Kora Ebirikuhikaana n’Okushaba Kw’eky’Okureeberaho​—Ekicweka I

1. Nitubaasa kukoresa tuta okushaba okuri omu Matayo 6:9-13 omu kubuurira kwaitu?

ABANTU baingi nibabaasa kugamba okushaba kwa Mukama Waitu kuruga omu mutwe. Omu kubuurira, nitukira kugamba aha kushaba oku kuhwera abu turikubuurira kwetegyereza ngu Obukama bwa Ruhanga ni gavumenti eyaabuzima, erikwija kureeta empindahinduka nungi omu nsi. Nari nitubaasa kugamba aha kicweka ekirikubanza omu kushaba oku, kworeka ngu Ruhanga aine eiziina eriine kwezibwa, nari kutwarwa nk’eririkwera.​—Mat. 6:9.

2. Nitumanya tuta ngu Yesu akaba atarikwenda ngu buri kushaba tugume nitukoresa buri kigambo ekiri omu kushaba kw’eky’okureeberaho?

² Mbwenu shi Yesu akaba naayenda ngu buri kushaba tugume nitukoresa buri kigambo ekiri omu kushaba oku, nk’oku baingi barikukora omu madiini agarikweyeta Amakristaayo? Ngaaha. Yesu atakeegyeise okushaba oku okw’eky’okureeberaho, akabanza yaagira ati: “Ku muraabe nimushaba, murekye kushaba nimugarukagaruka omu bigambo.” (Mat. 6:7) Aha izooba erindi, akagamba aha kushaba nikwo kumwe kwonka arikukoresa ebigambo ebindi. (Luk. 11:1-4) N’ahabw’ekyo, Yesu akatuhwera kumanya ebintu ebi tushemereire kushaba n’oku tushemereire kubikuratanisa. Niyo nshonga ahabw’enki kihikire kukweta okushaba kw’eky’okureeberaho.

3. Ni bibuuzo ki ebi turikubaasa kuteekateekaho twaba nitushwijuma okushaba kw’eky’okureeberaho?

³ Omu kicweka eki n’ekirikukurataho, nituza kushwijuma ebiri omu kushaba kw’eky’okureeberaho. Twaba nitubyega, yebuuze oti: ‘Eki ekiri omu kushaba kw’eky’okureeberaho nikibaasa kumpwera kita kushemeza okushaba kwangye? Kandi ekikuru munonga, ninkora ebirikuhikaana n’okushaba oku?’

“TATAITWE OW’OMU IGURU”

4. Ekigambo “Tataitwe” nikitwijutsya ki, kandi ni muringo ki ogu Yehova ari Ishe Abakristaayo abaine amatsiko g’okutuura omu nsi?

⁴ Ekigambo “Tataitwe,” beitu kitari “Tata,” nikitwijutsya ngu turi “ab’eishe-emwe” abarikukundana. (1 Pet. 2:17) Ka twine omugisha gw’amaani! Abakristaayo abashukirweho amajuta, abahindwirwe abaana ba Ruhanga kandi baine amatsiko g’okuza omu iguru, omu bwijwire nibagira ngu “Taata” baaba nibagamba ahari Yehova. (Rom. 8:15-17) Abakristaayo abaine amatsiko g’okutuura omu nsi ebiro byona, nabo nibagira ngu “Taata” barikumanyisa Yehova. Niwe arikubaha amagara, kandi boona abarikumuramya omu mazima naabaha ebirikwetengyesa. Abaraatuure omu nsi nibaija kuba abaana ba Ruhanga omu bwijwire baaheza kuba abahikiriire, kandi bakooreka ngu n’abeesigwa bwanyima y’okugyezibwa okw’aha muheru.​—Rom. 8:21; Kush. 20:7, 8.

5, 6. Ni kiconco ki ekirungi eki abazaire barikubaasa kuha abaana baabo, kandi buri mwana aine kukoresa ata ekiconco eki? (Reeba ekishushani aha kutandika.)

