EBIBUUZO EBI BAIBULI ERIKUGARUKAMU
Ekiro ky’Okucwa Orubanja niki?
Ahabw’eki ekiro ky’okucwa orubanja kiraareete okushemererwa?
Omu bwire bw’okuhandiikwa kwa Baibuli, Ruhanga akaba akoresa Abaramuzi kujuna abantu be kuruga omu butari buringaaniza. (Abaramuzi 2:18) Baibuli neeshoboorora aha kiro ky’Okucwa Orubanja nk’obunaku bw’okushemererwa obu Yehova omuramuzi w’ensi yoona, araabe naajuna abantu kuruga omu butari buringaaniza.—Shoma Zaaburi 96:12, 13; Isaaya 26:9.
Ruhanga atooraine Yesu kucwera abahuriire n’abafiire orubanja omu buringaaniza. (Ebyakozirwe 10:42; 17:31) Abantu baingi bakafa batarikumanya Ruhanga. Aha kiro ky’Okucwa Orubanja, Yesu naaza kuzoora abantu nk’abo nabo bamanye Ruhanga ow’amazima kandi b’amukunde.—Shoma Ebyakozirwe 24:15.
Ahabw’enki Ekiro ky’Okucwa Orubanja kiraamare emyaka rukumi?
Abafu nibaija kuzoorwa omu myaka rukumi. (Okushuuruurwa 20:4, 12) Nikiija kwetengyesa obwire kubaasa kwega emitwarize ya Ruhanga kandi bakamworobera. Okutaana n’oku baingi barikuteekateka, Baibuli neeyoreka ngu abantu nibaija kucwerwa orubanja kurugiirira aha bi baraakore bwanyima y’okuzooka.—Shoma Abarooma 6:7.
Kandi Baibuli neegamba n’aha kiro ky’okucwa orubanja ekiraabeho ahonaaho emyaka rukumi etakatandikire. Ekiro ekyo nikyetwa emperu, nk’oku kirikugambwaho aha kutandika kw’omunaara ogu. Aha kiro ekyo, Ruhanga naaza kucwekyereza abantu ababi abatarikumutiina. (2 Petero 3:7) N’ahabw’ekyo, twine kufayo munonga kubaasa kuhamya rukundo ei twiniire Ruhanga.—Shoma 2 Petero 3:9, 13.