Akaba Naakunda Abantu

1, 2. Ni buhame ki bumwe oburikworeka ngu Yesu naakunda abantu munonga?

OBWENGYE bwa Yehova obw’omutaano nibureebekyera omu kihangirwe kye eky’okubanza niwe Omwana we ow’omujigaijo. Omwana we akooreka obwengye obwo obu yaabaire naakora na Ishe “nk’omukozi mukuru.” Buzima nitubaasa kutebeereza okushemererwa n’okumarwa ebi yaagizire obu Ishe “yaataho eiguru” n’obu “yaayoreka emisingi y’ensi.” Kwonka, Omwana wa Ruhanga ow’omujigaijo akaba naakunda munonga abantu okukira ebintu ebindi ebyahangirwe. (Enf. 8:22-31) Buzima, Yesu n’obu yaabaire atakaizire omu nsi akaba naakunda munonga abantu.

² Bwanyima, Omwana wa Ruhanga ow’Omujigaijo akooreka ngu akaba naakunda munonga Ishe n’abantu, yaikiriza ‘yaayeyihaho ekitiinisa’ yaazaarwa omu muringo gw’abantu. Akakora eki ahabw’okwenda kuhayo amagara ge ‘nk’ekitambo okucungura baingi.’ (Fil. 2:5-8; Mat. 20:28) Buzima akooreka ngu naakundira kimwe abantu! Obu Yesu yaabaire ari omu nsi, Ruhanga akamuha amaani g’okukora eby’okutangaaza, ebyayorekire ngu akaba naakunda munonga abantu. N’ahabw’ekyo Yesu akooreka ebintu birungi ebiri haihi kubaho omu nsi yoona.

3. Hati nituza kwega ahari ki?

³ Yesu okwija omu nsi kikamubaasisa ‘kubuurira amakuru marungi g’Obukama bwa Ruhanga.’ (Luk. 4:43) Yesu akaba naamanya ngu Obukama nibwija kweza eiziina rya Ishe, kandi ngu nibwo buraahezeho endwara zoona. Niyo enshonga ahabw’enki obu yaabaire naabuurira, akaba ayoreka ngu naafayo munonga aha bantu. Ahabw’enki ekyo ni kikuru ahariitwe? N’ahabw’okuba ebi yaakozire nibituhwera kugira amatsiko aha biro by’omumaisho. Ka tureebe eby’okutangaaza biina ebi Yesu yaakozire.

‘AKABA AINE AMAANI G’OKUKIZA’

4. Niki ekyabaireho obu Yesu yaabugana omubembe?

⁴ Yesu ari omu buheereza bwe, akaza n’omu bicweka bya Galilaaya. Ku yaabaire ari omu tauni emwe yaareeba omushaija owaabaire arwaire ebibembe. (Mak. 1:39, 40) Kumanya ngu omushaija ogu akaba arwaire munonga, omushaho Luka akagira ngu akaba ‘ashwekirwe ebibembe.’ (Luk. 5:12) “[Omubembe] ku yaareebire Yesu, yaajuumara, yaamweshengyereza ati: Mukama wangye, ku oraabe nookunda, noobaasa kunshemeza.” Omushaija ogwo akaba atarikubangaanisa ngu Yesu aine amaani g’okumukiza, kwonka akaba naayenda kumanya yaaba Yesu naayenda kukikora. Yesu akagarukamu ata omushaija ogwo?

Akaba naateekateeka ahari ki, ku yaareebire omushaija ogu obundi owaabaire naareebeka kubi ahabw’ebibembe? Mbwenu shi akaba naija kuba nk’Abafarisaayo abaabaire nibatwariza kubi abantu abaabaire baine ebibembe? Ku waabaire ori iwe okaba noija kukora ki?

5. Niki ekyareeteire Yesu kugira ngu “ninkunda!” obu yaabaire naza kutambira omubembe?

⁵ Obundi omushaija ogu owaabaire arwaire ebibembe naabaasa kuba ataragambiire ahaiguru ati: “Nsiisikaire! nsiisikaire!” nk’oku ebiragiro bya Musa byabaire nibigira. Ekyo Yesu tarakigambireho. Kureka we akata omutima aha mushaija ogu arikwenda kumuhwera. (Lev. 13:43-46) Titurikumanya gye eki Yesu yaabaire naateekateeka, kwonka nitumanya ekyabaire kiri omu mutima gwe. Yesu akagirira omushaija ogu esaasi, yaakora ekirikutangaaza. Akagorora omukono gwe, yaakwata aha mubembe, kandi omu iraka ry’embabazi yaagira ati: “Ninkunda! Shemera.” Ahonaaho “ebibembe byamurugaho.” (Luk. 5:13) Buzima, amaani ga Yehova gakahwera Kristo kukora eky’okutangaaza ekyo yaayoreka ngu akaba naakunda munonga abantu.​—Luk. 5:17.

