Yehova Naayoreka Ata ngu Naatukunda?

1. Entumwa Yohaana naahiga Abakristaayo kuteekateeka ahari ki, kandi n’ahabw’enki?

EBIGAMBO by’entumwa Yohaana ebiri omu 1 Yohaana 3:1 nibituhiga kuteekateeka ahari rukundo ya Yehova. Yohaana okugira ngu “mureebe okukunda oku Isheboona yaatukunzire oku kuri,” akaba naayehanangiriza Abakristaayo kuteekateeka ahari rukundo mpango ei Ruhanga yaabaire abainiire. Okumanya ngu Yehova atwiniire rukundo nk’egyo, nikituhiga kwongyera kumukunda n’okuhamya omukago gwaitu nawe.

2. Ahabw’enki abamwe nibagumirwa kwikiriza ngu Ruhanga naabakunda?

² Kwonka abamwe, nibateekateeka ngu Ruhanga tarikubaasa kubakunda. Aharibo, abantu baine kutiina Ruhanga kandi bakamworobera. Nari obundi ahabw’enyikiriza zitahikire ezitsimbire emizi omuribo, nibateekateeka ngu Ruhanga taine rukundo, kandi ngu tibarikubaasa kumukunda. Kandi, hariho abarikwikiriza ngu Ruhanga naakunda abantu boona n’obu baakuba baine mitwarize ki. Nk’oku waayegire omu Baibuli, rukundo nigwo mutwarize mukuru gwa Ruhanga kandi Rukundo ye ekamuhiga kuhayo omwana we nk’ekitambo ahabwaitu. (Yoh. 3:16; 1 Yoh. 4:8) Kwonka, oku orikukunda Ruhanga nikubaasa kurugiirira aha ku waakuziibwe n’ahu waakuriire.

3. Niki ekirikubaasa kutuhwera kumanya ngu Ruhanga naatukunda?

³ Yehova naatukunda mu miringo ki? Eky’okugarukamu ky’ekibuuzo ekyo, nikirugiirira aha mukago gwaitu na Yehova Ruhanga. N’eky’amazima, Yehova niwe yaahangire abantu boona. (Shoma Zaaburi 100:3-5.) Egi niyo nshonga ahabw’enki Baibuli neeyeta Adamu omwana ‘wa Ruhanga,’ kandi Yesu akeegyesa abakuratsi be kweta Ruhanga “Tataitwe ow’omu iguru.” (Luk. 3:38; Mat. 6:9) Ahabw’okugira ngu Yehova niwe bukomooko bw’amagara kandi Tataitwe, omukago ogu twine nawe ni nk’ogw’omuzaire n’omwana. Ekirikumanyisa, Yehova naatukunda nk’oku omuzaire arikukunda abaana be.

4. (a) Yehova naataana ata aha bazaire ab’abantu? (b) Omu kicweka eki n’ekirikukurataho nituza kushwijuma ki?

⁴ Abazaire ab’abantu hatariho kubanganisa tibahikiriire. N’obu baakuteeraho bata, tibarikubaasa kuhika aha muringo ogu Ruhanga arikworekamu rukundo ye. Nangwa, n’abantu abamwe nibaguma nibaijuka omuringo mubi ogu abazaire baabo baabatwariizemu kibareetera kuguma baine enkojo omu biteekateeko. Eki nikishaasha munonga. Kwonka buzima, Yehova ti muzaire ow’omuringo nk’ogwo. (Zab. 27:10) Twamanya oku Yehova arikutukunda n’oku arikutufaho buzima nitwirira haihi nawe. (Yak. 4:8) Omu kicweka eki, nituza kushwijuma emiringo ena ei Yehova arikworeka ngu naatukunda. Omu kirikukurataho, nituza kureeba emiringo ena oku turikubaasa kworeka ngu nitumukunda.

YEHOVA NAATUHA EBIRUNGI AHABW’OKUTUKUNDA

5. Entumwa Paulo akagambira ki abantu b’Aseene aha bikwatiraine na Ruhanga?

⁵ Obu entumwa Paulo yaabaire ari Aseene, orurembo rwa Bugriika, akeetegyereza ngu orurembo orwo rukuba rurimu ebishushani bingi bya baaruhanga ebi abantu baabaire nibateekateeka ngu nibyo birikubaha amagara n’ebi barikwetenga. Ekyo kikahiga Paulo kugira ati: “Ruhanga owaahangire ensi n’ebintu byona ebirimu . . . niwe wenka aha abantu boona amagara n’omwitsyo na buri kintu kyona. . . . Omuriwe, tuba abahuriire, tugyenda kandi tugumaho.” (Byak. 17:24, 25, 28) Buzima ahabw’okugira ngu Yehova naatukunda, naatuha ‘ebintu byona’ ebirikubaisaho amagara gaitu. Teekateeka aha kirikutwarirwa omu bigambo ebyo.

