Oku Okuzooka kwa Yesu Kurikutugasira

1, 2. (a) Abeebembezi b’ediini bakaba nibenda kumanya ki, kandi Petero akabagarukamu ata? (Reeba ekishushani aha kutandika.) (b) Niki ekyareeteire Petero kugira obumanzi aha izooba eryo?

BWANYIMA y’ebiro bikye Yesu aherize kufa, abashaija enshaarizi bakataahirira entumwa Petero. Bakaba bari Abayudaaya abeebembezi b’ediini abaakozire orukwe rw’okwita Yesu. Abashaija aba bakaba bainiire Petero ekiniga ahabw’okugira ngu akakiza omuntu owaazairwe amugire. N’ahabw’ekyo bakamugira ngu abagambire eiziina eri yaakoreiremu ekyo n’ahu yaihire obushoboorozi bw’okukikora. Entumwa Petero akabagarukamu n’obumanzi ati: “Omu iziina rya Yesu Kristo owa Nazareesi, ou” mwahanikire aha muti “kandi ou Ruhanga yaazoire omu bafu, ahabw’Ogwo omushaija ogu ayemereire omu maisho gaanyu akizire.”​—Byak. 4:5-10.

² Enyimaho, Petero akaba aherize kwehakana Yesu emirundi eshatu. (Mak. 14:66-72) Mbwenu shi omu maisho g’abeebembezi b’ediini, niki ekyamureeteire kugira obumanzi? Omwoyo gurikwera gukamuhwera, kwonka okukira munonga okuhamya ngu Yesu akaba azookire nikyo kyamuhwereire. Ahabw’enki entumwa Petero yaabaire naahamiza kimwe ngu Yesu ahuriire? Kandi ahabw’enki naitwe turikubaasa kugira obuhame nk’obwo?

3, 4. (a) Ni kuzooka ki okwabaireho entumwa za Yesu zitakazairwe? (b) Yesu akazoora baahi?

³ Okugira ngu abafu nibabaasa kuzooka kikaba kitari kisya aha ntumwa za Yesu, ahakuba haine abaabaire baazookire entumwa zitakazairwe. Bakaba nibamanya ngu Ruhanga akaha nabi Eliya na Elisa amaani g’okuzoora abafu. (1 Bag. 17:17-24; 2 Bag. 4:32-37) Nangwa hariho n’omushaija owaazokire bwanyima y’omutumbi gwe kunagwa omu kituuro kya Elisa gukahika aha magufa ge. (2 Bag. 13:20, 21) Abakristaayo aba ira bakaba nibaikiriza ebirikugambwaho omu Byahandiikirwe ebi, nk’oku naitwe turikwikiriza ngu Ekigambo kya Ruhanga n’amazima.

⁴ Hatariho kubangaanisa, twena nitushemererwa ku turikushoma ebirikukwata aha bantu abu Yesu yaazoire. Ku yaazoire omwana w’omukazi efaakazi, omukazi ogwo aine kuba yaashemereirwe. (Luk. 7:11-15) Eizooba erindi, Yesu akazoora omwishiki w’emyaka 12. Teekateeka aha kushemererwa oku abazaire be abaabaire baine enaku baagizire muhara waabo ku yaazookire! (Luk. 8:49-56) Teekateeka n’aha kushemererwa oku abantu baagizire obu Laazaaro yaaruga omu kituuro ahuriire kandi ari gye!​—Yoh. 11:38-44.

ENSHONGA AHABW’ENKI OKUZOOKA KWA YESU KWABAIRE OKW’OMUTAANO

5. Okuzooka kwa Yesu kukaba nikutaana kuta aha kw’abaamubandiize kuzooka?

⁵ Entumwa bakaba nibamanya ngu okuzooka kwa Yesu kukaba nikutaana aha kw’abandi abaamubandiize kuzooka. Abo abaabaandiize Yesu kuzooka, bakazooka baine emibiri y’abantu kandi bwanyima bakagaruka baafa. Yesu akazooka aine omubiri gw’omwoyo ogutarikufa. (Shoma Ebyakozirwe 13:34.) Petero akahandiika ngu Yesu akaitwa “omu mubiri, kwonka yaahindurwa ohuriire omu mwoyo.” Kandi, akaza “omu iguru, ari aha rubaju rwa Ruhanga, naategyeka baamaraika n’abategyeki n’ab’obushoboorozi.” (1 Pet. 3:18-22) Okuzooka okwabandize kukaba nikushemeza kandi kurikutangaaza, kwonka tikurikubaasa kugyeragyeranisibwa n’okwa Yesu.