6. Eby’okutangaaza ebi Yesu yaakozire n’eby’omutaano bita, kandi nibyoreka ki?

⁶ Amaani ga Ruhanga gakabaasisa Yesu Kristo kukora eby’okutangaaza bitari bimwe na bimwe. Akatambira abaine ebibembe, endwara z’emiringo yoona, n’obumuga omu bantu. Ebyahandiikirwe nibigira biti: “Abantu baatangaara, ku baareebire ebiteta nibigamba, ebimuga nibikira, ebirema nibigyenda, n’empumi nizireeba.” (Mat. 15:31) Obumwe, abashaho nibaiha omu bantu abandi ebicweka by’omubiri nk’omutima, entsigo, ebihaha, n’ebindi babita omu barwaire kubahwera. Kwonka we Yesu akaba akiza ebicweka by’omubiri byenyine ebirwaire! Kandi akaba akiza abantu ahonaaho, obumwe ari hangahari. (Yoh. 4:46-54) Eby’okureeberaho ebyo nibyoreka ki? Ahabw’okugira ngu hati Yesu yaayemekirwe nk’Omugabe, aine amaani n’ekihika ky’okukiza abarwaire kutagaruka kurwara. Okumanya oku Yesu yaatwariize abantu, nikutuhamiza ngu omu nsi ensya obunabi bwa Baibuli nibwija kuhikiirira oburikugira buti: “Aryasaasira abooro n’abakyene.” (Zab. 72:13) Buzima, ekihika nikiija kureetera Yesu kuhwera abaine amagara mabi.

“IMUKA, OYEKORERE EKIRAGO KYAWE, OGYENDE”

7, 8. Shoboorora ebyabaireho Yesu atakabugaine omushaija owaabaire arwaire aha kiyanja kya Beseseda.

⁷ Hakahinguraho ameezi makye Yesu aherize kubugana omubembe omuri Galilaaya. Akaruga Galilaaya yaaza Buyudaaya kubuurira amakuru marungi g’Obukama. Ahabw’okubabuurira amakuru marungi n’ahabw’emitwarize ye mirungi, akahwera abantu baingi abarikubaasa kuba baahikire omu nkumi. Akaba aine ekihika ky’okubuurira abooro amakuru marungi, okuranga okukomoororwa kw’enkwatwa, n’okushemba abacwekire emitima.​—Isa. 61:1, 2; Luk. 4:18-21.

⁸ Bwanyima okwezi kwa Nisani kukahika. Yesu arikworobera ekiragiro kya Ishe, akaza Yerusaalemu kukwata Okuhingurwaho. Orurembo rukaba rurimu abantu baingi abaabaire nibaija aha mukoro ogu. Bukiizi-bwa-bumosho bwa hekalu hakaba hariyo ekiyanja kya Beseseda, kandi okwo Yesu akabuganayo omushaija owaabaire arwaire.

9, 10. (a) Niki ekyabaire kireetera abantu kuza aha kiyanja kya Beseseda? (b) Yesu akakora ki aha kiyanja ekyo, kandi eki nikitwegyesa ki? (Reeba ekishushani aha kutandika.)

⁹ Abantu baingi abarwaire n’abamuga bakaba bateeranira aha kiyanja kya Beseseda. Niki ekyabaire kibareeta aha mwanya ogu? Ahabw’enshonga zitarikumanywa, bakaba nibaikiriza ngu omurwaire yaaza omu kiyanja eki amaizi gatakatabangwirwe, naija kukira omu muringo gw’eky’okutangaaza. Teekateeka aha ku embeera zaabaire ziba ziri omu mwanya ogwo. Abantu bakaba baba nibatabana kuza omu kiyanja, beerarikiriire, kandi bataine matsiko. Kwonka shi niki ekyareeteire Yesu kuzayo, kandi obwo we yaabaire ahikiriire ataine kamogo koona? Buzima, Yesu ahabw’okugira esaasi, akahika aha mushaija owaabaire atwire arwaire Yesu atakazairwe omu nsi.​—Shoma Yohaana 5:5-9.

