Okukora na Ruhanga Nikureeta Okushemererwa

1. N’obu Yehova araabe niwe Arikukizayo Obushoboorozi, niki eki atwire naaha abandi?

YEHOVA niwe Arikukizayo Obushoboorozi, niwe Omuhangi w’ebintu byona, niwe Oine obwengye obutaine bugarukiro n’amaani. Eki Yobu akarugaho yaakimanya. Yehova bwanyima y’okuhwera Yobu kwetegyereza eki, Yobu akagarukamu ati: “Nimmanya ku orikubaasa byona, kandi tihariho kirikubaasa kuzibira eki omaririire kukora.” (Yob. 42:2) N’obu Yehova araabe naabaasa kuhikiiriza kyona eki arikuba acwiremu kukora ataine buhwezi, kuruga omu kutandika atwire naaha abandi emirimo kukora nawe omu kuhikiiriza ekigyendererwa kye.

2. Ni murimo ki omukuru ogu Yehova yaahaire Yesu kukora?

² Ruhanga akabanza kuhanga omwana we omwe wenka ou yaayehangiire. Akaikiriza Omwana we kwejumba omu kuhanga ebyahangirwe eby’omwoyo n’ebirikureebwa. (Yoh. 1:1-3, 18) Entumwa Paulo akahandiika ahari Yesu ati: ‘Omuri ogwo nimwo ebintu byona byahangiirwe, eby’omu iguru n’eby’ahansi, ebirikureebwa n’ebitarikureebwa, yaaba bitebe by’obugabe, nari obukama, nari obutegyeki, nari obushoboorozi byona bikahagwa kurabira omuriwe, kandi byahangwa kuba ebye.’ (Kol. 1:15-17) N’ahabw’ekyo, Yehova akaha ekitiinisa Omwana we arikumwikiriza kwejumba omu kuhanga, kandi arikugambira n’abandi omurimo mukuru ogw’Omwana we.

3. Yehova akaha Adamu murimo ki, kandi ahabw’enki?

³ Kandi Yehova naaha abantu emirimo ngu bakore nawe. Nk’eky’okureeberaho, akaikiriza Adamu kuha enyamaishwa amaziina. (Kut. 2:19, 20) Ka kishemereire kuba kyareeteire Adamu okushemererwa kureeba ebyahangirwe ebi, kwega emitwarize yaabyo, kandi akabiha amaziina agarikuhikaana nabyo! Yehova akaba naabaasa kuha amaziina enyamaishwa zoona ezi yaahangire. Kwonka, akaikiriza Adamu kuba niwe yaaziha amaziina. Kandi Ruhanga akaha Adamu omugisha gw’okuhangusya Paradiso kurenga aha nsharo za Edeni. (Kut. 1:27, 28) Kwonka eky’obusaasi, Adamu akanga kuguma naakora na Ruhanga, yaayereetera enaku n’abaijukuru be.​—Kut. 3:17-19, 23.

4. Ruhanga akakoresa ata abandi kuhikiiriza ekigyendererwa kye?

⁴ Bwanyima, Ruhanga akaha abantu abandi obujunaanizibwa bw’okwejumba omu kuhikiiriza ekigyendererwa kye. Noa akombeka obwato obwamubaasiise kucungurwa n’ab’omu ka ye omu bwire bw’Omwegyemure. Musa akacungura Abaisraeli kuruga Misri. Yoshua akatwara Abaisraeli omu Nsi Eyaaraganisiibwe. Sulemaani akombeka hekalu omuri Yerusaalemu. Mariamu akaba nyina wa Yesu. Abantu aba boona abeesigwa n’abandi baingi bakakora na Yehova kuhikiiriza ekigyendererwa kye.

5. Ni murimo ki ogu turikubaasa kwejumbamu, kandi kuri Yehova yaayenzire akaba naabaasa kukora ki? (Reeba ekishushani aha kutandika.)

⁵ Obunaku obu, Yehova naatushaba kushagikira kimwe Obukama oburikwebemberwa Mesia. Hariho emirimo mingi omu buheereza oburikwera. Abakristaayo abamwe nibabaasa kutejumba omu mirimo emwe, kwonka twena nitubaasa kwejumba omu murimo gw’okubuurira amakuru marungi g’Obukama. Buzima, Ruhanga kuri yaayenzire, akaba atarikutwikiriza kwejumba omu murimo ogu. Akaba naabaasa kucwamu kugambira abantu omu nsi butunu ari omu iguru. Yesu akagira ngu Yehova akaba naabaasa n’okukoresa amabaare kugamba aha Bukama bwa Mesia. (Luk. 19:37-40) Kwonka, Yehova naatwikiriza kuba “abakozi abarikukora hamwe” nawe. (1 Kor. 3:9) Entumwa Paulo akahandiika ati: ‘Naitwe nk’oku turi abarikukora nawe, nitubeeshengyereza, murekye kufiisa busha embabazi za Ruhanga.’ (2 Kor. 6:1) Okukora hamwe na Ruhanga n’omugisha gw’amaani munonga, ogurikutureetera okushemererwa. Ka tureebe zimwe aha nshonga ahabw’enki.

