EBIBUUZO EBI BAIBULI ERIKUGARUKAMU
Buzima Yesu akazoora abantu?
Yesu akazoora Laazaaro, owaabaire amazire ebiro bina afiire
Baibuli neegamba butunu ngu Yesu akazoora abantu. Ebirikukwata aha kuzooka okwo ti bitebyo, ahakuba Yesu akazoora abantu omu myanya erikumanywa n’omu bwire butari bumwe na bumwe. Nk’eky’okureeberaho, omu gwa 31 Yesu aherize kuzaarwa, eizooba rimwe abantu baingi bakaba bari na Yesu nibaruga Kaperenaumu barikuza Naini. Ku baabaire nibahikayo, baabugana abandi bantu baingi. Noobaasa kwikiriza ebirikukwata aha kuzooka okwabaireho bwanyima, ahakuba bihandikirwe omu Kigambo kya Ruhanga Baibuli, kandi okuzooka okwo kukabaho omu maisho g’abantu baingi.—Shoma Luka 7:11-15.
Kandi Yesu akazoora na munywani we Laazaaro, owaabaire amazire ebiro bina afiire. Noobaasa kwikiriza ngu Yesu akamuzoora ahabw’okuba hakaba hariho abantu baingi abaakireebire.—Shoma Yohaana 11:39-45.
Ahabw’enki Yesu yaazoire abantu?
Embabazi nizo zaabaire zihiga Yesu kuzoora abantu. Kandi akaba abazoora arikwenda kworeka ngu Ishe owaahangire amagara akaba amuhaire amaani g’okusingura rufu.—Shoma Yohaana 5:21, 28, 29.
Ahabw’okugira ngu Yesu akazoora abantu nikitureetera kwesiga okuraganisa kwe okw’omumaisho. Naija kuzoora abantu baingi munonga, otwariiremu n’abatahikiriire abaafiire batarikumanya ebirikukwata ahari Ruhanga ow’amazima. Nibaija kuheebwa omugisha gw’okumanya Yehova Ruhanga kandi bakamukunda.—Shoma Ebyakozirwe 24:15.