6. Okuzooka kwa Yesu kukakwata kuta aha ntumwa ze?

⁶ Okuzooka kwa Yesu kukaba kuri kukuru aha beegi be. Akaba atakiri mufu nk’oku abazigu be baabaire nibateekateeka. Yesu akaba ahuriire aine omubiri gw’omwoyo, kandi tihaine muntu owaabaire naabaasa kumukoraho akabi. Okuzooka kwe kukahamya ngu n’omwana wa Ruhanga, kandi ekyo kikareetera entumwa ze kushemererwa munonga, omu mwanya gw’okuguma baine obusaasi. Kandi, bakagira obumanzi omu mwanya gw’okutiina. Okuzooka kwa Yesu kukaba nikuhikaana n’ekigyendererwa kya Yehova n’amakuru marungi agu baabaire nibabuurira n’obumanzi omu myanya etari emwe n’emwe.

7. Yesu naakora ki hati, kandi eki nikireetaho bibuuzo ki?

⁷ Itwe abaheereza ba Yehova, nitukimanya gye ngu Yesu akaba atari mushaija w’amaani kwonka. Ahuriire kandi naayebembera omurimo ogurikutwariramu abantu boona omu nsi. Yesu Kristo n’Omugabe w’Obukama bwa Ruhanga obw’omu iguru, ari haihi kwihiraho kimwe obubi omu nsi, reero akagihindura paradiso abantu bakatuuramu ebiro byona. (Luk. 23:43) Ebi byona tibyakubaasize kubaho ku ogire ngu tarazookire. Mbwenu shi, ni nshonga ki eziine kutureetera kwikiriza ngu akazooka omu bafu? Okuzooka kwe nikutugasira kuta?

YEHOVA OKUSINGURA RUFU

8, 9. (a) Ahabw’enki abeebembezi b’ediini Abayudaaya baashabire ngu ekituuro kya Yesu kirindwe? (b) Abakazi ku baizire aha kituuro bakashangaho ki?

⁸ Yesu ku yaaherize kwitwa, abanyamurwa abakuru na Abafarisaayo bakaija ahari Pilaato baamugira bati: “Mukama waitu, nitwijuka eki omubeihi ori yaagambire akiriho, ati: Ndyazooka bwanyima y’ebiro bishatu. Mbwenu ragiira barindire kimwe ekituuro okuhitsya aha kiro kya kashatu, abeegi be batakaija bakamwiba, haza bakagambira abantu ngu, azookire omu bafu; kandi okuhaba okurirugamu kuryaba kubi okukira okw’okubanza. Pilaato akabagarukamu ati: Mwine abarinzi b’abaserukare; mugyende, mukirindire kimwe, nk’oku murikubaasa.” Ekyo buzima nikyo baakozire.​—Mat. 27:62-66.

⁹ Omutumbi gwa Yesu bakaba bagutaire omu kituuro ky’enyanga y’eibaare reero bakingireho eibaare rihango. Omu kituuro ekyo abeebembezi b’ediini Abayudaaya niyo baabaire nibenda ngu Yesu agume ataine magara. Kwonka Yehova akaba aine ekiteekateeko ekirikutaana n’ekyo. Aha kiro kya kashatu, Mariamu Magadaleene na Mariamu ondiijo bakaija aha kituuro baashanga eibaare rikumbagaize, kandi maraika arishutamiho. Maraika akeeshengyereza abakazi abo kureeba omunda omu kituuro ekyabaire kirimu busha. Akabagira ati: “Tari aha; ahabw’okuba azookire.” (Mat. 28:1-6) Yesu akaba ahuriire!