OKUKORA NA RUHANGA NIKITUREETERA OKUSHEMERERWA

6. Omwana wa Ruhanga ow’okubanza akeehurira ata ahabw’okukora na Ishe?

⁶ Kuruga ira, abaheereza ba Yehova batwire nibashemererwa kukora nawe. Omwana wa Ruhanga ow’omwoyo orikubanza, akagira ngu Yehova ‘akampanga naakitandika emirimo ye, nkaba ndi hamwe nawe, ndi omukozi mukuru; obutoosha niinye naabaire ndi okushemererwa kwe, niinyesiimira omu maisho ge buri izooba.’ (Enf. 8:22, 30) Yesu akaba ashemererwa kukora na Ishe, arikwesiima ahabw’ebi yaakora n’ahabw’okumanya ngu Yehova naamukunda. Kandi shi itwe?

7. Ahabw’enki omurimo gw’okubuurira gurikureeta okushemererwa?

⁷ Yesu akagira ngu okuha n’okuheebwa nibireeta okushemererwa. (Byak. 20:35) Tukashemererwa munonga kumanya amazima, kandi nitushemererwa kubuuriraho abandi amazima aga. Ku turikuba nitubuurira abandi amazima, nitureeba abaine enjara y’eby’omwoyo barikushemererwa ku barikwetegyereza Ruhanga waitu kandi bakasiima n’amazima g’omuhendo agari omu Kigambo kye. Nikitukwataho ku turikureeba nibakora empindahinduka omu miteekateekyere n’omu mitwarize yaabo. Obwo nibwo turikumanya ngu okwejumba omu murimo gw’okubuurira amakuru marungi ni kikuru munonga. Eki nikibaasisa abo abarikugarukana na Ruhanga kutunga amatsiko g’amagara agatahwaho. (2 Kor. 5:20) Omurimo gw’okuhwera abantu kugira amatsiko gw’okwija kutuuraho ebiro byona, nigwo gurikukirayo kureeta okushemererwa n’okumarwa.

8. Abamwe bagambire ki aha kushemererwa okurikuruga omu kukora na Yehova?

⁸ N’obu turaabe nitushemererwa abantu baakunda ebi twababuurira, nitushemererwa n’okumanya ngu nitushemeza Yehova kandi ngu naasiima okuteeraho kwaitu kumuheereza. (Shoma 1 Abakorinso 15:58.) Marco, orikutuura omuri Italy, naagira ati: “Nyine okushemererwa kwingi ahabw’okumanya ngu ninkora kyona ekirikubaasika kuheereza Yehova atari muntu ndiijo orikubaasa kurahuka kwebwa eki nkozire.” Nikyo kimwe na, Franco, orikuheereza omu Italy, naagira: “Yehova arikukoresa Ekigambo kye n’ebindi eby’omwoyo ebi arikutuha, naatwijutsya buri izooba ngu naatukunda, kandi ngu buri kintu eki turikumukorera naakitwara nka kikuru, n’obu twakuba nitureeba ngu titukozire ky’amaani. Egi niyo nshonga ahabw’enki okukora na Ruhanga nikindeetera okushemererwa kandi kimbaasisa n’okugira ekigyendererwa.”

OKUKORA NA RUHANGA NIKUTWIRIZA HAIHI NAWE N’ABANDI

9. Yehova na Yesu bakaba baine mukago ki, kandi n’ahabw’enki?

⁹ Ku turikukora n’abu turikukunda, nitwirira haihi nabo kandi tumanya emitwarize yaabo. Nitumanya eki barikwenda kukora n’omuringo ogu barikwenda kukikoramu. Yesu akakora na Yehova kumara obuhumbi bw’emyaka, baakora omukago guhami, kandi baakundana munonga. Yesu arikugamba aha mukago ogu aine na Ishe, akagira ati: “Nyowe na Tata, tuba omwe.” (Yoh. 10:30) Bakaba baine obumwe, butoosha barikukora hamwe bakwataniise.

