EBIBUUZO AHA BY’OMU BAIBULI NIBIGARUKWAMU

Baibuli buzima n’Ekigambo kya Ruhanga?

Ekigambo kya Ruhanga kishemereire kuba eky’omutaano, kandi Baibuli nikwo eri. Baibuli ezirikuhika omu buhumbi niziteerwa omu ndimi nyingi. Obwengye oburi omu Baibuli bwine amaani g’okuhindura abantu.​—Shoma 1 Abatesalonika 2:13; 2 Timoseo 3:16.

Nitumanya ngu Baibuli ekahandiikisibwa Ruhanga ahabw’okuba neegamba aha by’omumaisho omu muringo oguhikire. Tihariho muntu orikubaasa kukora ekyo ahabwe. Nk’eky’okureeberaho, ekitabo kya Isaaya ekyahandiikirwe ekyasha kimwe Yesu atakazairwe kikashangwa omu nyanga y’eibaare haihi na Dead Sea. Kikaba nikyoreka ngu orurembo Babulooni tirurigaruka kutuurwamu. Eki kikahikiirizibwa bwanyima y’emyaka mingi Yesu aherize obuheereza bwe omu nsi.​—Shoma Isaaya 13:19, 20; 2 Petero 1:20, 21.

Baibuli ekahandiikisibwa eta?

Baibuli ekahandiikwa kumara emyaka 1,600. Abantu nka 40 nibo baahandiikire Baibuli kandi bakahandiika aha mutwe gumwe batarikwehakanisa. Ekyo kikabaasika kita? Ruhanga niwe yaabahwereire kugihandiika.​—Shoma 2 Samueli 23:2.

Obumwe, Ruhanga akaba agamba n’abahandiiki ba Baibuli kurabira omuri baamaraika, okworekwa, nari ebirooto. Obundi, akaba aha abahandiiki ebiteekateeko bye reero abaikiriza kusherura ebigambo ebi baraakorese kuhandiika obutumwa bwe.​—Shoma Okushuuruurwa 1:1; 21:3-5.