo eki arikubaasa. Akabaragiira ngu basheeshe eshagama y’enyamaishwa barikutamba ebitambo, kandi ekyo kikaba nikijwekyera “ebirungi ebyabaire nibyenda kwija” kurabira omu Mwana we Yesu. (Heb. 10:1-4) Kwonka, Yehova akaba atarikubashaba ebi baabaire batarikubaasa. Nk’eky’okureeberaho, akaba naikiriza omuntu kuhayo obwiba ku yaabaire aba ataine nte, embuzi, nari entaama. N’ahabw’ekyo, n’abooro bakaba nibabaasa kuhayo. (Lev. 1:3, 10, 14; 5:7) N’obu Abaisraeli baabaire bahayo ebitambo bitarikwingana, bakaba baine kukuratira ebintu bibiri omu kuhayo kwabo.

6. Omuntu akaba aine kuhikiiriza ki atakahaireyo kitambo, kandi ahabw’enki kyabaire kikiri kikuru?

⁶ Eky’okubanza, omuntu akaba aine kuhayo ekirungi aha bi aine. Yehova akagambira ihanga rya Israeli ngu ekitambo kubaasa ‘kwikirizibwa’ kikaba kishemereire kuba kitaine kamogo koona. (Lev. 22:18-20) Enyamaishwa ku yaabaire eba eine akamogo, ekaba etarikubaasa kuheebwayo nk’ekitambo ekirikusiimwa Yehova. Ekya kabiri, owaabaire naahayo ekitambo ekyo akaba aine kuba ari oshemeire. Omuntu ku yaabaire aba akozire ekibi, akaba aine kuhayo empongano ey’okumwihisaho orubanja rw’ekibi nari empongano y’okumwihisaho orubanja atakasaasirwe bibi bye. (Lev. 5:5, 6, 15) Egi ekaba eri enshonga nkuru. Yehova akaragiira ngu omuntu yaaba akozire ekibi kandi akarya aha kitambo ky’empongano z’okusiima, ekyabaire nikitwariramu n’ekitambo ekyabaire kiheebwayo ahabw’okweyendera, akaba aine kucuubwa omu ihanga rye. (Lev. 7:20, 21) Kwonka omuntu ku yaabaire ahayo ekitambo aine omukago murungi na Yehova kandi n’ekitambo kye kitaine kamogo kona, akaba ashemererwa munonga.​—Shoma 1 Obusingye 29:9.

OKUHAYO OBUNAKU OBU

7, 8. (a) Ni kushemererwa ki oku bamwe batungire ahabw’okwefeerereza kushagika omurimo gw’Obukama? (b) Ni bintu ki ebi twine ebi turikubaasa kuhayo?

⁷ Obunaku obu, baingi nibeehayo beekundiire kuheereza Yehova, kandi Yehova naabasiima. Okwehayo kuhwera ab’eishe-emwe nakyo nikirugamu ebirungi. Ow’eishe-emwe omwe orikuhwera omu kwombeka Ebyombeko by’Obukama n’okuhwera abo abarikuba bahikirweho ebihikiirizi naagamba aha kushemererwa oku arikutunga omu buheereza bwe. Naagira ati: “Okureeba ab’eishe-emwe b’ekicweka ekyo bashemereirwe kandi barikusiima obwo beemereire omu Kyombeko ky’Obukama ekisya nari ahabw’okutunga obuhwezi bwanyima y’ekihikiirizi nikindeetera kumanya ngu nkozire omurimo murungi.”

⁸ Ekibiina kya Yehova eky’obunaku obu nikiteeraho kushagika omurimo gwa Yehova. Omuri 1904, Ow’eishe-emwe C. T. Russell akahandiika ati: “Buri omwe aine kwetwara nk’otoorainwe Mukama kukoresa obwire bwe, obushoboorozi bwe, esente ze, n’ebindi bingi, kandi buri omwe aine kuteeraho kukoresa etalanta ze nk’oku arikubaasa ahabw’okuhimbisa Mukama.” N’obu turaabe nitwefeerereza bingi omu kuheereza Yehova, nitutunga emigisha mingi. (2 Sam. 24:21-24) Ka tuteereho kukoresa gye ebi twine turikuhayo.