10. Ahabw’enki okubuurira nikutwiriza haihi na Ruhanga n’abandi?

¹⁰ Yesu arikushaba, akeeshengyereza Yehova kurinda abeegi be. Ahabwa nshonga ki? Akashaba ati: “Babe bamwe nkaitwe oku turi bamwe.” (Yoh. 17:11) Twayorobera emitindo ya Ruhanga kandi tukeejumba omu murimo gw’okubuurira, nitwetegyereza emitwarize ye mirungi munonga. Nitumanya ahabw’enki kiri eky’obwengye kumwesiga kandi tukakuratira obuhabuzi bwe. Twayirira haihi Ruhanga nawe naatwirira haihi. (Shoma Yakobo 4:8.) Nitwirira haihi ab’eishe-emwe bagyenzi baitu ahakuba twena nituhikwaho embeera zigumire kandi tutunga n’okushemererwa nkabo, ahabw’okugira ngu twine ebigyendererwa birikushushana. Eego, nitukora hamwe, tushemererwa hamwe, kandi tugumisiriza hamwe. Octavia, orikutuura omuri Britain, naagira ati: “Okukora na Yehova nikinyiriza haihi n’abandi, ahakuba omukago gwangye nabo tigurikurugiirira aha bintu by’omubiri ebi turikukunda, beitu nigurugiirira aha bigyendererwa birikushushana nk’okuheereza hamwe.” Naiwe nooyehurira otyo? Buzima twareeba abandi nibateeraho kushemeza Yehova, nikitureetera kwirira haihi nabo.

11. Ahabw’enki turikwija kweyongyera kwirira haihi n’ab’eishe-emwe omu nsi ensya?

¹¹ Omukago ogu twine na Ruhanga n’abantu bagyenzi baitu nigubaasa kuba guhami hati, kwonka nigwija n’okweyongyera kuhamira kimwe omu nsi ensya erimu okuhikiirira. Teekateeka aha murimo ogurikwija kubaho omu biro by’omumaisho! Abaraazookye nibaija kuba baine kutangirirwa kandi bakeegyesibwa emisingye ya Yehova. Nihaija kuba hariho omurimo gw’okuhindura ensi ekaba paradiso. Ekikuru munonga, ka nikiija kureeta okushemererwa kukora tukwataniise, kandi turikweyongyera kuba abahikiriire turikutegyekwa Obukama bwa Mesia! Abantu boona nibaija kuguma nibairira haihi na Ruhanga waabo, orikwija kuhaazya “ekintu kyona ekihuriire ebi kirikwetenga.”​—Zab. 145:16.

OKUKORA NA RUHANGA N’EKY’OBURINZI

12. Omurimo gw’okubuurira niguturinda guta?

¹² Twine kwerinda omu by’omwoyo. Ahabw’okugira ngu nitutuura omu nsi erimu emitwarize ya Sitaane Omuregi, kandi n’ahabw’okugira ngu turi abatahikiriire, nikitworobera kugira emiteekateekyere egwire n’emitwarize y’ensi. Omwoyo gw’ensi nigubaasa kugyeragyeranisibwa n’amaani g’amaizi g’omugyera agarikututwara ahu tutarikwenda kuza. Kubaasa kwetantara kutwarwa amaizi, twine kuziha n’amaani turikuza aha rubaju orundi. Nikyo kimwe, nikyetengyesa amaani maingi kubaasa kwetantara kutwarwa omwoyo gw’ensi ya Sitaane. Twaba nitubuurira abandi, nituta omutima aha bintu by’omwoyo ebikuru kandi eby’omugasho, beitu hatari aha biteekateeko ebirikutuubya okwikiriza. (Fil. 4:8) Okubuurira nikuhamya okwikiriza kwaitu, kurikutwijutsya ebi Yehova arikuraganisa n’emitindo ye mirungi. Kandi nikutuhwera kuguma tujwaire eby’okurwanisa byaitu eby’omwoyo.​—Shoma Abaefeso 6:14-17.

13. Omujurizi wa Yehova omwe omuri Australia naatwara ata okubuurira?

¹³ Twagira bingi by’okukora omu murimo gw’okubuurira n’omu mirimo endiijo ey’eby’omwoyo, nituba tutaine bwire bw’okuteekateeka munonga aha buremeezi bwaitu, kandi eki nikiturinda. Joel, orikutuura omuri Australia, naagira ati: “Omurimo gw’okubuurira nigumpwera kuteebwa embeera z’abantu omu nsi. Omurimo gw’okubuurira nigunyijutsya embeera mbi ezi abantu barimu n’ebirungi ebi ntungire ahabw’okugyendera aha misingye ya Baibuli. Nigumpwera kuteeraho kuba omucureezi, nigumbaasisa kwesiga Yehova n’ab’eishe-emwe n’abanyaanyazi-itwe.”