⁵ Abazaire nibaha abaana baabo ekiconco kirungi baabeegyesa kushaba kandi bakabahwera kureeba Yehova nka Ishebo ori omu iguru. Ow’eishe-emwe hati orikuheereza nk’omureeberezi orikutaayaayira ebibiina omuri South Africa naagira ati: “Kuruga obu bahara baitu baazaarwa, nkaba nshaba nabo buri kiro okwihaho naaba ntari muka. Bahara baitu nibagira ngu tibarikwijuka ebigambo byenyini ebi naabaire nkoresa omu kushaba okwo okwa nyekiro. Kwonka, nibaijuka embeera eyaabaire eba eriho, okugaaniira na Tataitwe, Yehova omu muringo ogushemeire, n’okuhurira hariho obutebeekana n’oburinzi. Ahonaaho ku baatandikire kweshabira ahabwabo, nkabahiga kushaba barikugamba kugira ngu mbaase kubahurira barikugambira Yehova ebiteekateeko byabo n’enyehurira zaabo. Ogu gukaba guri omugisha gw’amaani kuteeraho kumanya ebiri omu mitima yaabo. Bwanyima nkaba mbatendeka omu muringo murungi kugamba aha nshonga nkuru eziri omu kushaba kw’eky’okureeberaho kugira ngu okushaba kwabo kugire omusingi guhami.”

⁶ Tikirikutangaaza kureeba ngu bahara b’ow’eishe-emwe ogwo, bakagumizamu barikutunguuka omu by’omwoyo. Hati bari omu bushwere burungi, kandi hamwe na baibabo, nibakora ebi Ruhanga arikukunda omu buheereza obw’obutwire. Abazaire tihaine ekiconco eki barikubaasa kuha abaana baabo ekirikukira ekyo eky’okubahwera kugira omukago guhami na Yehova. N’amazima, buri omwe aine kwecweramu yaaba araagume aine omukago gw’omuhendo nk’ogwo. Eki nikitwariramu okwega kukunda eiziina rya Ruhanga, bakaritwara nk’ery’ekitiinisa.​—Zab. 5:11, 12; 91:14.

“EIZIINA RYAWE RYEZIBWE”

7. Abaheereza ba Ruhanga baine bujunaanizibwa ki, kwonka nikyetengyesa ngu tukore ki?

⁷ Ka n’omugisha gw’amaani kumanya eiziina rya Ruhanga n’okuba “eihanga eririkwetererwa eiziina rye.” (Byak. 15:14; Isa. 43:10) Nitushaba Tataitwe ow’omu iguru tuti: “Eiziina ryawe ryezibwe.” Omu kushaba nk’okwo, nitugambira Yehova kutuhwera kwetantara kukora nari kugamba ekintu ekirikubaasa kureetera eiziina rye kutaheebwa kitiinisa. Titurikwenda kuba nka bamwe omu kyasha ky’okubanza abaabaire batarikukora ebirikuhikaana n’ebi baabaire nibabuurira. Entumwa Paulo akabahandiikira ati: “Eiziina rya Ruhanga nirijumwa omu Banyamahanga ahabwanyu.”​—Rom. 2:21-24.

8, 9. Ha eky’okureeberaho kworeka oku Yehova arikuha omugisha abo abarikufayo kweza eiziina rye.

⁸ Nitwenda kweza eiziina rya Ruhanga. Munyaanyazi-itwe omuri Norway bwanyima ya iba kufa, we n’omutabani w’emyaka ebiri bakaguma bonka. “Bukaba buri obwire bugumire,” nikwo arikushoboorora. “Nkaba nshaba buri izooba, haihi buri shaaha, kugira amaani g’okurinda enyehurira yangye kugira ngu ntaha Sitaane ah’okwihirira kujuma Yehova ahabw’okucwamu kubi kwangye nari ahabw’okutaba mwesigwa. Nkaba niinyenda kweza eiziina rya Yehova, kandi nkaba niinyenda ngu omwana wangye aije agarukye areebe ishe omu Paradiso.”​—Enf. 27:11.

⁹ Mbwenu shi Yehova akagarukamu okushaba okwo okutarimu kweyendeza? Eego buzima. Munyaanyazi-itwe ogu akatunga obushagiki ahabw’okuguma naakwatanisa n’abaheereza ba Yehova bagyenzi be. Bwanyima y’emyaka etaano, akashwerwa omureeberezi. Omutabani hati oine emyaka 20 n’ow’eishe-emwe obatiziibwe. Naagira ati: “Ninshemererwa munonga ahabw’okuba ibanyi akampwera kumworora.”

10. Niki ekirikwetengyesa kubaasa kweza eiziina rya Ruhanga omu bwijwire?

¹⁰ Niki ekirikwetengyesa kubaasa kweza eiziina rya Ruhanga omu bwijwire n’okuriihaho ebijumo byona? Ekyo kubaasa kubaho, Yehova aine kugira eki yaakora kwihaho abo boona abarikwanga nkana kwikiriza ngu niwe ahikire kutegyeka byona. (Shoma Ezekieli 38:22, 23.) Mporampora abantu nibaija kuba abahikiriire. Ka twine ekihika ky’okureeba ebihangirwe byona ebiine obwengye birikutwara eiziina rya Ruhanga, Yehova nk’eririkwera! N’ekiraarugyemu, Tataitwe ow’omu iguru naija “kuba byona ahari boona.”​—1 Kor. 15:28.