¹⁰ Noobaasa kutebeereza obusaasi bw’omushaija ogwo obu Yesu yaamubuuza ku araabe yaabaire naayenda kutambirwa? Akagarukamu ahonaaho. Akaba naayenda kukira kwonka akaba ataine matsiko, ahakuba hakaba hatariho w’okumuhwera kuza omu kiyanja. Yesu akaragiira omushaija ogwo kukora ekitarikubaasika, kwekorera ekirago kye akagyenda. Omushaija ogwo akagyendera aha bigambo bya Yesu, yaayekorera ekirago kye yaatandika kugyenda. Eki ka n’eky’okureeberaho ekirikushemeza ekirikworeka ebi Yesu araakore omu nsi ensya! Omu ky’okutangaaza eki, nitureeba embabazi za Yesu. Akaba asherura abaine ebi barikwetenga. Eki kishemereire kutuhiga kugumizamu nitusherura abantu omu kicweka kyaitu abaine amaganya ahabw’ebintu bibi ebirikubaho omu nsi egi.

“N’OHA OWAAKORA AHA KIJWARO KYANGYE?”

11. Ebiri omuri Mako 5:25-34 nibyoreka bita ngu Yesu ainiire abarwaire embabazi?

¹¹ Shoma Mako 5:25-34. Kumara emyaka 12, omukazi ogwo akaba atwire omu kuhemuka. Endwara ye ekaba neekwata aha magara ge goona, otwariiremu n’okuramya kwe. N’obu araabe yaaragwize omu bashaho baingi, akamarirayo n’ebintu bye, embeera ekeeyongyera kuba mbi. Kwonka eizooba rimwe, omukazi ogu akateekateeka ekindi ekyabaire nikibaasa kumukiza. Akacwamu kuba haihi na Yesu. Akaraba omu bantu baingi yaakwata aha kijwaro kya Yesu. (Lev. 15:19, 25) Yesu ku yaamanyire ngu amaani gaamuhwamu, akabuuza ngu n’oha owaamukwataho. Omukazi akaija “aine obwoba naatetema, yaagwa ahansi omu maisho ge, yaamugambira amazima goona.” Yesu ku yaamanyire ngu Yehova Ishe niwe yaakiza omukazi ogwo, akamutwariza gye arikugira ati: “Mwana wangye, okwikiriza kwawe nikwo kwakukiza, yegyendere n’obusingye, okirire kimwe endwara yaawe.”

12. (a) Kurugiirira aha bi twaheza kureeba, noobaasa kushoboorora ota ahari Yesu? (b) Yesu akatuteeraho ky’okureeberaho ki?

¹² Yesu ka aine embabazi! Nitureeba ngu aine embabazi nyingi omu mutima gwe ahabw’abo abarikubonabonesibwa endwara. Sitaane naatubeihabeiha ngu titurikukundwa kandi ngu titwine mugasho. Eby’okutangaaza ebi Yesu yaakozire nibyoreka gye ngu naatufaho kandi naafayo n’aha buremeezi obu twine. Ka n’Omugabe kandi Omunyamurwa Omukuru orikusaasibwa abantu! (Heb. 4:15) Nikibaasa kutatworobera kwetegyereza enyehurira z’abo abarikuba barwaire endwara ezigumire eitamba, na munonga twaba tutakarwarahoga endwara nk’ezo. Nitubaasa kwijuka ngu Yesu akaba asaasibwa abarwaire n’obu we araabe atararwaireho. Eki Yesu yaakozire nikituhiga kukora nikyo kimwe nk’oku turikubaasa.​—1 Pet. 3:8.

‘YESU AKARIRA’

13. Okuzooka kwa Laazaaro nikworeka kuta emitwarize ya Yesu?

¹³ Yesu akaba naakwatwaho obusaasi bw’abandi. Akakwatwaho oku abandi baatwarize ahabw’okufa kwa munywani we Laazaaro, “yaatsinda” kandi “yaagira obusaasi.” Akeehurira atyo n’obu araabe yaabaire naamanya ngu ari haihi kuzoora Laazaaro. (Shoma Yohaana 11:33-36.) Yesu akaba atarikuhemuka kworeka enyehurira ze. Abareebi bakaba nibabaasa kureeba rukundo ei Yesu yaabaire ainiire Laazaaro n’ab’omu ka ye. Yesu ka yaayorekire embabazi nyingi arikukoresa amaani agu yaahairwe Ruhanga kuzoora munywani we!​—Yoh. 11:43, 44.