6. Ensi neeyoreka eta ngu Ruhanga naatukunda? (Reeba ekishushani aha kutandika.)

⁶ Teekateeka aha nsi, ei Yehova Omuhangi yaahaire, “abantu.” (Zab. 115:15, 16) Abanyasayansi bamazire obwire bwingi n’esente nyingi barikuteeraho kusherura ebizinga ebirikubaasa kutuurwamu nk’ensi. N’obu abanyasayansi baraabe baboine ebizinga bingi, bahwairemu amaani ahabw’okugira ngu tihaine na kimwe aharibyo ekiine embeera nungi erikubaasisa amagara g’abantu kubaho nk’ensi. Ensi yo n’ey’omutaano aha bintu byona ebi Ruhanga yaahangire. Teekateeka ahari eki, okutashushana n’ebizinga byona ebiri omu iguru ebitarikumanywa muhendo, Yehova akahanga ensi eri ey’okutuurwamu, guri omwanya murungi, kandi eri eka y’abantu ey’obuteeka! (Isa. 45:18) Eki nikyoreka ngu Yehova buzima naatukunda munonga.​—Shoma Yobu 38:4, 7; Zaaburi 8:3-5.

7. Omuringo ogu Ruhanga yaatuhangiremu nigworeka guta ngu naatukunda?

⁷ N’obu Yehova araabe yaatuhangiire eka nungi, naamanya ngu abantu kubaasa kushemererwa kandi bakatunga okumarwa, nibeetenga ekirikukira aha byetengo by’omubiri. Omwana naahurira aine oburinzi, yaamanya ngu ishe naamukunda kandi naamufaho. Yehova akahanga abantu omu kishushani kye, yaabatamu ekyetengo ky’okumuramya n’okubaasa kumanya ngu naabakunda kandi ngu naabafaho. (Kut. 1:27) Ekindi, Yesu akagira ngu baine okushemererwa abo abarikumanya ekyetengo kyabo eky’eby’omwoyo. (Mat. 5:3) Yehova tataitwe oine rukundo naatuha eby’omubiri n’eby’omwoyo “atarikubariirira, ngu tubishemerererwe.”​—1 Tim. 6:17; Zab. 145:16.

YEHOVA NAATWEGYESA AMAZIMA AHABW’OKUTUKUNDA

8. Ahabw’enki turikubaasa kuhamya ngu “Ruhanga orikwesigwa” naatukunda?

⁸ Abazaire nibakunda abaana baabo kandi nibabarinda kutahabisibwa nari kutabeihwa. Kwonka abazaire baingi, tibarikubaasa kuhabura gye abaana baabo, ahakuba beehugize emitindo eri omu Kigambo kya Ruhanga. Ekirugiremu, habaireho okushoberwa n’enaku. (Enf. 14:12) Kwonka Yehova we, ni “Ruhanga orikwesigwa.” (Zab. 31:5) Naakunda abaana be kandi naakunda kubajwisiza omushana gwe ogw’amazima kubeebembera omu bi barikukora byona, na munonga omu kuramya. (Shoma Zaaburi 43:3.) Yehova atworekire mazima ki, kandi eki nikyoreka kita ngu naatukunda?

9, 10. Yehova naayoreka ata ngu naatukunda ahabw’okutumanyisa amazima (a) agarikumukwataho? (b) agarikukwata aha kigyendererwa kye ahabwaitu?

⁹ Eky’okubanza, Yehova naatumanyisa amazima agarikumukwataho. Naatumanyisa eiziina rye, eriri omu Baibuli emirundi mingi kukira eiziina erindi ryona. Omu muringo ogu, Yehova naatweyiriza haihi, kitubaasisa kumumanya. (Yak. 4:8) Kandi Yehova naatumanyisa emitwarize ye, tumanya oku arikutwaza. N’obu turaabe nitubaasa kureeba amaani ga Yehova n’obwengye bwe kurabira omu bi yaahangire, kurabira omu Byahandiikirwe naatumanyisa oburingaaniza bwe na rukundo ye etaine bugarukiro. (Rom. 1:20) Ari nk’omuzaire oine amaani, obwengye, okwetegyereza, na rukundo, ekirikureetera abaana be kworoberwa kugira omukago murungi nawe.