9. Omusingye ogu Yesu yaahaire oguri omu Luka 10:2-4, nitubaasa kugugyenderaho tuta omu kukoresa gye obwire bwaitu?

⁹ Obwire bwaitu. Okuvunuura n’okuteera ebitabo, okwombeka emyanya y’okuramizamu, okutebeekanisa enteerane empango, okuhwera abahikirweho ebihikiirizi n’endiijo mirimo, nibyetengyesa obwire. Izooba ririmu eshaaha 24 zonka. Yesu akatuha omusingye ogurikubaasa kutuhwera. Arikwohereza abeegi be kuza kubuurira, akabagira ngu “mutagira ou mwaramutsya omu muhanda.” (Luk. 10:2-4) Ahabw’enki Yesu yaabaragiire atyo? Omu bunaku bwa Yesu, abantu bakaba batarikukwatana omu ngaro kwonka. Kureka bakaba beegwa omu kifuba emirundi mingi kandi bajuumara n’ahansi. Ebi byona bikaba nibitwara obwire bwingi.” Akaba atarikwegyesa abeegi be kutaba abanyambabazi. Kureka, akaba naabahwera kwetegyereza ngu bakaba baine obwire bukye kandi bakaba baine kubukoresa kukora ebintu ebikuru. (Efe. 5:16) Naitwe nitubaasa kugyendera aha musingye ogwo kubaasa kutunga obwire burikumara kushagika omurimo gw’Obukama?

10, 11. (a) Ebi turikuhayo kushagika omurimo ogurikukorwa omu nsi yoona nibikoresibwa bita? (b) Kandi omusingye oguri omu 1 Abakorinso 16:1, 2 nigubaasa kutuhwera guta?

¹⁰ Esente zaitu. Omurimo gw’Obukama nigwetengyesa esente. Buri mwaka esente nyamwingi eza doora nizikoresibwa kureeberera abareeberezi abarikutaayaayira ebibiina, baapayoniya ab’omutaano, n’abamiishani. Kuruga 1999, Ebyombeko by’Obukama ebirikurenga 24,500 byombekirwe omu mahanga agataine bintu birikumara. Kwonka, Ebyombeko by’Obukama nka 6,400 ebindi nibyetengwa. Buri kwezi Watchtower na Awake ezirikuhika obukaikuru 100 niziteerwa. Ebi byona nibikorwa ahabw’ebi abantu barikuhayo beekundiire.

¹¹ Entumwa Paulo akooreka omusingye ogwine kukuratirwa aha bikwatiraine n’okuhayo. (Shoma 1 Abakorinso 16:1, 2.) Arikuhwerwa Ruhanga, akahiga ab’eishe-emwe ba Korinso kutategyereza aha muheru gwa saabiiti kureeba ebi bashaagize, kureka kuguma nibabiika aha kutandika kwa saabiiti kurugiirira aha ki buri omwe arikubaasa. Nk’oku kyabaire kiri omu kyasha ky’okubanza, ab’eishe-emwe obunaku obu nibatebeekanisa kare kugira ngu babaase kuhayo nk’oku barikubaasa. (Luk. 21:1-4; Byak. 4:32-35) Yehova naasiima okwefeerereza nk’okwo.

12, 13. Niki ekirikubaasa kuremesa abantu kukoresa amaani gaabo n’okubaasa kwabo, kwonka Yehova naabahwera ata?

¹² Amaani gaitu n’okubaasa kwaitu. Yehova naatuhwera ku turikukoresa amaani gaitu n’okubaasa kwaitu kushagika omurimo gw’Obukama. Naaraganisa kutuhwera twahwamu amaani. (Isa. 40:29-31) Mbwenu shi nituteekateeka ngu titwine myoga erikutubaasisa kwejumba omu murimo ogwo? Mbwenu shi nituteekateeka ngu omurimo ogwo n’ogwa bakye? Ijuka ngu Yehova naabaasisa abantu nk’oku yaakozire ahari Bezaleeli na Oholiabu.​—Kur. 31:1-6; reeba ekishushani aha kutandika.

¹³ Yehova naatuhiga kutagira ekintu kyona ekyaturemesa kumuha ekirikukira oburungi. (Enf. 3:27) Obu hekalu yaabaire neeyombekwa omuri Yerusaalemu, Yehova akagambira Abayudaaya kuteekateeka aha ki baabaire nibabaasa kuhayo ahabw’omurimo ogwo. (Hag. 1:2-5) Bakaba bahugire kandi batakigutaho mutima. Tushemereire kweshwijuma kureeba yaaba ebi turikwebeembeza nibihikaana n’ebi Yehova akunda. Nitubaasa ‘kuteekateeka aha mitwarize yaitu’ kubaasa kwejumbira kimwe omu murimo gw’Obukama omu biro by’emperu.

OKUHAYO NK’OKU TURIKUBAASA

14, 15. (a) Eky’okureeberaho ky’ab’eishe-emwe abataine bintu bingi nikituhiga kita? (b) Tushemereire kuteeraho kwenda kukora ki?

