EBIBUUZO EBI BAIBULI ERIKUGARUKAMU
Baamaraika nibabaasa kutuhwera?
Nk’oku baamaraika baahwereire Danieli ira, obunaku obu nibahwera abantu kugasirwa omu makuru marungi
Yehova Ruhanga akahanga obukaikuru bwa baamaraika ira atakahangire bantu. (Yobu 38:4, 7) Baamaraika aba n’ebihangirwe by’omwoyo eby’amaani omu kuheereza Ruhanga, obumwe naaboohereza kuha obuhabuzi n’oburinzi abaheereza be omu nsi. (Zaaburi 91:10, 11) Obunaku obu, baamaraika nibahwera abantu kugasirwa omu makuru marungi agu abakuratsi ba Yesu barikubuurira.—Shoma Okushuuruurwa 14:6, 7.
Mbwenu tushemereire kushaba baamaraika kutuha obuhabuzi? Ngaaha. Tushemereire kushaba Ruhanga wenka, ahabw’okuba okushaba n’ekicweka ky’okuramya. (Okushuuruurwa 19:10) Obu baamaraika bari abaheereza ba Ruhanga, nibatunga obuhabuzi kuruga ahariwe omu mwanya gw’abantu. N’ahabw’ekyo, tushemereire kushaba Ruhanga wenka turikurabira omuri Yesu.—Shoma Zaaburi 103:20, 21; Matayo 26:53.
Hariho baamaraika ababi?
Baamaraika nabo bakahangwa baine obugabe bw’okwecweramu kukora ekihikire nari ekigwire nk’abantu. Eky’obusaasi, baamaraika baingi bakagomera Ruhanga. (2 Petero 2:4) Sitaane niwe yaabandize kugoma reero hakakurataho baadaimoni. Omu bwire butari bwa ira munonga, Sitaane na baadaimoni be bakabingwa omu iguru baanagwa omu nsi.—Shoma Okushuuruurwa 12:7-9.
Obubi n’obushaarizi kweyongyera omu nsi kuruga 1914, nikyoreka ngu Ruhanga ari haihi kuremesa Sitaane na baadaimoni kugira eki baakora. Bwanyima, Ruhanga naija kugarura ensi busya nk’oku yaabaire eri.—Shoma Okushuuruurwa 12:12; 21:3, 4.