¹⁰ Yehova naatumanyisa ekigyendererwa kye, n’omwanya gwaitu omu ntebeekanisa ye. Eki nikireetaho obusingye n’obuteeka omu bantu be omu nsi yoona. Kuruga omu Baibuli nitwega ngu abantu tibarahangirwe baine obugabe bw’okwetegyeka bonka bataine Ruhanga, kandi twaba tutakuratiire obuhabuzi obu, nikibaasa kuturugiramu ebintu bibi. (Yer. 10:23) Eki ni kikuru munonga ahariitwe. Twamanya obushoboorozi bwa Ruhanga, nibwo turikubaasa kugira obusingye n’obumwe. Eki ka nikyoreka ngu Yehova naatukunda ahabw’okucwamu kutumanyisa amazima aga ag’omuhendo!

11. Yehova aturaganiise ki ekirikworeka ngu naatukunda munonga kandi naatufaho?

¹¹ Tataitwe owa rukundo naafayo munonga aha biro by’omumaisho eby’abaana be, arikwenda ngu bagire ekigyendererwa ekyabuzima. Eky’obusaasi, abantu baingi bari omu mwirima tibarikumanya oku ebiro by’omumaisho biraabe, nibamara obwire bwabo barikwesherurira ebintu ebitarikwetengyesa kandi ebirikugasha akaire kakye. (Zab. 90:10) Nitumanya ngu Yehova naatukunda munonga itwe abaana be ahabw’okuba aturaganiise amagara marungi omu biro by’omumaisho. Ekyo nikitureetera kumanya ngu hariho ekigyendererwa omu kubaho.

YEHOVA NAAHANA ABAANA BE KANDI ABAHABURA

12. Yehova okuhana Kaini na Baruki kikooreka kita ngu naabakunda kandi ngu naabafaho?

¹² “N’enki ekyakukwatsa ekiniga? Ku oraakore gye torikwija kusiimwa? . . . Kwonka iwe oshemereire [kutegyeka ekibi kyawe]?” (Kut. 4:6, 7) Okwo kukaba kuri okuhana okurimu n’obuhabuzi. Yehova akarabura Kaini obu yaatoora omuhanda mubi. Eky’obusaasi, Kaini tarakuratiire okurabura okwo, kandi ekyo kikamurugiramu okubonabona. (Kut. 4:11-13) Obu omuhandiiki wa Yeremia Baruki, yaabaire ahweiremu amaani kandi aine oburemeezi, Yehova akamuhana kumuhwera kureeba oburemeezi obu yaabaire aine. Okutashushana Kaini, Baruki akaikiriza okuhana kwa Yehova, kandi eki kikakiza amagara ge.​—Yer. 45:2-5.

13. Ahabw’enki Yehova yaikiriize abaheereza be abeesigwa kugyezibwa?

¹³ Ou Yehova “akunda niwe ahana, kandi ateera omwana weena ou aikiriza,” Paulo nikwo yaahandiikire. (Heb. 12:6) Kwonka okuhana tikirikumanyisa okufubira kwonka. Okuhana n’okw’emiringo mingi. Omu Baibuli harimu abaheereza ba Ruhanga baingi abeesigwa abaarabire omu kugyezibwa kw’amaani okurikubaasa kuba kwabaire nikutwariramu okuhanwa n’okutendekwa. Teekateeka ahari Yosefu, Musa, na Daudi. Ebirikubakwataho bikahandiikwa gye omu bwijwire kukira abandi boona. Okushoma oku Yehova yaabahwereire omu kugyezibwa kwabo n’oku yaabakoreise munonga, nikitureetera kwongyera kuhamya ngu naafayo, kandi naakunda abaheereza be.​—Shoma Enfumu 3:11, 12.

14. Nitubaasa kumanya tuta rukundo ya Yehova twahanwa?

¹⁴ Yehova ku arikutuhana nikituhwera kureeba rukundo ye. Yehova ku arikuhana okozire ekibi kandi akaikiriza akeeteisa, “naija kumusaasirira kimwe.” (Isa. 55:7) Ekyo nikimanyisa ki? Daudi akashoboorora aha kusaasira kwa Yehova ati: “Niwe asaasira eby’okutahikiirira byawe byona, akakiza endwara zaawe zoona; akacungura amagara gaawe, ngu garekye kuhwerekyerera, akakujweka embabazi n’okusaasira nk’ekirunga. Nk’oburugwa-izooba oku eri hare n’oburengyerwa-izooba, nikwo atwaire atyo hare eby’okushiisha byaitu.” (Zab. 103:3, 4, 12) Ka tugume twikirize okuhana kwa Yehova n’obuhabuzi bwe kandi turahukye kubugyenderaho, turikumanya ngu eki naakikora ahabwa rukundo ye mpango.​—Zab. 30:5.