10. Paulo akaha buhame ki oburikworeka ngu Yesu akazooka?

¹⁰ Ebyabaireho omu biro 40 ebyakuratsireho, bikahamya ngu Yesu akaba azookire. Entumwa Paulo arikugamba aha buhame obwo omu bugufu, akahandiikira Abakorinso ati: “Eki naabandize kubaha, eki naahairwe, n’eki ngu, Kristo akafa ahabw’ebibi byaitu, nk’oku Ebyahandiikirwe bigira, kandi ngu akaziikwa, yaazooka aha izooba rya kashatu nk’oku Ebyahandiikirwe bigira, yaayeyoreka Keefa, bwanyima yaayeyoreka eikumi na babiri. Kandi bwanyima yaayeyoreka hamwe ab’eishe-emwe okukira ahari magana ataano; abaingi aharibo abakiriho na hati, n’obu abamwe baraabe bagwejegyeire. Bwanyima yaayeyoreka Yakobo, na bwanyima entumwa zoona. Aha muheru gwa boona naanye yaanyeyoreka ndi nk’omwana orengize amazaariro.”​—1 Kor. 15:3-8.

ENSHONGA AHABW’ENKI NITUMANYA NGU YESU AKAZOOKA

11. Okuzooka kwa Yesu kukabaho kuta “nk’oku Ebyahandiikirwe” byabaire nibigira?

¹¹ Enshonga y’okubanza ahabw’enki nitumanya ngu Yesu akazooka, n’okugira ngu okuzooka kwe kukabaho “nk’oku Ebyahandiikirwe” birikugira. Ekigambo kya Ruhanga kikagamba aha kuzooka kwe. Nk’eky’okureeberaho, Daudi akahandiika ngu “Orikwera” wa Ruhanga akaba atarikwija kutsigwa omu kituuro. (Shoma Zaaburi 16:10.) Aha izooba rya Pentekoote 33 Yesu aherize kuzaarwa, entumwa Petero akagamba aha kyahandiikirwe ekiri omu bunabi ekirikukwata ahari Yesu arikugira ngu Daudi ku “yaamanyire ekyo kitakabaireho, yaagamba aha kuzooka kwa Kristo, ku ataratsigirwe kuzimu, kandi n’omubiri gwe ku gutarajunzire.”​—Byak. 2:23-27, 31.

12. Ni baahi abaareebire Yesu aherize kuzooka?

¹² Enshonga ya kabiri ahabw’enki nitumanya ngu Yesu akazooka, n’obujurizi bw’abo abaabaire bariho. Omu biro 40 Yesu aherize kuzooka, akeeyoreka abeegi omu musiri ahu ekituuro kye kyabaire kiri, n’omu muhanda ogurikuza Emau hamwe n’ahandi. (Luk. 24:13-15) Omu biro ebyo, akaba agamba n’abantu baingi omurundi gumwe nari n’omuntu omwe nk’obu yaagamba na Petero. Obumwe akeeyoreka abantu abarikurenga 500! Obujurizi bw’abantu baingi munonga tiburikubaasa kutwarwa nk’obutahikire.

13. Omujinya gw’abeegi gukooreka guta ngu bakaba nibahamya ngu Yesu akazooka?

¹³ Enshonga ya kashatu ahabw’enki nitumanya ngu Yesu akazooka, n’omujinya ogu abeegi be baabaire baine barikubuurira aha kuzooka kwe. Okubuurira n’omujinya ngu Kristo akazooka kikarugiramu abeegi okuhiiganisibwa, okubonabonesibwa, n’okwitwa. Ku kiraabe kyabaire kiri ekishuba ngu Yesu taraazookire, ahabw’enki Petero yaabaire naabaasa kuta amagara ge omu kabi arikubuurira ebirikukwata aha kuzooka kwa Yesu, arikubigambira abeebembezi b’ediini abaabaire nibanga Yesu, kandi abaakozire orukwe rw’okumwita? Petero n’abeegi abandi bakaba nibabuurira baine obumanzi ahabw’okugira ngu bakaba nibahamiza kimwe ngu Yesu ahuriire, kandi ngu naayebembera omurimo ogu Ruhanga yaabaire naayenda ngu gukorwe. Kandi, okuzooka kwa Yesu kukaba nikuhamiza abakuratsi be ngu nabo nibaija kuzooka. Nk’eky’okureeberaho, Stefano akafa aine obuhame ngu nihaija kubaho okuzooka kw’abafu.​—Byak. 7:55-60.