14. Ahabw’enki okugumisiriza omu kubuurira kirikworeka ngu omwoyo gwa Ruhanga nigutuhwera?

¹⁴ Okubuurira nikutuhwera kwongyera kuhamya ngu omwoyo gwa Ruhanga guri naitwe. Teekateeka ahari eki: Ka tugire ngu waaheebwa omurimo gw’okuguma nootwarira abantu emigaati omu kicweka kyanyu. Torikushashurwa ahabw’ebi orikukora nari kugarurirwa esente zaawe ezi orikuba okoreise. Kandi ekikuru, nooreeba ngu abantu baingi tibarikwenda emigaati egyo, kandi abamwe nibakwanga ahabw’okugyenda noogaba emigaati egyo. Noobaasa kuguma aha murimo ogwo kuhitsya ryari? Ahabw’abantu kugira emiteekateekyere mibi kandi bakakumaramu amaani, noobaasa kutagumizamu nookora omurimo ogwo. Kwonka, baingi ahariitwe nitugumisiriza omu buheereza buri mwaka turikukoresa esente zaitu n’obu turaabe nitujumwa kandi tutarikusiimwa. Mbwenu shi ekyo tikirikuhamya ngu omwoyo gwa Ruhanga ogurikwera nigutuhwera?

OKUKORA NA RUHANGA NIKYOREKA RUKUNDO EI TUMWINIIRE N’ABANDI

15. Okubuurira amakuru marungi kwine kakwate ki n’ekigyendererwa kya Ruhanga ahabw’abantu?

¹⁵ Teekateeka aha ku okubuurira amakuru marungi kiine akakwate n’ekigyendererwa kya Yehova ahabw’abantu. Yehova akaba naayenda ngu abantu batuure omu nsi batarikufa, kwonka n’obu Adamu araabe yaasiisire, Yehova tarahindwire kigyendererwa kye. (Isa. 55:11) Omu mwanya gw’ekyo, akataho entebeekanisa kugira ngu abantu bacungurwe kuruga omu kibi n’okufa. Kuhikaana n’ekigyendererwa ekyo, Yesu akaija omu nsi yaahayo amagara ge ahabw’abantu abarikworobera Ruhanga. Kwonka kubaasa kworobera Ruhanga, bakaba baine kwetegyereza eki arikwenda ngu bakore. N’ahabw’ekyo Yesu nawe akeegyesa abantu ebi Ruhanga arikwenda ngu bakore, kandi yaaragiira abeegi be kukora nikyo kimwe. Twahwera abandi kugarukana na Ruhanga, nituba nitwejumba butunu omu ntebeekanisa y’okucungura abantu kuruga omu kibi n’okufa.

16. Omurimo gwaitu gw’okubuurira gwine kakwate ki n’ebiragiro ebirikukira obukuru?

¹⁶ Okuhwera abandi kuza omu muhanda ogurikuhitsya omu magara agatahwaho nikyoreka ngu nitukunda abantu bagyenzi baitu na Yehova, “oyenda ngu abantu boona bajunwe, bamanyire kimwe amazima.” (1 Tim. 2:4) Yesu ku yaabuuziibwe ekiragiro ekirikukira ebindi omu byabaire bihairwe Abaisraeli, akagarukamu ati: “Kunda Mukama Ruhanga waawe n’omutima gwawe gwona, n’amagara gaawe goona, n’obwengye bwawe bwona. Eki nikyo kiragiro kikuru kandi eky’okubanza. Ekya kabiri ekirikukishusha n’eki: Kunda mutaahi waawe nk’oku oyekunda.” (Mat. 22:37-39) Twayejumba omu murimo gw’okubuurira, nitworeka ngu nitworobera ebiragiro ebi byombi.​—Shoma Ebyakozirwe 10:42.

17. Nootwara ota omugisha gw’okubuurira amakuru marungi?

¹⁷ Ka twine omugisha gw’amaani! Yehova atuhaire omurimo ogurikureeta okushemererwa, ogurikutwiriza haihi nawe n’abandi, kandi gukaturinda omu by’omwoyo. Kandi nigutubaasisa kworeka ngu nitukunda Ruhanga n’abantu abandi. Embeera z’abaheereza ba Ruhanga ab’omu nsi nizitaanira kimwe, kwonka yaaba turi bato nari bakuru, abagaiga nari abooro, twine amagara marungi nari mabi, twena nituteeraho kugambira abandi ebi turikwikiriza. Buzima, noobaasa kwikirizana n’ebi Chantel orikutuura omuri France yaagambire. Akagira ati: “Orikukirayo kuba ow’amaani omu nsi yoona, Owaahangire ebintu byona, Ruhanga w’okushemererwa naagira ati: ‘Gyenda! Gamba! Gamba omu mwanya gwangye, gamba kuruga aha mutima gwawe. Ninyija kukuha amaani, nkuhe Ekigambo kyangye Baibuli, nkuhe obushagiki kuruga omu iguru, nkuhe ab’okukora nabo omu nsi, ninyija kuguma ninkutendeka mporampora, kandi nkuhe n’obuhabuzi omu bwire obuhikire.’ Ka n’omugisha gw’amaani munonga kukora ebi Yehova Ruhanga waitu arikutugambira, kandi tukakora nawe!”