YEHOVA NAATURINDA KANDI ATUCUNGURA

15. Niki ekirikworeka ngu Yehova naatwara abaheereza be nk’ab’omuhendo?

¹⁵ Hatariho kubanganisa, omuzaire oine rukundo naafayo munonga kucungura eka ye n’okugirinda akabi koona akarikubaasa kugihikaho. Yehova Tataitwe ow’omu iguru nawe naakora nikyo kimwe. Omuhandiiki wa Zaaburi arikugamba ahari Yehova akagira ati: “Arinda amagara g’abarikwera be, abaiha omu mikono y’ababi.” (Zab. 97:10) Teekateeka aha ky’okureeberaho eki. Nk’oku orikutwara amaisho gaawe nk’ag’omuhendo! Yehova nikwo arikutwara abaheereza be atyo. (Shoma Zekaria 2:8.) Abaheereza ba Ruhanga ka n’ab’omuhendo ahariiwe!

16, 17. Shoboorora oku Yehova atwire naarinda kandi naacungura abaheereza be, kuhika n’omu bunaku bwaitu.

¹⁶ Gumwe aha miringo ei Yehova arikukoresa kurinda abaheereza be, n’okukoresa baamaraika be. (Zab. 91:11) Maraika omwe akacungura Yerusaalemu obu Abaasiria baagitaahirira, yaacwekyereza abaserukare 185,000 omu kiro kimwe. (2 Bag. 19:35) Entumwa Petero na Paulo n’abandi bakahwerwa baamaraika kuruga omu kihome. (Byak. 5:18-20; 12:6-11) N’omu bunaku bwaitu, omukono gwa Yehova tiguri mugufu. Ow’eishe-emwe owaabaire ajwekyeire ofiisi enkuru owaataayaayiire ofiisi y’eitaagi emwe omuri Africa, akagira ngu eby’obutegyeki n’ediini bikaba biteganiise eihanga eryo. Okurwana, okwiba, okuhamba, n’okwita, bikareetera eihanga eryo kuzamu akeesharingo n’okuhenda ebiragiro. Kwonka, tihaine n’omwe aha b’eishe-emwe na banyaanyazi-itwe owaafiire, n’obu baingi aharibo baafeereirwe ebintu byabo n’emirimo yaabo. Ku baabuuziibwe oku embeera zaabaire nizibagyendera, boona barikumwenya munonga, bakagira bati: “Buri kimwe kiri gye, Yehova ayebare!” Bakareeba oku Yehova yaabarinzire.

¹⁷ Obumwe Yehova naareka abazigu kwita abaheereza be abeesigwa, nka Stefano. Kwonka, Ruhanga naarinda abaheereza be arikuguma naabarabura aha bikwatiraine n’obukodyo bwa Sitaane. (Efe. 6:10-12) Kurabira omu Kigambo kye n’ebitabo by’ekibiina kye, tuhwereirwe kureeba akabi akari omu kusherura eby’obutungi, okwejumba omu by’obushambani, eby’okweshemeza ebirimu obushaarizi, okukoresa kubi Intaneeti, n’ebindi. Buzima, Yehova Tataitwe orikukunda abaheereza be, naabarinda kandi afayo n’aha bi barikurabamu.

OMUGISHA GW’OMUTAANO

18. Nooyehurira ota ahabw’okugira ngu Yehova naakukunda?

¹⁸ Bwanyima y’okushwijuma emwe aha miringo ei Yehova ayorekire ngu naatukunda, nitubaasa kwehurira nk’oku Musa yaayehuriire. Musa arikuteekateeka aha ku yaabaire atwire naaheereza Yehova, akagira ati: “Omu kasheeshe otuhaazye embabazi zaawe, tubone kushemererwa n’okwesiima ebiro byaitu byona.” (Zab. 90:14) Okumanya n’okureeba oku Yehova arikutukunda, n’omugisha gw’omutaano ogu twine hati. Nk’entumwa Yohaana, nituhigwa kugira tuti: “Mureebe okukunda oku Isheboona yaatukunzire oku kuri!”​—1 Yoh. 3:1.