14. Ahabw’enki noikiriza ngu Yesu ahuriire?

¹⁴ Enshonga ya kana ahabw’enki nitumanya ngu Yesu akazooka, n’obuhame obu twine ngu hati naategyeka nk’Omugabe kandi naayebembera ekibiina Ekikristaayo. Eki kireeteire ekibiina Ekikristaayo kweyongyera kutunguuka. Mbwenu shi eki kikaabaireho Yesu ku atarazookire mu bafu? Obundi titukaabaasize kuhurira ebirikumukwataho ku atarazookire. Kwonka twine obuhame bw’amaani ngu Yesu ahuriire kandi ngu hati naatwebembera twaba nitubuurira amakuru marungi hoonahoona.

OKU OKUZOOKA KWA YESU KURIKUTUGASIRA

15. Ahabw’enki okuzooka kwa Yesu nikutuha obumanzi bw’okubuurira?

¹⁵ Okuzooka kwa Kristo nikutuha obumanzi bw’okubuurira. Kumara emyaka 2,000, abazigu ba Ruhanga bakoreise ebishuba, ebijumo, obweshariingo, okuzibira omurimo gw’okubuurira, ebibonaboneso, n’okwita, kuteeraho kuremesa amakuru marungi. Kwonka ‘tihariho ky’okurwanisa, eki baheesire kuturwanisa’ ekibaasize kuremesa omurimo gwaitu ogw’okubuurira n’okwegyesa abantu aha Bukama. (Isa. 54:17) Titurikutiina abarikushagika Sitaane nari abaheereza be. Yesu ari naitwe naatushagika nk’oku yaaraganiise. (Mat. 28:20) Tihaine ekishemereire kutureetera kutiina, ahakuba abazigu baitu n’obu baakuteeraho bata, tibarikubaasa kuturemesa!

16, 17. (a) Okuzooka kwa Yesu nikuhamya kuta ngu ebi yaayegyeise bihikire? (b) Kurugiirira ahari Yohaana 11:25, Ruhanga ahaire Yesu maani ki?

¹⁶ Okuzooka kwa Yesu nikureetera byona ebi yaayegyeise kuba ebihikire. Paulo akahandiika ngu Kristo ku atarazookire omu bafu, okwikiriza kw’Ekikristaayo n’okubuurira bikaabaire bitaine mugasho. Omucondooza omwe aha bya Baibuli akahandiika ati: “Kristo ku araabe atarazookire, . . . Abakristaayo baine enaku, babeihirwe, kandi banyagirwe munonga.” Ku ogire ngu ebitabo by’Engiri tibirimu kuzooka kwa Yesu, bikaabaire biri ebitebyo by’obusaasi ebirikukwata aha mushaija murungi kandi ow’obwengye owaitsirwe abazigu be. Kwonka Kristo akazooka, kyahamya ngu byona ebi yaayegyeise bihikire, otwariiremu n’ebi yaagambire aha biro by’omumaisho.​—Shoma 1 Abakorinso 15:14, 15, 20.