14, 15. (a) Niki ekirikworeka ngu Yehova aine ekihika ky’okwihaho okubonabona kw’abantu? (b) Niki ekirikushemeza aha kigambo ky’Orugriika ekirikuvunuurwa nk’ebituuro?

¹⁴ Baibuli neeshoboorora ahari Yesu ‘nk’ekishushani’ ky’omuhangi ekyabuzima. (Heb. 1:3) N’ahabw’ekyo, ahabw’eby’okutangaaza ebi Yesu yaakozire, akooreka ngu we na Ishe baine ekihika ky’okwihaho obusaasi bw’endwara n’okufa. Ekihika eki nikiija kureetera Yesu kuzoora abantu abarikukira aha baazookire abarikugambwaho omu Baibuli. Yesu akagira ngu obunaku nibwija kuhika, abari omu bituuro boona barugyemu.​—Yoh. 5:28, 29.

¹⁵ Ekigambo ekirikuvunuurwa nka ‘ebituuro’ nikiruga omu kigambo ky’Orugriika ekirikumanyisa ‘okwijuka.’ Eki kihikire, ahakuba Ruhanga ow’Obushoboorozi Bwona, owaahangire ebiri omu nsi n’omu iguru, naabaasa kwijuka buri kimwe ekirikukwata aha bakundwa baitu abaafiire, otwariiremu n’emitwarize yaabo ei baazairwe nayo n’ei baatungire bwanyima. (Isa. 40:26) Kandi tikugira ngu naabaasa kwijuka kwonka, beitu we n’Omwana we nibenda kukikora. Okuzooka kwa Laazaaro n’okw’abandi abarikugambwaho omu Baibuli nikworeka ekirikwija kubaho omu nsi yoona ensya.

EKI TURIKWEGYERA AHA BY’OKUTANGAAZA BYA YESU

16. Abakristaayo baingi abaraagume bari abeesigwa nibaija kutunga bujunaanizibwa ki?

¹⁶ Twaguma turi Abakristaayo abeesigwa, nitubaasa kwija kureeba kimwe aha by’okutangaaza ebirikukirayo, nikwo kuhonokaho aha kubonabona kwingi. Ahonaaho bwanyima y’orutaro rwa Haramagedoni, nihaija kubaho eby’okutangaaza bingi, kubaasisa abantu kugira amagara marungi. (Isa. 33:24; 35:5, 6; Kush. 21:4) Teera akashushani orikureeba abantu barikunaga garubindi, ebikoni, obugaari, ebirikuhwera kuhurira, n’ebindi. Ahabw’enshonga nungi, abaraahonokeho ahari Haramagedoni, Yehova naija kubaha amagara marungi. Nibaija kugira emirimo y’okukora. Nibaija kukora baine omuhimbo kuhindura ensi yaitu paradiso.​—Zab. 115:16.

17, 18. (a) Ni kigyendererwa ki ekikuru ekyareeteire Yesu kukora eby’okutangaaza? (b) Ahabw’enki oshemereire kuteeraho n’agaawe goona kuza omu nsi ya Ruhanga ensya?

¹⁷ Yesu okutambira abantu ira nikigaruramu amaani “omutwe muhango gw’abantu” ab’obunaku obu, kihamya n’amatsiko gaabo ag’okwija kutambirwa endwara zaabo zoona. (Kush. 7:9) Okutambirwa okwo kukooreka enyehurira ze na rukundo mpango ei Omwana wa Ruhanga ow’omujigaijo ainiire abantu. (Yoh. 10:11; 15:12, 13) Embabazi za Yesu nizooreka ngu Yehova naafayo ahari buri omwe aha baheereza be.​—Yoh. 5:19.

¹⁸ Abantu nibatsinda, baine obusaasi bwingi, kandi nibafa. (Rom. 8:22) Nitwetenga ensi ensya, ahu turaije kukirira kimwe endwara zaitu zoona nk’oku Ruhanga yaaraganiise. Malaki 4:2 nihatureetera kuhamya ngu abaraatambirwe nibaija ‘kukina nk’enyana,’ bashemereirwe ahabw’okuruga omu butahikiirira. Okusiima Ruhanga okurikuruga omu mutima n’okwikiririza omu biraganiso bye, ka bitureetere kukora kyona ekirikwetengwa kubaasa kuba abahikire kutaaha omu nsi egyo ensya. Ka nikigaruramu amaani kumanya ngu eby’okutangaaza ebi Yesu yaakozire obu yaabaire ari omu nsi, bikaba nibyoreka oburuhuuko obw’ebiro byona obu abantu bari haihi kutunga ahansi y’obutegyeki bwe!