¹⁴ Baingi nibatuura omu myanya erimu embeera ezigumire n’ahu abantu bataine bintu bingi. Ekibiina kyaitu nikiteeraho kuhwera ab’eishe-emwe abari omu mahanga nk’ago. (2 Kor. 8:14) Kwonka, n’ab’eishe-emwe abataine bintu bingi nibatwara okuhayo nk’ekintu kikuru. Nikishemeza Yehova abataine bintu bingi baahayo beekundiire.​—2 Kor. 9:7.

¹⁵ Omu ihanga rimwe eryoro omu Africa, ab’eishe-emwe nibacwaho ekicweka kikye aha musiri gwabo reero esente ezirikurugamu bazihayo kushagika omurimo gw’Obukama. Omu ihanga niryo rimwe, bakaba nibatebeekanisa kwombeka Ekyombeko ky’Obukama ekyabaire nikyetengyesa munonga. Ab’eishe-emwe b’omu kicweka ekyo bakaba nibenda kuhwera omu kwombeka. Kwonka, okwombeka kukaba nikwija kubaho omu bwire bw’eibiba. Ahabw’okwenda kuhwera omu kwombeka okwo, omu ihangwe bakaba bahwera aha kwombeka reero omu mwabazyo baza omu misiri yaabo kubiba. Ka baabaire nibeefeerereza! Eki nikitwijutsya ab’eishe-emwe b’omu kyasha ky’okubanza omuri Makedonia. Ab’eishe-emwe abo bakaba bari abooro munonga, kwonka bakeeshengyereza Paulo barikwenda kuhwera ab’eishe-emwe bagyenzi baabo. (2 Kor. 8:1-4) Buri omwe ahariitwe ka ateereho kuhayo ‘nk’oku arikubaasa, nk’omugisha ogu MUKAMA Ruhanga waitu araabe amuhaire.’​—Shoma Eky’Ebiragiro 16:17.

16. Nitubaasa kuhamya tuta ngu ebi turikuhayo Yehova naabisiima?

¹⁶ Kwonka haine eki tushemereire kuguma nitwijuka. Nk’oku kyabaire nikikorwa omu bunaku bw’Abaisraeli, twine kuteeraho kureeba ngu ebi turikuhayo twekundiire nibisiimwa Ruhanga. Niki ekirikubaasa kureetera Yehova kutabisiima? Twine kuteeraho kutagwera orubaju omu kuhikiiriza obujunaanizibwa bw’okureeberera amaka gaitu n’okuramya Yehova. Okuhwera omu kwombeka Ebyombeko by’Obukama, okuhwera abarikuba bahikirweho ebihikiirizi, n’ebindi nibibaasa ‘kutaikirizibwa’ byaba nibitureetera kutahikiiriza obujunaanizibwa bw’okureeberera amaka gaitu omu by’omwoyo. Twakora tutyo, nitwija kuba turi nk’abarikuhayo aha bi tutaine. (Shoma 2 Abakorinso 8:12.) Okwongyera ahari ekyo, tushemereire kuguma twine omukago murungi na Yehova kugira ngu tutaba abatarikwikirizibwa. (1 Kor. 9:26, 27) Kwonka twaguma nitugyendera aha misingye ya Baibuli, ebi turikuhayo nibiija kutureetera okushemererwa n’okumarwa, kandi ekikuru munonga nibiija kusiimwa Yehova.

EBI TURIKUHAYO N’EBY’OMUHENDO MUNONGA

17, 18. Nitutwara tuta abo abarikwefeerereza ahabw’Obukama, kandi twena twine kuteekateeka ahari ki?

¹⁷ Ab’eishe-emwe baingi nibahayo amaani gaabo, obwire bwabo n’esente zaabo ahabw’okushagika omurimo gw’Obukama. (Fil. 2:17) Nitusiima munonga abo abarikworeka omutima nk’ogwo ogw’okwefeerereza. Abakazi n’abaana b’ab’eishe-emwe abarikwebembera omurimo gw’Obukama nabo nibasiimwa ahabw’obushagiki bwabo n’omutima gwabo gw’okwefeerereza.

¹⁸ Nikyetengyesa obweziriki okushagika eby’Obukama. Twena ka tuteereho kushaba Yehova kutuhwera kwejumbira kimwe omu murimo ogu nk’oku kirikubaasika. Noobaasa kuhamya ngu noija kutunga ebirungi bingi hati kandi n’ebirikukiraho “omu biro bya bwanyima.”​—Mak. 10:28-30.