“OBUKAMA BWAWE BWIJE”

11, 12. Kuza kuhika aha muheru gw’ekyasha kya 19, Abakristaayo ab’amazima bakamanyisibwa ki?

¹¹ Yesu atakatembire mu iguru, entumwa ze bakamubuuza bati: “Mukama waitu, obu nibwo bunaku obu orikwenda kugaruriramu obugabe bwa Israeli?” Oku Yesu yaabagarukiremu kukooreka ngu obwire bukaba butakahikire kumanya obu Obukama bwa Ruhanga bwabaire nibuza kutandika kutegyeka. Akagambira entumwa ze kuta omutima aha murimo mukuru gw’okubuurira ogu baabaire baine kukora. (Shoma Ebyakozirwe 1:6-8.) Kwonka nabwo, Yesu akeegyesa abakuratsi be kugirira ekihika Obukama bwa Ruhanga obwabaire nibuza kwija. N’ahabw’ekyo, Abakristaayo kuruga omu bwire bw’entumwa, tutwire nitushaba ngu bwije.

¹² Obwire ku bwahikire obw’Obukama bwa Ruhanga oburikwebemberwa Yesu kutandika kutegyeka omu iguru, Yehova akahwera abantu be kumanya obwire obwo. Omuri 1876, ekicweka eki Charles Taze Russell yaahandiikire kikateerwa omu magaziini erikwetwa Bible Examiner. Ekicweka ekyo ekyabaire kiine omutwe, “Obwire bw’Abanyamahanga: Nibuhendera Ryari?,” kikagamba ahari 1914 nk’omwaka gw’omutaano. Ekicweka ekyo kikooreka ngu ‘omwanya gw’emyaka mushanju’ ogurikugambwaho omu bunabi bwa Danieli gwine akakwate ‘n’obusingye bw’Abanyamahanga’ obu Yesu yaagambireho.a​—Dan. 4:16; Luk. 21:24.

13. Niki ekyabaireho omuri 1914, kandi kuruga obwo, ebirikubaho omu nsi nibihamya ki?

¹³ Omuri 1914, hakabaho orutaro ahagati y’amahanga ga Buraaya, kandi rukajanjaara rwaba orw’ensi yoona. Ahu rwagiire kuhendera omuri 1918, hakaba hariho eibura ry’eby’okurya kandi hakabaho na tsinyiga y’amaani eyaitsire abantu abarikukira abaitsirwe omu rutaro. N’ahabw’ekyo ‘akamanyiso’ aku Yesu yaabaire ahaire kworeka okubaho kwe nk’Omugabe musya w’ensi okutarikureebwa, kakatandika kuhikiirira. (Mat. 24:3-8; Luk. 21:10, 11) Hariho obuhame bwingi oburikworeka ngu 1914 nibwo Mukama Yesu Kristo “yaaheebwa ekirunga.” Akagyenda “naasingura omu kurwana ngu abone kusingurira kimwe.” (Kush. 6:2) Akashemeza eiguru omu rutaro obu yaarwanisa Sitaane na baadaimoni be, abaanagirwe aha omu nsi. Kuruga obwo, abantu bareebire okuhikiirira kw’ebigambo ebihandiikisiibwe Ruhanga ebi: “Iwe ensi, naiwe enyanja, muryareeba enaku ahabw’okuba omuregi yaabaizira n’ekiniga kingi, ahakuba naamanya ku aine omwanya mukye.”​—Kush. 12:7-12.

14. (a) Ahabw’enki na hati kikiri kikuru kushaba ngu Obukama bwa Ruhanga bwije? (b) Twine omugisha gw’okukora ki?

¹⁴ Obunabi oburi omu Okushuuruurwa 12:7-12 nibushoboorora ahabw’enki Obukama bwa Ruhanga bwatandikire kutegyeka, kandi omu bwire nibwo bumwe hakabaho n’ebintu bibi ebirikuteganisa abantu. Yesu, Omugabe w’Obukama bwa Ruhanga, akatandika kutegyeka ahagati omu bazigu be. Okuhitsya obu araaheze kusingura kandi akahezaho obubi bwona omu nsi, nitwija kugumizamu nitushaba ngu Obukama bwa Ruhanga bwije. Kwonka kandi, twine kukora ebirikuhikaana n’okushaba okwo obwo turikwejumba omu kuhikiirira ‘kw’akamanyiso’ ako. Yesu akagira ati: “Engiri egi ey’obukama eryagambwa omu nsi zoona okuba eky’okuhamya aha mahanga goona; obwo nibwo emperu erihika.”​—Mat. 24:14.