¹⁷ Yesu akagira ati: “Niinye kuzooka n’amagara; orikunyikiriza n’obu yaakufa, aryaba ohuriire.” (Yoh. 11:25) Ebigambo birungi ebi tihaine ekirikwija kubiremesa kuhikiirira. Yehova ahaire Yesu amaani g’okuzoora abo abarikutunga amagara omu iguru, kandi naija kuzoora n’obuhumbi bw’abantu abaine amatsiko g’okutunga amagara agatahwaho omu nsi. Ekitambo kya Yesu n’okuzooka kwe nibihamya ngu okufa nikwija kuhwaho. Mbwenu shi okumanya ekyo tikirikukureetera kugira obumanzi bw’okugumira okugyezibwa kwona otwariiremu n’okufa?

18. Okuzooka kwa Yesu nikuhamya ki?

¹⁸ Okuzooka kwa Yesu nikutuhamiza ngu abantu nibaija kucwerwa orubanja kurugiirira aha mitindo ya Yehova eya rukundo. Paulo arikugambira abashaija n’abakazi omuri Aseene, akabagira ngu Ruhanga naija kucwa “emanja z’ensi yoona omu kuhikiirira, naazicwisa Omuntu ou yaatooraine; kandi ebyo akabihamiza abantu boona, obu yaamuzoora omu bafu.” (Byak. 17:31) Buzima, Ruhanga atooraine Yesu kuba omucwi w’emanja, kandi nituhamya ngu naija kucwa emanja omu buringaaniza n’omu muringo gwa rukundo.​—Shoma Isaaya 11:2-4.

19. Okwikiriza ngu Kristo akazooka nikitureetera kukora ki?

¹⁹ Okwikiriza ngu Yesu akazooka nikituhiga kukora ebi Ruhanga arikukunda. Ku ogire ngu tarafiire kandi akazooka, tukaabaire tukiri omu mukyeeno gw’ekibi n’okufa. (Rom. 5:12; 6:23) Yesu ku atarazookire, naitwe tukaabaire nitugira tuti: “Tweriire, twenywere, ahakuba nyencakare turi ab’okufa.” (1 Kor. 15:32) Kwonka titurikuta omutima aha by’okweshemeza. Omu mwanya gw’ekyo, twine amatsiko g’okuzooka kandi twine enshonga zihikire ezirikutureetera kworobera obuhabuzi bwa Yehova omuri byona.

20. Okuzooka kwa Yesu nikuhamya kuta ngu Ruhanga n’ow’amaani?

²⁰ Okuzooka kwa Kristo n’obuhame ngu Yehova n’ow’amaani orikuha “ebihembo abamusherura.” (Heb. 11:6) Yehova ka yaayorekire ngu aine amaani n’obwengye bwingi arikuzoora Yesu kuza omu iguru atarikubaasa kugaruka kufa! Kandi, Ruhanga akooreka ngu naabaasa kuhikiiriza byona ebi arikuraganisa. Eki nikitwariramu n’ekiraganiso ekiri omu bunabi, ekirikworeka ngu ‘oruzaaro’ rw’omutaano rukaba nirwija kukora kihango omu kutereeza enshonga erikukwata ahari ogwo ohikire kutegyeka byona. Obunabi obwo kubaasa kuhikiirizibwa, Yesu akaba aine kufa kandi akagaruka akaba ohuriire.​—Kut. 3:15.

21. Amatsiko g’okuzooka nigakugasira gata?

²¹ Noosiima munonga Yehova, owaatuhaire amatsiko g’okuzooka? Ebyahandiikirwe nibituhamiza biti: “Reeba eihema rya Ruhanga riri omu bantu. Ruhanga aryatuura nabo; baryaba abantu be kandi We wenka aryaguma nabo, ari Ruhanga waabo; aryaragaza amarira goona aha maisho gaabo; tiharibaho kufa bundi, n’obu kwakuba okucura nari okurira nari obusaasi, ahakuba ebya ira biryaba bihweireho.” Amatsiko ago gakamanyisibwa entumwa Yohaana omwesigwa, owaagambiirwe kuhandiika ati: “Handiika, ahakuba ebigambo ebi n’eby’okwesigwa kandi eby’amazima.” N’oha owaahaire Yohaana okushuuruurwa oku? Kukarabira omuri Yesu Kristo owaabaire azookire.​—Kush. 1:1; 21:3-5.