OMUTWE OGURI AHA MUNAARA | NOOYENDA KWEGA BAIBULI?

Entebeekanisa Y’okwega Baibuli Eya Boona

Abajurizi ba Yehova nibamanywa ahabw’okubuurira abantu. Kwonka shi obaire noomanya ngu twine n’entebeekanisa y’okwegyesa abantu Baibuli omu nsi yoona?

Omushaija naayegyesibwa Baibuli ahu arikukorera

Omu 2014, Abajurizi ba Yehova abarikurenga 8,000,000 omu mahanga 240, buri saabiiti bakaba nibeegyesa Baibuli abantu abarikurenga 9,500,000.a Buzima, abantu abu turikwegyesa Baibuli nibakira abantu abari omu mahanga 140 buri rimwe okwaryo!

Kubaasa kuhikiiriza omurimo ogu ogw’okwegyesa, Abajurizi ba Yehova buri mwaka nibashohoza Baibuli ezirikwingana nk’ekicweka ky’akahumbi, ebitabo, magaziini, n’ebindi ebirikushoboorora ahari Baibuli omu ndimi nka 700! Okushohoza ebitabo bingi nikibaasisa abantu kwega Baibuli omu rurimi oru barikukunda.

“Nkaba ntarikukunda kwega aha ishomero, kwonka okwega Baibuli kukaba nikushemeza. Kandi ebi naayegire bikaba nibihuumuriza munonga!”—Katlego, kuruga South Africa.

“Omu kwega oku, ebibuuzo byangye byona bikagarukwamu n’ebindi bingi.”—Bertha, kuruga Mexico.

“Tukaba nitwegyera omu nju yangye omu bwire obu naareebire buri burungi. Mbwenu ekindi nkaayenzire ki!”—Eziquiel, kuruga Brazil

“Tukaba nitwega kumara edakiika 15 kuhika 30 obundi n’okukiraho kurugiirira aha bwire obu naabaire mba nyine.”—Viniana, kuruga Australia.

“Okwega kukaba kuri okwa busha, nkatangaara!”—Aimé, kuruga Benin.

“Owaabaire naanyegyesa Baibuli akaba naagumisiriza kandi aine embabazi. Tukagira omukago murungi.”—Karen, kuruga Northern Ireland.

“Abantu baingi nibeega Baibuli batahindukire Bajurizi ba Yehova.”—Denton, kuruga England.

EBY’OKUGARUKAMU BY’EBIBUUZO EBIRIKUKIRA KUBUUZIBWA AHA NTEBEEKANISA YAITU Y’OKWEGYESA BAIBULI

Okwega kutebeekanisiibwe kuta?

Nitugaaniira n’abantu aha nshonga emwe erikugambwaho omu Baibuli, reero tushwijuma Ebyahandiikirwe ebirikukwata aha nshonga egyo. Nk’eky’okureeberaho, Baibuli neegarukamu ebibuuzo nk’ebi: Ruhanga n’oha? Ari mu muringo ki? Aine eiziina? Naatuura nkahi? Nitubaasa kumwirira haihi? Ekigumire n’okusherura eby’okugarukamu omu Baibuli.

Kubaasa kuhwera abantu kutunga eby’okugarukamu, nitukira kukoresa akatabo Niki Eki Baibuli Buzima Erikwegyesa? akaine empapura 224.b Akatabo aka kakatebeekanisibwa kuhwera abantu kwetegyereza enyegyesa za Baibuli ezirikutandikirwaho. Karimu amashomo agarikukwata ahari Ruhanga, Yesu Kristo, okubonabona kw’abantu, okuzooka, okushaba, n’ebindi.

Nitubaasa kwegyera nkahi kandi ryari?

Noobaasa kwegyera omu mwanya n’obwire ebirikukubaasikira.

Buri kwega nikumara bwire burikwingana ki?

Abantu baingi nibamara eshaaha emwe nari n’okukiraho barikwega Baibuli buri saabiiti. Kwonka okwega nikubaasa kuhindahindurwamu. Noobaasa kushaba kwegyesibwa Baibuli kurugiirira aha ntebeekanisa yaawe. Abamwe nibeega kumara edakiika nka 10 nari 15 buri saabiiti.

Okwega nikwetengyesa kushashura zingahi?

Okwega n’ebirikukoresibwa omu kwegyesibwa n’ebya busha. Eki nikihikaana n’obuhabuzi obu Yesu yaahaire abeegi be ati: “Mukaheerwa busha, naimwe muheere busha.”—Matayo 10:8.

Entebeekanisa y’okwega yoona neemara bwire ki?

Obwire obu entebeekanisa egi erikumara niburugiirira ahariiwe. Akatabo Niki Eki Baibuli Buzima Erikwegyesa? karimu amashomo 19. Noobaasa kwega gamwe aharigo nari goona kurugiirira aha kubaasa kwawe.

Nyine kuba omwe aha Bajurizi ba Yehova?

Ngaaha. Nitumanya ngu buri muntu aine obugabe bw’okwecweramu eki arikwenda kwikiriza. Kwonka abantu abarikutunga okumanya okurikukwata aha Baibuli, nibacwamu gye.

Nimbaasa kwiha nkahi ebirikukiraho?

Omukura gwaitu jw.org nigworeka bingi ebirikukwata aha bi Abajurizi ba Yehova barikwikiriza n’ebi barikukora.

Nimbaasa kushaba nta kwegyesibwa Baibuli?

Shaba kurabira aha www.jw.org.
Handiikira orikukoresa endagiriro ekuri haihi aha ziri aha rupapura 2 omu magaziini egi.
Hika aha Abajurizi ba Yehova abakuri haihi.

a Nitwega n’abantu Baibuli buri omwe okwe nari abantu bakye hamwe.

b Kakateerwa Abajurizi ba Yehova. Kopi ezirikurenga obukaikuru 230 ez’akatabo aka zishohoziibwe omu ndimi ezirikurenga 260.

OBUHABUZI BW’AMAKA

“Omukazi wangye ku yaatandikire kwega Baibuli, nketegyereza empindahinduka z’amaani omuriiwe. Eka yaitu ekabamu empindahinduka nungi. Ahabw’okwenda kumanya ebi yaabaire naayega, naanye nkatandika kwega Baibuli. Ebi naayegire bikampindura omuntu murungi. Okwega Baibuli kukagaita eka yaitu.”—Eziquiel.

“Bwanyima y’okutandika kwega Baibuli, nkarekyera aho kukoresa emibazi erikutokooza obwongo, naarekyera aho kunywa amaarwa maingi, kandi naayega kurinda ekiniga kyangye. Enju yangye hati eboneire kandi etebeekaniise gye. Ninsiima munonga ab’omu ka yangye, kandi ninkunda kugira eki naakora kubashemeza. Nshemereirwe munonga.”—Karen.

“Abantu abamwe nibancwera orubanja ahabw’okwega Baibuli. Kwonka ibanyi naashagika okucwamu kwangye, arikugira ati: ‘Tindikufayo eki abantu barikugamba. Ku ndikureeba orikuhinduka kukora ebirungi, ekyo nikyo ndikutwara nka kikuru. Gumizamu nookora eki orikukora.’ Eka yaitu ekaba etakabamuga mpindahinduka nungi!”—Viniana.