‘EBI OKUNDA BIKORWE OMU NSI’

15, 16. Nitubaasa kukora tuta ebirikuhikaana n’okushaba ngu ebi Ruhanga arikukunda bikorwe omu nsi?

¹⁵ Emyaka nka 6,000 ey’enyima, ebi Ruhanga arikukunda bikaba nibikorwa gye omu nsi. Egi niyo enshonga ahabw’enki Yehova yaarebire obutandikiro burungi obu yaahaire abantu, reero akagira ati: “Bikaba biri birungi munonga.” (Kut. 1:31) Bwanyima Sitaane akagoma, kandi kuruga obwo, abantu bakye nibo barikukora ebi Ruhanga arikukunda omu nsi. Kwonka hati twine omugisha gw’okuba abahuriire obu obukaikuru nka munana Abajurizi ba Yehova barikushaba ngu ebi Ruhanga arikukunda bikorwe omu nsi, kandi bakateeraho n’okukora ebirikuhikaana n’okushaba okwo. Eki nibakikora omu muringo ogu barikutwazamu kandi barikugira n’omujinya gw’okwejumba omu kuhindura abantu abeegi.

¹⁶ Nk’eky’okureeberaho, Munyaanyazi-itwe owaabatiziibwe omuri 1948 kandi owaaheereizeho nk’Omumisani omuri Afrika, naagira ati: “Kuhikaana n’ekicweka ky’okushaba oku, butoosha ninshaba ngu abantu abari nk’entaama babaase kuhikwaho kandi bahwerwe obwire butakahweireyo. Ku ndikuba ndi haihi kubuurira omuntu, ninshaba obwengye kubaasa kumuhika aha mutima. Kandi aha bikwatiraine n’abo abari nk’entaama abaabuuriirwe, ninshaba ngu Yehova ahe omugisha okuteeraho kwaitu kubahwera.” Niyo nshonga ahabw’enki munyaanyazi-itwe ogu ow’emyaka 80 abaire omusinguzi omu kubuurira, kandi arikukora n’abandi abaasize kuhwera abantu baingi kuba Abajurizi ba Yehova. Hatariho kubanganisa noobaasa kuteekateeka aha bandi abarikwehayo beekundiire kukora ebi Ruhanga arikukunda, n’obu baraabe baine obweremwa bwa bukuru.​—Shoma Zaaburi 110:3.

17. Nootwara ata eki Yehova araakore kugarukamu okushaba kwaitu ngu ebi arikukunda bikorwe omu nsi?

¹⁷ Okuhitsya obu abazigu b’Obukama bwa Ruhanga baraihwe omu nsi, nitwija kuguma nitushaba ngu ebi Ruhanga arikukunda bikorwe omu nsi. Bwanyima nitwija kureeba ebi Ruhanga arikukunda birikukorwa omu nsi omu bwijwire, obuhumbi bw’abantu ku baraazoorwe omu paradiso omu nsi. Yesu akagira ati: “Mutatangaarira eki; ahakuba obunaku nibwija, abari omu bituuro boona obu barihurira eiraka [ryangye], bakarugamut.” (Yoh. 5:28, 29) Ka nibwija kuba obwire burikushemeza kutangirira abakundwa baitu abaafiire! Ruhanga naija kuragaza “amarira goona aha maisho” gaitu. (Kush. 21:4) Baingi aha baraazookye, ‘n’abatahikiriire,’ abaabaire bariho kandi bakafa batakeegire amazima agarikukwata ahari Yehova Ruhanga n’Omwana. Nigwija kuba omugisha gw’amaani abaraazookye kubeegyesa ebi Ruhanga arikukunda n’ebigyendererwa bye, kubahwera kuba abahikire kutunga ‘amagara agatahwaho.’​—Byak. 24:15; Yoh. 17:3.

18. Ebyetengo by’abantu ebikuru ni biiha?

¹⁸ Obusingye obw’ensi yoona n’obumwe nibirugiirira aha kweza eiziina rya Ruhanga, Yehova kurabira omu Bukama bwe. N’ahabw’ekyo, eky’okugarukamu omu bwijwire omu nshonga ishatu ezirikubanza omu kushaba kw’eky’okureeberaho nikiija kuhikiiriza ebyetengo bikuru eby’abantu. Kwonka, omu nshonga ina eziri omu kushaba kw’eky’okureeberaho okwa Yesu harimu ebindi byetengo. Nibiija kugambwaho omu kicweka ekirikukurataho.